شىعىستىڭ اۋىلدارى رۋحاني جاڭعىرىپ جاتىر. بىرىنەن-بىرى ەستافەتا العانداي اۋىل كۇنىن ۇيىمداستىرىپ، اتا ءداستۇرىمىز بەن اسىل مۇرالارىمىزدى جارىسا ناسيحاتتاۋدا. بۇعان دەيىن كۇرشىم اۋدانىنىڭ وزىندە عانا العاباس، قايىڭدى، مارالدى سەكىلدى ءبىرقاتار اۋىلدا اتالىپ وتكەن ءدۇبىرلى توي بۇل جولى تەرەكتىبۇلاق اۋىلىندا جالعاسىن تاپتى دەپ حابارلايدى Qamshy.kz اقپارات اگەنتتىگى. 

اۋەلى تويعا دايىندىق بارىسىندا بۇكىل جۇرت جينالىپ، تۋعان اۋىلدارىن اباتتاندىرۋعا ءبىر كىسىدەي اتسالىسقان. ەلدى مەكەندەگى ۇيلەر اكتەلىپ، قاشالار سىرلاندى. كوشە جولدارى جوندەلىپ، تازالىق جۇمىستارى جۇرگىزىلدى. اۋىلداعى مادەنيەت وشاعى – كلۋب جوندەۋدەن ءوتىپ، وسى عيماراتتىڭ اۋلاسىندا تۇرعان باراق باتىردىڭ ەسكەرتكىشكە ەرەكشە قامقورلىق جاسالعان.  

اۋىل كۇنىنە ارنالعان تويعا وسى ولكەنىڭ تۋمالارى، بۇگىندە ەلىمىزدىڭ ءار تۇكپىرىندە تۇرىپ جاتقان ەسىمى ەلگە تانىس ادامدار دا كەلدى. سولاردىڭ ىشىندە نۇر-سۇلتان قالاسىنان ارنايى ات شالدىرعان «ەگەمەن قازاقستان» گازەتىنىڭ سۋرەتشىسى ايداربەك عازيزوۆ باستاعان مارقاسقالار بولدى. سالتاناتتى جيىندا اۋدان اكىمى دۋلات قاجانوۆتىڭ قۇتتىقتاۋ حاتى وقىلىپ، كەلگەن قوناقتار ىشىنەن ءبىرقاتارى ىزگى تىلەكتەرىن جەتكىزدى. بۇدان كەيىن وسى ءوڭىردىڭ ءتول تۋماسى كوكجارلى كوكجال باراق باتىر باستاعان مارقۇم بابالاردىڭ رۋحىنا قۇران باعىشتالىپ، اس بەرىلدى. بۇل كۇنى ۇلتتىق ونەرىمىز بەن ۇلتتىق سپورتىمىزدىڭ ءباسى بيىك تۇردى. اسىرەسە، ات سۇيەر قاۋىمنىڭ دەلەبەسىن قوزدىرعان بايگە دە، سپورت جانكۇيەرلەرىن قىزىقتىرعان ءتۇرلى سايىس تا كوپشىلىكتىڭ كوڭىلىنەن شىقتى. قاس قارايا جاڭارعان كلۋبتا ونەرپازداردىڭ كونسەرتى باستالىپ، ونىڭ سوڭى بي كەشى مەن ءتۇرلى مادەني شاراعا ۇلاستى.  

ايتا كەتۋ كەرەك، «اۋىل كۇنى» دەگەن اتپەن وتكىزىلىپ جاتقان بۇل مەرەكەگە بيۋدجەتتەن كوك تيىن دا بولىنبەيدى. بارلىق شىعىن اۋىل تۋمالارىنىڭ جانە دەمەۋشىلەردىڭ قالتاسىنان شىعارىلىپ وتىر. ياعني، ەلدىڭ شەتىندە، جەلدىڭ وتىندە ءومىر ءسۇرىپ جاتقان اعايىندار ەلباسىنىڭ «رۋحاني جاڭعىرۋ» باعدارلاماسىندا ايتىلعان مىندەتتەردى جۇزەگە اسىرۋعا ءوز ۇلەستەرىن قوسىپ جاتىر دەۋگە تولىق نەگىز بار. ەڭ باستىسى مۇنداي مەرەكە ەلدىڭ اۋىزبىرشىلىگىن نىعايتىپ، بەرەكەسىن ارتتىرا تۇسپەسە كەمىمەيتىنى انىق.