15 ماۋسىمدا تاجىكستان استاناسى دۋشانبەدە ازياداعى ءوزارا ىقپالداستىق جانە سەنىم شارالارى جونىندەگى كەڭەستىڭ (اوسشك) V ءسامميتى  ءوتتى. وعان  قازاقستان پرەزيدەنتى قاسىم-جومارت توقايەۆ تا قاتىستى دەپ جازادى Qamshy.kz اقپارات اگەنتتىگى اقورداعا سىلتەمە جاساپ.

سامميتكە توقايەۆتان بولەك، ۆلاديمير پۋتين، سي سزينپين، حاسان رۋحاني، شاۆكات ميرزيايەۆ، ابدۋللا ابدۋللا جانە باسقا دا 27 ەلدىڭ باسشىلارى قاتىسقان. تاجىكستان استاناسىندا وسىنداي وكىلدىك دەلەگاسيا العاش رەت جينالدى. سوندىقتان بولار سامميت وتەردەن ءبىر كۇن بۇرىن، ياعني،14 ماۋسىمدا  تاجىكستان پرەزيدەنتى ەمومالي راحمون قاتىسۋشىلار ءۇشىن "دوستىق كەشىن" ۇيىمداستىردى. دۋشانبە ماڭىنداعى ۆارزوب شاتقالىندا ورنالاسقان ەل رەزيدەنسياسىندا سامميتكە جينالعان مەملەكەتتەردىڭ پرەزيدەنتتەرىن قابىلداۋ ءوتتى.  

رەسەيلىك جۋرناليست دميتريي سميرنوۆ ءوزىنىڭ Twitter پاراقشاسىندا تاجىكستان پرەزيدەنتى ەمومالي راحموننىڭ  رەسەي پرەزيدەنتى ۆلاديمير ءپۋتيندى قۇشاقتاعان ءساتىن "پۋتين مەن راحمون دۋشانبەدە: پرەزيدەنتتىك دەڭگەيدەگى قۇشاقتاسۋلار" دەپ جازعان. 

ال قازاقستانداعى الەۋمەتتىك جەلىلەردە ەل پرەزيدەنتى قاسىم-جومارت توقايەۆتىڭ پرەزيدەنتتەر باسقوسۋىندا توپتان تىسقارى جۇرگەن سۋرەتى قىزۋ تالقىلاندى. فەيسبۋك قولدانۋشىلارى توقايەۆتى قازاقستاننىڭ ەكس-پرەزيدەنتى نۇرسۇلتان نازاربايەۆ سياقتى "پرەزيدەنتتەر باسقوسۋىندا توپتىڭ ورتاسىندا ءجۇرىپ، كوپشىلىكتىڭ نازارىنا تۇسە المادى" دەپ سىناپ جاتىر.

اقوردانىڭ جازۋىنشا، توقايەۆ تاجىكستانعا بارعان ساپارىندا بىرنەشە ەلدىڭ باسشىلارىمەن كەزدەستى. ولاردىڭ قاتارىندا كاتار ءامىرى تاميم بەن حاماد ءال تاني،تاجىكستان پرەزيدەنتى ەمومالي راحمون جانە تۇركيا پرەزيدەنتى رەجەپ تايىپ ەردوعان بار.

توقايەۆ ءوز بايانداماسىندا ەمومالي راحمونعا قوناقجايلىلىعى، ءسامميتتى جوعارى دەڭگەيدە ۇيىمداستىرعانى جانە پرەزيدەنت بولىپ سايلانۋىمەن قۇتتىقتاعانى ءۇشىن ريزاشىلىق ءبىلدىردى. سونىمەن قاتار، ول تاجىكستاننىڭ ازياداعى ءوزارا ءىس-قيمىل جانە سەنىم شارالارى جونىندەگى كەڭەسكە ءتوراعالىعى كەڭەستى ازيا ايماعىنداعى وتە ماڭىزدى ماسەلەلەردى شەشۋ ىسىنە بەلسەندى جۇمىلدىرۋعا سەپتىگىن تيگىزەتىنىن ايتتى.

توقايەۆ 1992 جىلى بۇۇ-دا قازاقستاننىڭ العاشقى پرەزيدەنتى نۇرسۇلتان نازاربايەۆتىڭ ازياداعى ءوزارا ءىس-قيمىل جانە سەنىم شارالارى جونىندە كەڭەس وتكىزۋ جونىندەگى ۇسىنعان يدەياسى ازيا قۇرلىعىنىڭ تاريحىندا جاڭا كەزەڭگە جول اشقانىن ايتتى.

"بۇگىندە ازياداعى ءوزارا ءىس-قيمىل جانە سەنىم شارالارى جونىندەگى كەڭەس – ازيا وڭىرىندەگى 35 مەملەكەتتى جانە جەر شارىنداعى حالىقتىڭ جارتىسىنا جۋىعىن بىرىكتىرىپ وتىرعان ءتيىمدى كوپقىرلى قۇرىلىم"، – دەدى قاسىم-جومارت توقايەۆ.

قازاقستان پرەزيدەنتى قاقتىعىستاردىڭ ءورشي تۇسكەنىن، قاۋىپسىزدىك مەحانيزمدەرىنىڭ ەروزياسىن، ساۋدا جانە سانكسيالىق سوعىستاردى، سونداي-اق، حالىقارالىق تەرروريزمنىڭ بەلەڭ العانىن اتاپ ءوتىپ، وڭىردەگى قاۋىپسىزدىككە تونگەن قاتەردىڭ، يدەولوگيالىق، ەتنيكالىق جانە ءدىنارالىق قايشىلىقتاردىڭ ءورشىپ كەلە جاتقانىنا الاڭدايتىنىن ايتتى. وسىعان وراي، ول ازياداعى قاۋىپسىزدىكتىڭ تۇيتكىلدى ماسەلەلەرىن شەشۋ ءۇشىن جۇيەلى ءارى كەشەندى ادىستەردىڭ قاجەت ەكەنىنە توقتالىپ، اتالعان پروبلەماعا بايلانىستى قازاقستاننىڭ ۇستانىمىن جەتكىزدى.

"بارشا دوستارىمىز بەن سەرىكتەستەرىمىزدى فورۋمنىڭ تيىمدىلىگى مەن حالىقارالىق باسەكەگە قابىلەتتىلىگىن ارتتىرۋ ءۇشىن كۇش-جىگەر جۇمىلدىرۋعا شاقىرامىز. تولىققاندى وڭىرلىك ۇيىم بولۋ ءۇشىن بىزگە كەڭەستى رەت-رەتىمەن، بىرتىندەپ ترانسفورماسيالاۋ قاجەت. ازياداعى ءوزارا ءىس-قيمىل جانە سەنىم شارالارى جونىندەگى كەڭەستى ينستيتۋسيونالدى تۇردە قالىپتاستىرۋ ءۇشىن بارلىق جاعداي جاسالعان، قۇقىقتىق بازاسى ازىرلەنگەن، ونىڭ تۇراقتى قۇرىلىمدارى جۇمىس ىستەپ جاتىر"، – دەدى توقايەۆ.