–تۇركىستان وبلىسىنىڭ تۇرعىنى ءتىرى ەكەنىن دالەلدەي الماي ءجۇر. تۇركىستان وبلىسىنداعى وتىرار اۋدانىندا 12 جاسار قىز قۇجات بويىنشا ءولى بولىپ شىققان دەپ حابارلايدى Qamshy.kz اقپارات اگەنتتىگى كتك تەلەارناسىنا سىلتەمە جاساپ.

ايجان امانجولدىڭ اتا-اناسى قىزىنا قاتىستى بۇل دەرەكتى بىلتىر كەزدەيسوق ءبىلىپتى. سودان بەرى اۋدانداعى قۇزىرلى مەكەمەلەرگە شاعىمدانعانىمەن، ايجاننىڭ ءتىرى ەكەنىن قۇجات بويىنشا راسىمدەي الماي الەك. جاۋاپتى ماماندار بولسا، بۇل ماسەلەنىڭ جاقىن ارادا شەشىلەتىنىن ەندى عانا ايتىپ وتىر.

7-سىنىپتى بىتىرگەن ايجان دەمالىس كەزىنە بەرىلگەن تاپسىرمانى ورىنداپ تا قويىپتى. رەسمي تۇردە مەكتەپكە بارىپ، مەدباقىلاۋ كەزىندە ەكپە الىپ جۇرگەن قىز 5 جىلدان بەرى تىرىلەر قاتارىندا جوق. ونىڭ و دۇنيەلىكتەردىڭ ساناتىندا ەكەنىن بىلتىر اناسى قىزىن اۋرۋحاناعا اپارعاندا ءبىر-اق ءبىلىپتى. ايجاننىڭ شاقالاق كۇنىندە شەتىنەگەن ەگىزىنىڭ سىڭارىمەن شاتاسقان بولۋى كەرەك دەگەن جورامال دا جوققا شىققان.

""ءولدى" دەپ شىققان كومپيۋتەردەن. ءسىڭلىمنىڭ ەگىزى بار، سونىمەن شاتاستى دەپ ويلادىم. 2014-تە دەپ قايتىس بولعان دەپ تۇر. قىزىمنىڭ قۇجاتىن دۇرىستاپ بەرسە دەيمىن"، - دەدى جانات سۇلەيمەنوۆا (ايجاننىڭ اناسى)

ءتىرى قىزىنىڭ 2014 جىلدان بەرى ءولى ەكەنىن بىلە سالا قۇجاتتاعى اقاۋدى رەتتەمەك بولعان جاقىندارى وتىرار اۋدانىنداعى قۇزىرلى مەكەمەلەردىڭ تابالدىرىعىن توزدىرۋمەن ءجۇر. اۋدان اكىمىنە ايتايىن دەسە، "وعان دا جولاتپايدى" دەيدى.

–جەكەمەنشىك اۋرۋحاناعا كورسەتىپ جاتىرمىن. باسى اۋىرادى دەيدى. ەمدەلمەسە، ەرتەڭ وزىنەن – ءوزى سويلەي بەرەتىن ءبىر ءتۇرلى اۋرۋعا شالدىعۋى مۇمكىن ەكەن، - دەدى اشىنعان انا.  

"ماڭىنا جولاتپايدى" دەگەن شەنەۋنىكتەر، الايدا، بۇگىن وزدەرى كەلدى. اۋىل اكىمىنەن باستاپ، اۋداندىق جۇمىسپەن قامتۋ ءبولىمىنىڭ باسشىلارى كەلىپ، سابىرعا شاقىرۋمەن الەك. سوزدەرىنە سەنسەك، قاتە تەحنيكادان كەتكەن. ال، ءبىر جىلدان بەرى بار اتقارىلعان ءىس – اۋدان شەنەۋنىكتەرىنىڭ ءبارى جابىلىپ ەلەكتروندىق ۇكىمەتتىڭ شۇعىل جەلىسىنە حابارلاسقانى ەكەن.

"ق ر جەدەل اقپاراتتىق جۇيەسىنە تەلەفون شالدىق. ەندى ول جەردە ءبىزدىڭ ءوتىنىشتى قابىلداپ الدى. 21 كۇن ارالىعىندا ماسەلە شەشىلەدى دەدى. سول ىشكى ىستەر مينيسترلىگىنىڭ بازاسىنان قاتە كەتىپ تۇر"، - دەدى وتىرار اۋداندىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى قالزيرا كيزباي.

5 جىل بۇرىن كەتكەن قاتەگە كىمنىڭ جاۋاپ بەرەتىنى بەيمالىم. جانە بىلتىردان بەرى نەلىكتەن ناتيجە شىقپاعانىن ايتىپ بەرەر جاۋاپتى شەنەۋنىك اۋداندا جوق. دەسە دە، ءبىر جىلدان بەرى شەشىلمەگەن ماسەلەنى ءبىر قوڭىراۋ ارقىلى ارى كەتسە 20 كۇندە شەشەمىز دەپ وتىر. "وزگە دە قۇجاتتارىنا كومەكتەسۋگە دايىنبىز" دەپ، قۇلشىنىستارى دا ارتىپ تۇر. تەك ايجانىڭ وتباسى مۇنداي سوزگە سەنۋدەن قالعان.