پرەزيدەنت سايلاۋى تاۋەلسىز مەملەكەتىمىزدىڭ تاريحىنداعى ماڭىزدى ساياسي وقيعا. بۇل وقيعا بولاشاقتا مەملەكەتىمىزدىڭ ساياسي-ەكونوميكالىق، الەۋمەتتىك جاعىنان بۇدان دا قارىشتاپ دامۋىنا ۇلكەن ۇلەس قوسادى. بۇگىنگى پرەزيدەنت سايلاۋىنا تۇرعىندار ەرەكشە قىزىعۋشىلىق تانىتىپ، ەرەكشە بەلسەندىلىكپەن داۋىس بەرىپ جاتىر. سايلاۋعا ءۇزىلىسسىز كەلىپ جاتقان حالىقتىڭ كوڭىل كۇيى دە كوتەرىڭكى ەكەنىن بايقادىق.  

الاتاۋ اۋدانىندا ورنالاسقان №28 سايلاۋ ۋچاسكەسىندە ءتىزىم بويىنشا 2 670 سايلاۋشىلار بار. ولاردىڭ اراسىندا ۇيدە داۋىس بەرۋگە ءوتىنىش بىلدىرگەن ازاماتتار دا جوق ەمەس. №28 سايلاۋ ۋچاسكەسىنىڭ ءتوراعاسى اسەت نۇرعازىنىڭ ايتۋىنشا، بۇگىن ساعات 11.00-دە 4 ازامات ۇيدەن داۋىس بەرۋگە ءوتىنىش بىلدىرگەن. بارلىعى «قازاقستان رەسپۋبليكاسىنداعى سايلاۋ تۋرالى» زاڭىنا سايكەس وتكىزىلىپ وتىرعان داۋىس بەرۋ ىسىندە سايلاۋشىلاردىڭ بارلىق كونستيتۋسيالىق قۇقىعى ساقتالاتىن بولادى. سايلاۋ كوميسسياسىنىڭ جۇمىسىن باقىلاۋعا قوعامدىق بىرلەستىكتەردەن، ساياسي پارتيالاردان وزدەرىنىڭ سەنىمدى وكىلدەرى كەلدى. داۋىس بەرۋ قىزىپ جاتقاندا بۇل سايلاۋ ۋچاسكەسىنە وبسە-نىڭ ەكى وكىلى كەلىپ قاتىسىپ، وزدەرىنىڭ جاقسى دەگەن باعالارىن بەرىپ كەتتى.

-ولار مۇندا ءبىر جارىم ساعاتتاي وتىرىپ، تۇرعىندارمەن تىلدەسىپ، پرەزيدەنت سايلاۋىنىڭ قالاي ءوتىپ جاتقانى تۋرالى حالىقتىڭ وي-پىكىرىن ءبىلدى، - دەيدى №28 سايلاۋ ۋچاسكەسىنىڭ ءتوراعاسى اسەت نۇرعازى.  

پرەزيدەنت سايلاۋىنا ەرەكشە ىقىلاسپەن كەلىپ جاتقان تۇرعىنداردىڭ اراسىندا جاڭادان ءۇي الىپ جاتقان ازاماتتار دا بار ەكەن. ولاردىڭ اراسىندا ساۋلاۋشىلار تىزىمىندە بولماي قالعان ازاماتتار دا كەزدەستى.  ء--بىزدىڭ قىزمەتكەرلەرىمىز بەن حالىققا قىزمەت كورسەتۋ ورتالىعىنىڭ قىزمەتكەرلەرى اتالعان ازاماتتارعا 1-2 مينۋتتىڭ ىشىندە مەكەن-جاي انىقتاماسىن بەرگەننەن كەيىن، ولار دا ءوز تاڭداۋلارىن جاساپ، داۋىس بەردى. پرەزيدەنت سايلاۋى اشىق ءوتىپ جاتىر. حالىقتىڭ لەگى ۇزىلمەي، سايلاۋعا كەلىپ جاتقانىنا قۋانىشتىمىز. بۇرىنعىعا قاراعاندا، قازىرگى سايلاۋداعى سايلاۋشى حالىقتىڭ قاراسى كوپ. بۇگىنگى تاڭدا ءبىزدىڭ ىقشام اۋدانىمىزدا كوپتەگەن ادامعا جاڭا تۇرعىن ۇيلەر پايدالانۋعا بەرىلگەندىكتەن، تۇرعىندار سانى ايتارلىقتاي ارتا تۇسكەن، - دەدى ءتوراعا.  

ءقازىر «زەردەلى» ىقشام اۋدانىندا 3 سايلاۋ ۋچاسكەسى بار. ولار - №530، №546 جانە №28  سايلاۋ ۋچاسكەلەرى.

اڭعارعانىمىز - بۇگىنگى پرەزيدەنت سايلاۋىندا اۋدانداعى كوپبالالى انالار دا، مۇمكىندىگى شەكتەۋلى ادامدار دا  ۇلكەن بەلسەندىلىكپەن داۋىس بەردى. جاسى 18-گە تولعان ازاماتتار دا كەلىپ، العاش رەت داۋىس بەرىپ، قۋانىشپەن قايتىپ جاتتى.  

  بالنۇر احمەت.