جامبىل وبلىسىنىڭ شۋ اۋدانىندا ەكى جارىم جاستاعى قىزدى زورلادى دەگەن ايىپپەن 25 جاستاعى جىگىت قاماۋعا الىندى دەپ حابارلايدى Qamshy.kz اقپارات اگەنتتىگى كتك ارناسىنا سىلتەمە بەرە وتىرىپ.

ءجابىر كورگەن ءبۇلدىرشىن ءقازىر اۋرۋحانادا جاتىر. دارىگەرلەردىڭ ايتۋىنشا، اۋىر حالدە تۇسكەن ناۋقاستىڭ بەتى بەرى قاراعان. جانتۇرشىگەرلىك وقيعانى وبلىستىق سوت راستادى.  ال پوليسيا ازىرگە قانداي دا ءبىر مالىمەت بەرگەن جوق.

جاعا ۇستاتاتىن جاعداي شۋ قالاسىنا قاراستى قانت زاۋىتى اۋدانىندا بولعان. ءجابىر كورگەن قىزدىڭ اتا-اناسى تىلشىلەرمەن تىلدەسكىسى كەلمەدى. ال اۋىل تۇرعىندارىنىڭ ايتۋىنشا، كۇدىكتى ارام نيەتىن تاپا – تال تۇستە ىسكە اسىرعان. 

ايتۋعا اۋىز بارمايتىن وقيعا مىنا ۇيدە بولعان.

كورشىلەردىڭ ايتۋىنشا، اۋلادا ويناپ جۇرگەن جاسى ۇشكە دە تولماعان قىز بالانى 24-جاستاعى ازامات ۇيىنە كىرگىزىپ، ويىنا كەلگەنىن ىستەگەن. ونىڭ جانۇشىرا شىققان داۋىسىن ەستىگەن كۋاگەرلەر، كومەك  شاقىرىپتى. سول ساتتە ءبۇلدىرشىننىڭ اكەسى ءبىر توپ اداممەن كەلىپ، باسپانانىڭ ەسىگىن بۇزىپ، ىشكە ەنگەن. الايدا، كۇدىكتى تەرەزەدەن قارعىپ، قاشىپ كەتكەن.

ءبىراق ول الىسقا كەتە الماپتى. وقيعانى كورگەندەردىڭ ايتۋىنشا، ونىڭ ىزىنە تۇسكەن ءبىر توپ جىگىت كوپ ۇزاتپاي قولعا تۇسىرەدى، ءسويتىپ، كۇدىكتىنى پوليسەيلەر كەلگەنشە بايلاپ ۇستاعان. كورشىلەر 25 جاستاعى بويداق ازاماتتى جاقسى تانىمايتىن بولىپ شىقتى. سەبەبى ول اناسى ەكەۋى ءبىر اي بۇرىن عانا كوشىپ كەلگەن. ءقازىر ونىڭ ۇيىندە ەشكىم جوق. قالا تۇرعىنى ساۋلە جەكىبايەۆا قىلمىس ورنىن كورگەندەرىدىڭ ءبىرى.

ساۋلە جەكىبايەۆا، شۋ قالاسىنىڭ تۇرعىنى:

"مەن ءوز كوزىممەن كوردىم ديۆاندى. دالەل بەتىندە تۇر. قاننىڭ ءبارىن كوردىك، انىقتاۋشىلار ءبارىن بىزگە قول قويعىزىپ الدى. ءبارىن كوردىڭدەر عوي انىق زورلىق بولدى"،- دەدى.

وسى وقيعادان سوڭ كەيبىرى تۇرعىندار ۇيىمىزدەن شىعۋعا قورقىپ قالدىق دەيدى. وعان نەگىز دە جوق ەمەس. سەبەبى ەل اراسىندا كۇدىكتى جابىرلەنۋشىگە «ازعىندىق جاساماعان» دەگەن قاۋەسەت تاراپتى. سافيات نىسانبايەۆا، شۋ قالاسىنىڭ تۇرعىنى:

"مەن قورىققانىمنان ەكىنشى كۇن جۇمىسقا شىقپاي وتىرمىن. ون جاستاعى قىزىم بار. ال ەرتەڭ ول جىگىتتى بوساتىپ جىبەرسە قايدا بارامىن مەن."،- دەپ شاعىمدانادى.

ءولىم اۋزىنان قالعان ءبۇلدىرشىن اۋداندىق اۋرۋحانادا جاتىر. العاشىندا ونىڭ ءحالى وتە اۋىر بولعان. ءقازىر بەتى بەرى قاراپتى. ءبىراق دارىگەرلەر ونىڭ دەنساۋلىعىنا قاتىستى تىلشىلەرگە تولىق ماعلۇمات بەرمەدى.

- ءبۇلدىرشىن قانداي جاراقات العان؟

- ونى ايتا المايمىن

- كىشكەنتاي ءبۇلدىرشىن قانداي جاراقات العان، ازعىندىقتىڭ بەلگىلەرى بار ما؟

- مەن ەشتەمە ايتا المايمىن. مەندە اتا-اناسىنىڭ ماعان جازعان ارىزى بار، ەشقانداي باق-نا ەشقانداي اقپارات بەرمەيمىن.

وبلىستىق پوليسيا دەپارتامەنتى بۇل دەرەككە قاتىستى رەسمي اقپارات بەرمەي وتىر. ءبىراق اۋداندا اۋىر قىلمىستىڭ بولعانىن، ءارى كۇدىكتىنىڭ قاماۋعا الىنعانىن وبلىستىق سوت راستادى.

دينارا قىدىرالييەۆا، جامبىل وبلىستىق سوتى اقپاراتپەن قامتاماسىز ەتۋ ءبولىمىنىڭ باسشىسى:

"شۋ اۋداندىق سوتىنىڭ 19-شى ماۋسىم كۇنى شىققان قاۋلىسىنا سايكەس، ايىپتالۋشىعا تامىز ايىنا دەيىن سانكسيا بەرىلگەن. ايىپتالۋشىعا ق ر قىلمىستىق كودەكستىڭ 120 بابى، 4 بولىگى بويىنشا ايىپ تاعىلعان. ياعني زورلاۋ، كورنەۋ جاس بالاعا قاتىستى جاساعان قىلمىس."،- دەيدى.

بىزگە بەلگىلى بولعانىنداي، كۇدىكتى بۇعان دەيىن ءىستى بولماپتى. ول ءقازىر ۋاقىتشا ۇستاۋ اباقتىسىندا جاتىر.