شىعىس قازاقستان وبلىسىنىڭ زايسان اۋدانىندا «دومبىرا – داستان» اتتى مەرەكەلىك كونسەرت پەن «التىباقان» ويىن-ساۋىق كەشى ءوتتى. «رۋحاني جاڭعىرۋ» باعدارلاماسى اياسىندا قولعا الىنعان بۇل مەرەكەلىك شارا «ۇلتتىق دومبىرا» كۇنىنە وراي ۇيىمداستىرىلدى دەپ حابارلايدى Qamshy.kz اقپارات اگەنتتىگى.
ەستەرىڭىزدە بولسا، شىلدە ايىنىڭ العاشقى جەكسەنبىسى ەلىمىزدە «ۇلتتىق دومبىرا» كۇنى رەتىندە بەلگىلەنگەن بولاتىن. سودان بەرى رەسپۋبليكا كولەمىندە دومبىرا كۇنى تويلانىپ كەلەدى. يگى ءداستۇر زايساندا بيىل دا ءوز جالعاسىن تاپتى.
«اباي» ساياباعىندا شىمىلدىعى تۇرىلگەن مەرەكەلىك شارادا ۇلتتىق ونەرىمىزدىڭ مەرەيى تاسىپ، مارتەبەسى اسقاقتادى. جينالعان جۇرت ۇلت اسپاپتار وركەسترىنىڭ سۇيەمەلدەۋىمەن كۇمبىرلەگەن كۇي مەن اۋەلەگەن ءان تىڭداپ، ۇلتتىق كيىم كيگەن قىزداردىڭ مىڭ بۇرالا بيلەگەن ءبيىن سۇيسىنە تاماشالادى. بۇل كۇنى قازاقتىڭ قارا دومبىراسىنا ىقىلاس تانىتقاندار ەرەكشە كوپ بولدى. شىرقالعان ءان-جىردىڭ دەنى وسى ءبىر قاسيەتتى اسپاپتىڭ سۇيەمەلدەۋىمەن ورىندالىپ جاتتى.
– قازاقتىڭ قاسيەتتى دومبىراسى ارقىلى وتكەن تاريحىمىزدى، اسىل مۇرامىزدى وسكەلەڭ ۇرپاقتىڭ ساناسىنا تەرەڭ ءسىڭىرۋ ماقساتىندا وسىنداي مەرەكەلىك شارالاردى وتكىزۋدىڭ ماڭىزى زور. بۇگىنگى كەش حالىقتىڭ كوڭىلىنەن شىعىپ جاتىر. بالالارىن، نەمەرەلەرىن جەتەكتەپ كەلگەن ادامداردىڭ كوپتىگى قۋانتتى، – دەيدى زايسان اۋداندىق ىشكى ساياسات ءبولىمىنىڭ باسشىسى زۋمرات دۇيسەنبايەۆا.
وسى كۇنى ساياباقتا اۋىل شارۋاشىلىق ونىمدەرىنىڭ جارمەڭكەسى ءوتىپ، تويشىل قاۋىمعا باۋىرساق پەن قۇرت تاراتىلدى. مەرەكە قارساڭىندا دۇنيەگە كەلگەن سابيلەرگە دومبىرا سىيعا تارتىلدى.
سونىمەن قاتار ۇلتتىق سپورت تۇرلەرىنەن ءتۇرلى سايىس ۇيىمداستىرىلدى. قىز-جىگىتتەر التىباقان تەۋىپ، اقسۇيەك ويىنىن وينادى. ودان باسقا 25 كەلىلىك قاپتاعى ۇن مەن قانتتى كوتەرىپ سايىسقاندار مەرەكەنىڭ كورىگىن قىزدىرا ءتۇستى. ءبىر قىزىعى اتالعان سايىستا ەرلەردەن گورى ايەلدەر مىقتى بولىپ شىقتى. قاپتاعى قانت پەن ۇندى كوتەرۋدە نازىك جاندى ارۋلاردىڭ الدىنا تۇسكەن ەشكىم بولمادى راس. ءسويتىپ زايسانداعى مەرەكەلىك شارا بي كەشىمەن تۇيىندەلدى.
پىكىر قالدىرۋ