باقىتجان ساعىنتايەۆ قازاقستان پرەزيدەنتى اكىمشىلىگىنىڭ باسشىسى قىزمەتىنە قايتا تاعايىندالدى دەپ حابارلايدى Qamshy.kz اقپارات اگەنتتىگى اقوردانىڭ رەسمي سايتىنا سىلتەمە جاساپ.

"باقىتجان ءابدىر ۇلى ساعىنتايەۆ قازاقستان رەسپۋبليكاسى پرەزيدەنتى اكىمشىلىگىنىڭ باسشىسى بولىپ تاعايىندالسىن"، - دەپ جازىلعان جارلىقتا.

ساعىنتايەۆ بۇل قىزمەتكە 2019 جىلدىڭ ناۋرىزىندا تاعايىندالعان ەدى. 12 ماۋسىمدا جاڭا مەملەكەت باسشىسى قىزمەتىنە كىرىسكەننەن كەيىن مەملەكەتتىك ورگان باسشىلارىنىڭ وكىلەتتىگىن توقتاتپاي، ولارعا جاڭا تاعايىنداۋلارعا دەيىن لاۋازىمدىق مىندەتتەرىن اتقارۋدى تاپسىردى.  

باقىتجان ساعىنتايەۆ — 1963 جىلى 13 قازاندا جامبىل وبلىسىنىڭ تالاس اۋدانىنداعى ءۇشارال قالاسىندا دۇنيەگە كەلگەن. 1985 جىلى س.م.كيروۆ اتىنداعى قازاق مەملەكەتتىك ۋنيۆەرسيتەتىنىڭ فيلوسوفيا-ەكونوميكا فاكۋلتەتىن ءبىتىرىپ، ەكونوميست، ساياسي ەكونوميكا ءپانىنىڭ وقىتۋشىسى بولىپ شىققان. سول جىلى الماتى حالىق شارۋاشىلىعى ينستيتۋتىندا ساياسي ەكونوميكا كافەدراسىنىڭ وقىتۋشىسى قىزمەتىنە كىرىستى. ال ءۇش جىلدان كەيىن كيروۆ اتىنداعى قازاق مەملەكەتتىك ۋنيۆەرسيتەتىنىڭ الەۋمەتتانۋ كافەدراسىندا اسسيستەنت، اعا وقىتۋشى جانە دوسەنت بولىپ جۇمىس ىستەدى.

ساعىنتايەۆ ءار جىلدارى جامبىل وبلىسى اكىمىنىڭ ورىنباسارى، تابيعي مونوپوليالاردى رەتتەۋ اگەنتتىگىنىڭ ءتوراعاسى، پرەمەر-مينيسترى كەڭسەسىنىڭ جەتەكشىسى، پاۆلودار وبلىسىنىڭ اكىمى، قازاقستاننىڭ ەكونوميكالىق دامۋ جانە ساۋدا ءمينيسترى، "نۇر وتان" پارتياسى ءتوراعاسىنىڭ ءبىرىنشى ورىنباسارى، پرەمەر-مينيستردىڭ ءبىرىنشى ورىنباسارى، قازاقستاننىڭ پرەمەر-مينيسترى، مەملەكەتتىك حاتشى لاۋازىمدارىن اتقاردى.

2019 جىلدىڭ 24 ناۋرىزىندا قازاقستان پرەزيدەنتى اكىمشىلىگىنىڭ باسشىسى قىزمەتىنە تاعايىندالدى.