كەزەكتەن تىس پرەزيدەنت سايلاۋىنان كەيىن دە، جاڭا پرەزيدەنتتى ۇلىقتاۋ راسىمىنەن كەيىن دە تەڭگەنىڭ ديەۆالۆاسياسى ورىن الا قويمادى. ءبىراق سايلاۋعا دەيىن ۇلتتىق ۆاليۋتانىڭ قۇلدىراۋى تۋرالى ءقاۋىپ بولجامدار، الىپقاشپا اڭگىمەلەر كوبەيگەن ەدى.

بۇگىنگى ۆاليۋتا باعامىنا نازار سالساق، 2019 جىلدىڭ 27-ماۋسىمىنداعى رەسەيلىك ۆاليۋتا قۇنى – 5،96 تەڭگە. وسىعان دەيىن 12-14 ماۋسىم كۇندەرى رۋبل قۇنى 5،95 تەڭگەگە دەيىن كوتەرىلىپ، قارجى ماماندارىنىڭ تاڭدانىسىن تۋعىزعان. بۇل كورسەتكىش – ەشكىم بولجاي قويماعان قىمباتشىلىق. 2018 جىلدىڭ قورىتىندىسى بويىنشا، 1 رۋبل 5،5 تەڭگە بولعان. ال ءتورتىنشى كۆارتالدىڭ ناتيجەسىندە 5،56 تەڭگەگە باعالاندى.

ۇستىمىزدەگى جىلدىڭ باسىنان بەرى رەسەيلىك ۆاليۋتانىڭ تەڭگەگە شاققانداعى قۇنى اسپانداپ كەتتى. 2019 جىلدىڭ ءى كۆارتالىندا رۋبل قۇنى 5،72 تەڭگە، ال ءساۋىر ايىندا 5،87 تەڭگە بولدى. مامىر ايىندا عانا ساراپشىلاردىڭ جىل باسىنداعى ءقاۋپى ايقىندالا باستاعانداي بولدى. وتكەن ايدىڭ قورىتىندىسىندا 1 ءرۋبلدىڭ قۇنى 5،86 تەڭگەگە باعالانىپ، ەشكىم ويلاماعان دارەجەدە كوتەرىلىپ كەتتى.

"ساعات ءتىلىن" ارتقا اينالدىرساق... بۇل ءرۋبلدىڭ رەكوردتى ءوسىمى مە؟

رەسەيلىك ۆاليۋتانىڭ قىمباتتاۋىنداعى رەكوردتىق كورسەتكىش ەكى جىل بۇرىن تىركەلگەن. 2017 جىلدىڭ 26-قىركۇيەگىندە رۋبل قۇنى 5،96 تەڭگەگە باعالانىپ، ارتىنشا اتالعان ۆاليۋتا قاتتى قۇلدىراعان. ءبىراق اراعا كوپ ۋاقىت سالماي، سول جىلدىڭ 5-قازانىندا باعا 5،95 تەڭگەگە دەيىن قايتا ءوستى.

رەكورد!

2017 جىلدىڭ 6-قازانىندا تاريحي رەكوردتى كورسەتكىش تىركەلدى. 1 رۋبل – 6 تەڭگە. بۇل – باعانىڭ شارىقتاۋ شەگى ەدى. وسىدان كەيىن ءبىرشاما ۋاقىت تۇراقتىلىعىن ساقتاعان رەسەيلىك ۆاليۋتانىڭ قۇنى قايتا ارزانداي باستاعان.

رۋبل نەگە قىمباتتايدى؟

تەڭگەنىڭ السىرەۋىنە قاتىستى ايتىلاتىن باستى سىلتاۋ دا، نەگىزگى سەبەپ تە – وزگە ۆاليۋتالارعا سۇرانىستىڭ ارتۋى. اسىرەسە، جاز ايلارىندا ۇزاق مەرزىمگە دەمالىس العان وتانداستارىمىز شەتەلدە دەمالۋ ءۇشىن ۆاليۋتا ايىرباستاۋ پۋنكتىنە كوپ بارادى-مىس.

ۇلتتىق بانكتىڭ مالىمەتىنە سۇيەنسەك، ءساۋىر ايىندا قازاقستاندىقتار رەسەيلىك ۆاليۋتانى ساتىپ الۋ ءۇشىن 52،3 ميلليارد تەڭگە جۇمساعان. بۇل سۋمما ءرۋبلدى ساتۋدان تۇسكەن قارجىعا قاراعاندا، الدەقايدا جوعارى. بۇل جىل باسىنان بەرگى ماكسيمالدى كورسەتكىش.

ال ءرۋبلدىڭ تەڭگەمەن سالىستىرعانداعى الەۋەتىن بايقاساق تا، بۇل ۆاليۋتانىڭ حالىقارالىق نارىقتاعى جاعدايى اسا ءماز ەمەس. قازىرگى ۋاقىتتا ساراپشىلار رەسەي فەدەراسياسىنا ەكونوميكاسى جەتەكشى ەلدەردىڭ تاراپىنان تونەتىن سانكسيالار ناتيجەسىندە رەسەيلىك ءرۋبلدىڭ قۇلدىراۋ ءقاۋپى تۋرالى بولجامدار كوپ ايتىلىپ ءجۇر. ءبىراق سوڭعى ۋاقىتتاردا بولجامداردىڭ ورىن الۋ تاعدىرى بۇلىڭعىرلاۋ بولىپ كەتتى. ويتكەنى، اقش-تىڭ قىتايعا ساۋدا سوعىسىن جاريالاۋدان قولى بوساپ جاتقان جوق. سونىمەن قاتار، يران مەن ۆەنەسۋەلاعا سانكسيالىق قىسىم كورسەتۋى تاعى بار. وسىلايشا، رەسەيدەگى قاۋىرت ەمەس ماسەلەلەر كۇن تارتىبىنەن ءتۇسىپ قالىپ وتىر.

ەگەر اقش-تىڭ رەسەيگە باعىتتالاتىن سانكسيالارى ءوز كۇشىنە ەنەر بولسا، بۇل ۇلتتىق ۆاليۋتانىڭ نىعايا تۇسۋىنە سەبەپ بولماق. بۇلاي دەۋىمىزگە ءبىر نەگىز – قازىرگى ۋاقىتتاعى دوللاردىڭ قۇلدىراۋ كەزەڭىندە تۇرعاندىعى.

دونالد ترامپتىڭ جۇرگىزىپ وتىرعان ساياساتىن باعامدار بولساق، ول دوللاردى ايتارلىقتاي قۇلدىراتۋدى تاپسىرىپ وتىر. ويتكەنى، ونىڭ حالىقارالىق ساياسي ارەناداعى باستى قارۋى – قارجىلىق-نەسيەلىك "سوعىس اشۋ". دوللاردىڭ جەدەل قۇلدىراۋىنان كەيىنگى مۇناي باعاسى تۇراقتىلىققا ۇيرەنە باستادى. ءبىراق... ءبىراق پارسى شىعاناعىنداعى تانكەرگە جاسالعان شابۋىلدان كەيىن ساراپشىلار دوللار قۇنى رەكوردتى دەڭگەيگە كوتەرىلەدى دەپ بولجاپ وتىر. ال وسىنداي دۇنيەجۇزىلىك جاعدايلاردان كەيىن مۇنى رۋبل ءوز پايداسىنا پايدالانىپ، كۇشىن ارتتىرا ءتۇستى.

دوللار ءوز كۇشىنە ەندى. الداعى ۋاقىتتا رەكوردتىق دارەجەگە كوتەرىلە مە؟

ال ەلىمىزدەگى  جاعدايعا كوز سالساق، دوللاردىڭ حالىقارالىق نارىقتا السىرەۋى قازاقستانعا اسەر ەتە قويماعان سەكىلدى. كەرىسىنشە. دوللار ءوز قاھارىنا ءمىنىپ، رەكوردتى كورسەتكىشىنە تاياپ كەلەدى. ماۋسىم ايىنا دەيىنگى 1 دوللار قۇنى 384،2 تەڭگەدەن اسپاعان-دى. ال سوڭعى 10-15 كۇن ىشىندە بۇل كورسەتكىش ءۇش رەت بۇزىلدى.

5-ماۋسىم دوللار كۋرسى – 384،21 تەڭگە؛

7-ماۋسىم دوللار كۋرسى – 384،53 تەڭگە؛

14-ماۋسىم دوللار كۋرسى – 384،51 تەڭگە؛

ال بۇگىنگى ۆاليۋتا باعامىنا نازار سالساق، 1 دوللاردىڭ قۇنى 383،43 تەڭگەنى قۇراعان.

ەۋرونىڭ ءحالى نەشىك؟

قازاقستانداعى ەۋرونىڭ جايىنا كوز سالساق، بۇل جاقتاعى احۋالدىڭ رەكوردتىق كورسەتكىشكە جەتەتىن ءتۇرى جوق. بۇگىنگى ۆاليۋتا باعامىندا ەۋرو قۇنى 429،83 (ورتا باعا 434 تەڭگە).

ەۋرونىڭ تاريحي رەكوردتىق كورسەتكىشى – 441،69 تەڭگە. بۇل كورسەتكىشكە سالماقتى ۆاليۋتا 2018 جىلدىڭ 12-قىركۇيەگىندە قول جەتكىزگەن.