"ايتىس" دەسە، ەڭ الدىمەن اۋىزعا ءجۇرسىن ەرماننىڭ اتى كەلەدى. قازاقتىڭ ءتول ونەرى ايتىستى سوناۋ 1984 جىلدان جاڭارتىپ-جاڭعىرتىپ، حالىق اراسىندا كەڭىنەن ناسيحاتتاپ، پوەزيا تۇلپارلارىن باپتاپ، بايگەگە قوسىپ جۇرگەن "ايتىس اتاسى" ءجۇرسىن ەرمان Stan.kz سايتىنا بەرگەن سۇحباتىندا دۇرىس جولدان بۇرا تارتقان اقىندار تۋرالى ايتىپ بەردى دەپ جازادى Qamshy.kz اقپارات اگەنتتىگى.

ونىڭ ايتۋىنشا، ول ەشبىر اقىندى ايتىستان ءبولىپ-جارىپ، شەتتەتىپ كورمەگەن. تەك قانا بارىنشا شاقىرىپ، ايتىستاعى اۋىزبىرشىلىكتى، ءتول ونەردىڭ قاسيەتىن، ساپاسىن ساقتاپ قالعىسى كەلەدى.

جۋرناليست اقىندار ءوزارا ءدىن ماسەلەسى نەمەسە باسقا دا ماسەلەلەر بويىنشا ءبولىنىپ جۇرگەنىنىڭ سەبەبىن سۇراعاندا، ءجۇرسىن ەرمان اشىق جاۋاپ بەردى.

"كەلىسىم دە، بىرلىك تە جوق. ايتىس اقىندارىنىڭ وداعىندا جاقىندا عانا ەكىنشى قۇرىلتاي وتكىزدىك. بارلىق وڭىرلەردەن، وبلىس، اۋدانداردان 150-دەن اسا ايتىسكەر اقىندار كەلدى. سوعان قوسىلماي، ءوز بەتتەرىنشە جۇرگەن اقىندار بار. اتتارىن ايتا الامىن. بالعىنبەك يماشيەۆ، اينۇر تۇرسىنبايەۆ، جانداربەك بۇلعاقوۆ سەكىلدى اقىندار بولەك جۇرەدى، بولەك جايلادى. ولارعا نە ايتا الامىز؟ بىرلىككە شاقىرامىز، ايتىسقا قاتىسۋعا شاقىرامىز"، - دەدى ول.

سونداي-اق، وسىنداي سۇحباتتارىندا ءدىن تۋرالى اڭگىمە قوزعاعانى ءۇشىن بالعىنبەك يماش ونى سوتقا بەرمەك بولعانىن دا جاسىرمادى.

"جاقىندا مەنىڭ بەس تومدىق شىعارمالار جيناعىم جارىق كوردى. سونىڭ تۇساۋكەسەرىندە بالعىنبەك، جانداربەك، سىرىم كەلىپ، ەندى ءسىزدىڭ اينالاڭىزداعى اقىنداردىڭ ىشىندە بولامىز دەپ قول الىپ كەلگەن ەدى. سول تۇستا ولار ءدىن جولىمەن بولەك كەتىپ قالدى دەگەن مەنىڭ سۇحباتىم  شىقتى. سودان بالعىنبەك يماشيەۆ حابارلاسىپ، "مەن ءدىن جولىمەن كەتكەم جوق. ءسىز ماعان جالا جاۋىپ وتىرسىز. مەن ءسىزدى سوتقا بەرەمىن" دەدى. قاشان سوتقا شاقىرادى ەكەن دەپ توسىپ ءجۇرمىن. مەن ونى ودان كەيىن دە ايتىسقا شاقىردىم. كەلمەي قويدى"، - دەدى ول تۋراسىنان تارتىپ.

سونىمەن قاتار، ءجۇرسىن ەرمان ىشكىلىككە سالىنىپ، تالانتىن تۇل ەتكەن ايان سەيىتوۆ تۋراسىندا دا پىكىر ءبىلدىردى.

"ءوزىم قاتتى جاقسى كورەتىن اقتوبەلىك اقىن ايان سەيىتوۆ. ۇلكەن ايتىسكەر اقىن كەلىپ قالدى دەپ قۋانۋشى ەدىم. ءۇش رەت ايتىسقا كەلىپ تۇرىپ قاتىسپاي كەتىپ قالدى. ءتورتىنشى رەت شاقىرمادىم. ساحناعا شىعۋعا شاماسى كەلمەيتىن اقىندى قالاي شاقىرامىن. وكىنىشتى. ماعان ۇيگە كەلىپ، جاينامازدى الىپ، حارامنان ارىلدىم ساحناعا شىعارىڭىز دەپ ناماز دا وقىپ كورسەتتى. دەگەنمەن، ودان كەيىنگى ايتىستا دا وپا بەرگەن جوق"، - دەپ ءتۇيدى ءسوزىن ايتىس جاناشىرى، اقىن ءجۇرسىن ەرمان.