كانادانىڭ وتتاۆا قالاسىندا رەپرودۋكتولوگ دارىگەر بەرنارد نورمان بارۆين ونداعان جىل بويى بەدەۋ كەلىنشەكتەردى جاساندى ۇرىقتاندىرعاندا، باسقا ەر ادامنىڭ شاۋەتىن پايدالانعان دەپ جازادى Qamshy.kz اقپارات اگەنتتىگى Sputnik سايتىنا سىلتەمە جاساپ.
25 ماۋسىمدا مەديسينا ستاندارتىن باقىلاۋشى جانە ليسەنزيا بەرۋشى ونتاريو كوللەدجى ءبارۆيندى 10 مىڭ كانادا دوللارىن (3 ميلليون تەڭگەگە جۋىق) تولەۋگە مىندەتتەدى. سونداي-اق، مەديسينا سالاسىندا جۇمىس ىستەۋىنە تىيىم سالىپ، ليسەنزياسىنان ايىردى. 80 جاستاعى دارىگەر بۇل شەشىمگە قارسىلىق تانىتىپ، شاعىم تۇسىرگەن جوق، دەپ حابارلايدى CBC News پورتالى.
2013 جىلى دارىگەر ءۇش ايەلدى جاساندى ۇرىقتاندىرعاندا باسقا ەركەكتىڭ شاۋەتىن پايدالانعانى ءۇشىن جۇمىستان الاستاتىلدى. ول كەزدە بارۆين بۇل ارەكەتىن "شاتاستىرىپ الدىم" دەپ تۇسىندىرگەن ەدى.
ونىڭ دارىگەرلىك قىزمەتىندە وسىنداي جايت شامامەن 50-100 رەت قايتالانىپتى. 11 جاعدايدا بارۆين كەلىنشەكتەرگە ايتپاي، ءوزىنىڭ بيولوگيالىق ماتەريالىن پايدالانعان.
ەكو ارقىلى دۇنيەگە كەلگەن بالالاردىڭ ءبىرى ءوزىنىڭ اتا تەگىن بىلمەك بولعاندا عانا، دارىگەردىڭ استىرتىن ارەكەتى اشكەرە بولدى. سول كەزدە تاعى ءبىر بالادا گەنەتيكالىق جولمەن بەرىلەتىن دەرت انىقتالدى، ال ونىڭ اتا-اناسى مۇنداي اۋرۋمەن اۋىرمايدى ەكەن.
ەكو ارقىلى دۇنيەگە كەلگەندەردىڭ ءبىرى – 29 جاستاعى رەبەككا ديكسون ءۇش جىل بۇرىن تۋعان اكەسى بارۆين ەكەنىن ءبىلدى.
"ءبىر ساتتە ءومىرىم تۇبەگەيلى وزگەرىپ كەتتى. ءبىراز ۋاقىت ءوز-وزىمدى جات سەزىنىپ ءجۇردىم"، - دەيدى قىز.
ءقازىر ديكسون ءوزىنىڭ تۋعان اعا-باۋىرلارىن ىزدەپ جاتىر. ازىرگە 15 تۋىسىن تاۋىپتى، ءبىراق ولاردىڭ سانى بۇدان دا كوپ بولۋى مۇمكىن.
پىكىر قالدىرۋ