ارىستاعى تۇرعىندارعا ازىق-تۇلىك جەتپەي جاتىر دەپ جازادى Qamshy.kz اقپارات اگەنتتىگى. بۇل تۋرالى ازيزا وتەگەنوۆا ءوزىنىڭ فەيسبۋك پاراقشاسىندا حابارلادى. 

–تۇرعىندار بۇعان لايىق ەمەس ەدى. تۇرعىندار كىر-كىر كيىممەن ءجۇر، ازىق-تۇلىك جەتىسپەي جاتىر. مەنىڭ كوزىمشە ءبىر وتباسىنا تاڭعى اسقا 2 ءتۇيىر نان عانا بەردى. تاماق بەرىلدى، ءبىراق وتە از. تەز ءبىتىپ قالدى. بارلىعىنىڭ قاباعى قاتىڭقى، اشۋلى. كوپ بالالى وتباسىلاردىڭ سانى كوپ. ءۇش كۇن بويى كىر-كىر كورپەشەلەردە مەشىتتىڭ جانىندا تۇنەپ ءجۇر. تۇرعىندار وزدەرىنە ادامشا جاعداي جاسالعانىن قالايدى. تاماق تا، كيىم-كەشەك تە سۇراپ جاتقان جوق. مەن مۇنى كورىپ، شىداي المادىم، - دەپ جازدى ازيزا وتەگەنوۆا. 

سونىمەن قاتار، ازيزا وتەگەنوۆا كوپ بالالى 1 اي پاتەر جالداپ تۇرۋعا كومەكتەسەتىنىن ايتتى. 

ايتا كەتسەك، "ارىستاعى جارىلىستىڭ كەسىرىنەن 3 ادام قايتىس بولدى" دەگەن رەسمي دەرەك بار. الايدا ارىس قالاسىنىڭ تۇرعىندارى مۇنىمەن كەلىسپەيدى. تۇرعىندار جارىلىستىڭ كەسىرىنەن 3 ەمەس، ودان دا كوپ ادامنىڭ ءولىپ جاتقانىن كورگەن. بۇل تۋرالى قالا تۇرعىندارى ازاتتىق راديوسىنىڭ جۋرناليستەرىنە بەرگەن سۇحباتىندا ايتقان. 

–ادامدار جولدا ءولىپ جاتتى. بالالارىم دا كوردى. مۇنى ءبىراق ەشبىرى ايتىپ جاتقان جوق. ءبىز ءىش كيىممەن، جالاڭ اياق قاشتىق. ءبىز دالادا قالدىق. ءۇيىمىزدى كوردىك. ءۇيىمىز جارىلدى. باسپاناسىز قالدىق، - دەيدى جارىلىستان زارداپ شەككەن تۇرعىندار.