بۇگىن قازاقستان تاريحى تاعى ءبىر جاڭا پاراقپەن تولىعادى. بۇگىن، ەل حالقى ەگەمەندى مەملەكەتتىڭ ەكىنشى پرەزيدەنتىن سايلايدى. تاڭعى ساعات 7:00 دەن باستاپ رەسپۋبليكاداعى بارلىق سايلاۋ ۋچاسكەلەرىندە داۋىس بەرۋ ناۋقانى باستالدى  دەپ حابارلايدى Almaty.tv ءتىلشىسى.

قازاقستان پرەزيدەنتىنىڭ كەزەكتەن تىس سايلاۋىنا داۋىس بەرۋ ساعات 20: 00-گە دەيىن جالعاسادى. ەل باسقارۋعا ۇمىتكەر بولعان جەتى كانديدات ءبىر اي مەرزىمىندە ۇگىت-ناسيحات جۇمىستارىن جۇرگىزىپ، سايلاۋالدى باعدارلاماسىمەن تانىستىرىپ ۇلگەردى.

ماڭىزدى وقيعانى 2 مىڭعا جۋىق شەتەلدىك باقىلاۋشى باقىلاۋعا كىرىسكەن. جالپى، اتالعان سايلاۋعا 12 ميلليون قازاقستاندىق قاتىسادى دەگەن بولجام بار. ال، باقىلاۋشىلاردىڭ دەنى ەل استاناسى نۇر-سۇلتانعا شوعىرلانعان. ەلوردالىق تۇرعىندار دا بەلسەندىلىك تانىتىپ، تاڭ اتقاننان بەرى سايلاۋ ۋچاسكەلەرىنە اعىلىپ جاتىر.

جالپى، بۇگىن رەسپۋبليكا بويىنشا 9920 سايلاۋ ۋچاسكەسى جۇمىس ىستەيتىن بولادى. ول جەرلەردە 70 مىڭعا جۋىق ادام جۇمىس ىستەپ جاتىر. شەت ەلدە جۇرگەن 15 مىڭ قازاقستاندىق تا داۋىس بەرۋگە نيەتتى ەكەندەرىن بىلدىرگەن. ءقازىر ولار ءۇشىن 18 سايلاۋ ۋچاسكەسى جۇمىس ىستەۋدە.

«داۋىس بەرگەن سايلاۋشىلار تۋرالى اقپارات ورتالىق سايلاۋ كوميسسياسىنا ساعات 10دا كەلىپ تۇسەدى. ءار ەكى ساعات سايىن اقپاراتتى جاڭارتىپ وتىرامىز»، - دەيدى ق ر ورتالىق سايلاۋ كوميسسياسىنىڭ حاتشىسى سابيلا مۋستافينا.

بيىلعى سايلاۋدىڭ بۇرىنعىلارىنان وزگەشە ەكەنىن بايقاۋعا بولادى. ماسەلەن، وسى جولى شەتەلدىك باقىلاۋشىلار مەن بۇقارالىق اقپارات قۇرالدارىنىڭ سانى كوپ. ءدال ءقازىر ناۋقاندى 1013 حالىقارالىق وكىل باقىلاۋدا. ال، قازاقستانداعى داۋىس بەرۋدى ناسيحاتتاۋ ءۇشىن شەتەلدىك جۋرناليستەردىڭ رەكوردتىق سانى اككرەديتاسيالانىپتى. 40 مەملەكەتتەن 227 ءتىلشى كەلگەن. ورتالىق سايلاۋ كوميسسياسىندا ينە شانشار ورىن جوق.

سايلاۋدىڭ تاعى ءبىر ماڭىزدى ەرەكشەلىگى – پرەزيدەنتتىك سايلاۋعا العاش رەت ايەل ادام قاتىسىپ وتىر. كانديداتتاردىڭ دا سانى جەتەۋگە جەتتى. ولاردىڭ بارلىعىنا تەڭ جاعداي جاسالعان.

ايتا كەتەيىك، كەزەكتەن تىس پرەزيدەنتتىك سايلاۋعا 9،4 ملرد تەڭگە بولىنگەن. بۇل سومانىڭ باسىم بولىگى سايلاۋ ۋچاسكەلەرىندە جۇمىس ىستەيتىن ادامداردىڭ جالاقىسىنا باعىتتالدى. اقشا ۇكىمەتتىڭ رەزەرۆىنەن الىندى.