شىعىس قازاقستان وبلىسىنىڭ تارباعاتاي اۋدانىندا وسى وڭىردەگى تۇڭعىش اشىلعان بالالار تەاترى جۇمىس ىستەپ تۇر. ونى ءوزىنىڭ تۋعان جەرىندە كوپشىلىككە ەسىمى تانىس اكتەر، رەجيسسەر بەيبىت قۇسانبايەۆ اشىپ، جەتكىنشەكتەرگە بەكزات ونەردىڭ قىر-سىرىن ۇيرەتۋدە دەپ حابارلايدى . 

– نۇر-سۇلتان قالاسىندا ەڭبەك ەتكەن جاقسى ارينە، ءبىراق ەلدى، تۋعان جەردى ساعىنادى ەكەنسىز. ونىڭ ۇستىنە، جيعان-تەرگەن تاجىريبەمدى، ءبىلىمىمدى اۋىل بالالارىنا ارناپ، تۋعان ەلدەن  بالالار تەاترىن اشۋدى قالادىم. ءسويتىپ ەلدەگى اعايىنداردىڭ قولقالاۋىمەن تارباعاتاي اۋداندىق مادەنيەت ءۇيىنىڭ جانىنان «تامشى» بالالار تەاترىن اشىپ، جۇمىس ىستەپ جاتىرمىز. بالالاردان قۇرالعان توبىمىزبەن ءبىرقاتار ەرتەگى قويىپ، قايىرىمدىلىق كونسەرتتەر ۇيىمداستىرىپ ۇلگەردىك، – دەيدى بەيبىت قۇسانبايەۆ.  

ونىڭ ايتۋىنشا، «تامشى» تەاترى بۇل كۇندە 60-تان استام بالانىڭ باسىن قوسىپ وتىر. ەلىمىزدە العاشقى بولىپ وسى تەاتردا ەسترادالىق ۆوكال ۇيىرمەسى اشىلعان. ودان بولەك بالالاردان قۇرالعان حور بار. 

– بۇيىرتسا، بولاشاقتا ءبىزدىڭ تەاترىمىز وبلىس اۋداندارى اراسىنداعى ەڭ اۋقىمدى بالالار ۇجىمى بولادى. مۇنى ءالى ەشكىم دۇرىس تۇسىنە قويعان جوق. تۇسىنە بىلگەن ادامعا بالالار تەاترى – ۇلكەن رۋحاني ورتالىق، – دەيدى بەيبىتتىڭ ءوزى. 

استانانى اۋىلعا ايىرباستاپ، تۋعان جەرىن تۇلەتۋگە، اۋىلداعى قارادومالاقتاردى ونەرگە باۋلۋعا بەلىن بەكەم بۋعان بەيبىت قۇسانبايەۆتىڭ تارباعاتايدان «تاماشاداي» تەاتر اشۋىن رۋحاني جاڭعىرۋدىڭ جارقىن ۇلگىسى دەپ قابىلدادىق.