بۇگىن ەلىمىزدىڭ بارلىق وڭىرىندەگى پوليسەيلەر كۇشەيتىلگەن جۇمىس تارتىبىنە كوشتى. ەل قاۋىپسىزدىگىن كۇزەتۋگە 21 مىڭنان استام ءتارتىپ ساقشىسى جۇمىلدىرىلعان. ءار اۋلا، ءار كوشە، ءتىپتى قالتارىس-بۇلتارىستارعا دەيىن بۇگىن قاتاڭ باقىلاۋدا. ونداعى ماقسات – سايلاۋشىلاردىڭ الاڭسىز، ەمىن-ەركىن داۋىس بەرۋىنە جاعداي جاساۋ. جانە تۇرعىنداردىڭ قاۋىپسىزدىگىن قامتاماسىز ەتۋ. بۇل كۇنى ەلىمىز بويىنشا 10 مىڭ سايلاۋ ۋچاسكەسى ساقشىلاردىڭ باقىلاۋىندا.

«قاۋىپسىزدىكتى قامتاماسىز ەتۋ ءۇشىن بارلىق سايلاۋ ۋچاسكەلەرىندە پاترۋلدىك پوليسيا قىزمەتكەرلەرى جۇمىس ىستەيدى. قوعامدىق ءتارتىپتى قورۋعا 21 مىڭنان استام ساقشى جۇمىلدىرىلادى. مۇنداي قاۋىپسىزدىك شاراسىن ءبىرىنشى رەت ۇيىمداستىرىپ وتىرعان جوقپىز. بۇل – ءار سايلاۋ كەزىندە بولاتىن ءداستۇرلى جۇمىس»، – دەيدى ق ر ىشكى ىستەر ءمينيسترى ەرلان تۇرعىمبايەۆ.

الماتىنىڭ ءتارتىپ ساقشىلارى دا بۇل كۇنى كۇشەيتىلگەن رەجيمدە جۇمىس ىستەپ جاتىر. ءاربىر سايلاۋ ۋچاسكەسىنىڭ ماڭىنا ەكى-ۇش پوليسەيدەن كۇزەتكە قويىلىپ، ولار كىرپىك قاقپاي قوعامدىق ءتارتىپتى باقىلاپ تۇر.

ايتا كەتسەك، الماتىلىق پوليسەيلەر 12 ماۋسىمعا دەيىن وسىنداي كۇشەيتىلگەن رەجيمدە جۇمىس ىستەيدى. 2000-نان استام ساقشى اسىرەسە ادامدار كوپ جۇرەتىن قوعامدىق ورىنداردى قاتاڭ باقىلاۋعا الادى.

«سايلاۋ كۇنى قوعامدىق ءتارتىپتى قامتاماسىز ەتۋ ماقساتىندا سايلاۋ ۋچاسكەلەرىنىڭ توڭىرەگىندە ءتارتىپ ساقشىلارى كۇشەيتىلگەن رەجيمدە جۇمىس ىستەيدى. ياعني بۇل – قانداي دا ءبىر زاڭسىز ىس-ارەكەتتەردى بولدىرماۋعا، سونىمەن قاتار قوعامدىق ءتارتىپتى ساقتاۋعا جانە ۇساق-تۇيەك قۇقىق بۇزۋشىلىقتاردى ايقىنداۋعا باعىتتالعان ءىس-شارا»، – دەيدى الماتى قالاسى پد رەسمي وكىلى سالتانات ازىربەك.