«ادىرنا» ۇلتتىق-ەتنوگرافيالىق بىرلەستىگى» قوعامدىق قورى ق ر اقپارات جانە قوعامدىق دامۋ مينيسترلىگى قولداۋىمەن «ازاماتتىق باستامالاردى قولداۋ ورتالىعى» كەاق-نىڭ مەملەكەتتىك گرانتى اياسىندا «تۋعان جەر» اتتى جاستاردىڭ پاتريوتتىق شىعارماشىلىعىن دامىتۋعا باعىتتالعان الەۋمەتتىك جوبانى جۇزەگە اسىرۋعا كىرىستى.

جوبانىڭ ماقساتى – جاستاردى تۋعان جەرىنىڭ پاتريوتى بولۋعا باۋلىپ، وعان كىرشىكسىز قىزمەت ەتۋگە شاقىرۋ. جوبا اياسىندا «ادىرنا» ۇيىمى رەسپۋبليكالىق دەڭگەيدە ۇزدىك ماقالا (ەسسە، اڭگىمە)، ۇزدىك پوەزيا، ۇزدىك بەينەلەۋ ونەرى بويىنشا شىعارماشىلىق بايقاۋلار وتكىزەدى. «ۇزدىك ماقالا» نوميناسياسى بويىنشا جاستار اراسىندا ۇزدىك ەسسەگە، اڭگىمەگە، «ۇزدىك پوەزيا» نوميناسياسى بويىنشا جاستار اراسىندا ۇزدىك ولەڭگە، «ۇزدىك بەينەلەۋ ونەرى» نوميناسياسى بويىنشا جاستار اراسىندا ۇزدىك سۋرەتكە، بەينەگە، «ۇزدىك ونەرتابىس» نوميناسياسى بويىنشا جاستار اراسىندا ۇزدىك عىلىمي، تۇرمىستىق جانە ت.ب. ونەرتابىسقا بايقاۋ جاريالانادى. بايقاۋعا قازاقستان رەسپۋبليكاسىنىڭ 14 بەن 29 جاس ارالىعىنداعى جاستارى قاتىسادى. قورىتىندى ماراپاتتاۋ اعىمداعى جىلدىڭ قىركۇيەك ايىنا جوسپارلانىپ وتىر. بارلىق شىعارماشىلىق جۇمىستار «ادىرنا» ۇلتتىق پورتالىنىڭ «تۋعان جەر» ايدارىنا جاريالانادى.

سونىمەن بىرگە قازاقستان حالقى اسسامبلەياسىمەن بىرلەسىپ، سولتۇستىك قازاقستان، پاۆلودار، قوستاناي جانە اقمولا وبلىستارىنداعى وزگە ۇلت وكىلدەرى اراسىندا «تۋعان جەرىم – قازاقستانىم» اتتى پوەزيالىق بايقاۋ ۇيىمداستىرادى.

جەڭىمپازداردى اقىنداردان، جازۋشىلاردان، سۋرەتشىلەردەن، كاسىپكەرلەردەن، جۋرناليستەردەن، قوعام قايراتكەرلەرىنەن جاساقتالعان قازىلار القاسى انىقتايدى. بارلىق بايقاۋلاردىڭ جەڭىمپازدارى ارنايى سىيلىقتارمەن جانە العىس حاتتارمەن ماراپاتتالادى.

جوبانى جۇزەگە اسىرۋ 2019 جىلدىڭ ءساۋىر-قاراشا ايلارى ارالىعىندا وتەدى. ال بايقاۋدىڭ ەرەجەلەرى الداعى كۇندەرى الەۋمەتتىك جەلىلەر مەن ينتەرنەت-رەسۋرستاردا ەگجەي-تەگجەيلى جازىلادى.