ىشكى ىستەر ءمينيسترى ەرلان تۇرعىمبايەۆ كۇن سايىن 15 ساعات جۇمىس ىستەيتىنىن مالىمدەدى دەپ حابارلايدى Qamshy.kz اقپارات اگەنتتىگى Tengrinews.kz cايتىنا سىلتەمە جاساپ. 

ءمينيستردىڭ حالىققا ەسەپ بەرۋ كەزدەسۋىندە زالدا وتىرعان جاستاردىڭ ءبىرى ءىىم باسشىسىنا "پوليسەيلەردىڭ جۇمىس ۋاقىتىن بەلگىلەۋ قايتا قاراستىرىلا ما؟" دەگەن سۇراق قويدى. ونىڭ ايتۋىنشا، ءقازىر ءتارتىپ ساقشىلارى بەلگىلەنگەن 8 ساعاتتىق جۇمىستىڭ ورنىنا، كۇنىنە 14-15 ساعات جۇمىس ىستەۋدە. سونىمەن قاتار، ول بولاشاقتا پوليسيا قىزمەتكەرى بولىپ جۇمىس ىستەگىسى كەلەتىنىن جەتكىزدى. 

"ەگەر شىنىدىعىن ايتار بولساق، زاڭ بويىنشا 8 ساعات جۇمىس ىستەۋ كەرەك. مەن جۇمىسقا تاڭەرتەڭ 7.30-دا كەلىپ، تۇنگى 10-دا قايتامىن. ويتكەنى مەن ءمينيسترمىن. ءقازىر جۇمىس وتە كوپ، قىلمىستارمەن كۇرەسۋىمىز كەرەك. سول سەبەپتى، مەن 8 ساعاتتى سىلتاۋراتىپ جۇمىستان ەرتە كەتىپ قالسام، قىلمىسكەرلەرمەن كىم كۇرەسەدى؟ ەگەر وسى سالادا جۇمىس ىستەگىڭ كەلسە، ءوزىڭ ويلان"، - دەپ جاۋاپ بەردى ەرلان تۇرعىمبايەۆ.