اقىن ءاسيا بەركەنوۆا قازاق مەكتەپتەرى جابىلايىن دەپ جاتىر دەگەن شۋلى اقپاراتقا قاتىستى ۇسىنىس جولداپ، ءوتىنىش ءبىلدىردى دەپ حابارلايدى Qamshy.kz اقپارات اگەنتتىگى tobolinfo.kz سايتىنا سىلتەمە جاساپ. 

قوستاناي قالاسىنىڭ ورتالىعىنداعى №24ا باستاۋىش مەكتەبىنىڭ توڭىرەگىندەگى داۋ-داماي تاۋسىلار ەمەس. ەستەرىڭىزدە بولسا، وسىدان ءبىر اپتا بۇرىن 24ا باستاۋىش مەكتەبى بورودين كوشەسىندە ورنالاسقان بۇرىنعى كاسىبي-تەحنيكالىق كوللەدجدىڭ عيماراتىنا كوشىرىلەدى دەگەندى ەستىپ، اتا-انالار نارازىلىق بىلدىرگەن بولاتىن. ولار قالا اكىمى قايرات احمەتوۆپەن كەزدەسىپ، وبلىس اكىمى مەن پرەزيدەنت قاسىم-جومارت توقايەۆتىڭ اتىنا پەتيسيا جازدى.

ال وسى جاعدايدان كەيىن  «قوستاناي قالاسىنداعى جالعىز مەكتەپ جابىلعالى جاتىر»  دەگەن اقپارات تاراعان بولاتىن. وسى جاعدايدى ىشتەن ءبىلىپ، باسى-قاسىندا جۇرگەن ايگىلى ايتىسكەر اقىن ءاسيا بەركەنوۆا ەل ازاماتتارىن سابىرعا، وسى ءجايتتىڭ اقيقاتىن بىرگە ىزدەۋگە شاقىردى. سونىمەن قاتار، قالاداعى 6 قازاق مەكتەبى مەن بيىل اشىلعالى جاتقان 7- قازاق تىلىندەگى مەكتەپتىڭ عيماراتىن ارالاپ، بار شىندىققا بىرگە كوز جەتكىزۋدى ۇسىندى.

"ەلدىڭ جاعدايىنا جانىڭ اشىپ، سونىڭ راس-وتىرىگىنە، اقيقاتىنا كوز جەتكىزگىڭىز كەلسە، ەلىمىزگە كەلىپ قالاداعى التى مەكتەپتى، اشىلايىن دەپ جاتقان جەتىنشى مەكتەپتىڭ عيماراتىمەن تانىس بولۋدى ۇسىنار ەدىم.  ەشكىمگە بولىسىپ، بيلىككە باس ۇرايىن دەپ جاتقانىم جوق. دەگەنمەن دە اركىم ءوزىنىڭ كورگىسى كەلەتىنىن كورەدى، ىزدەگەنىن كورەدى"، - دەدى ءاسيا بەركەنوۆا.