لوندونداعى سازارك اۋدانىندا ايسۇلتان نازاربايەۆتىڭ ىسىنە قاتىستى الدىن الا تىڭداۋ وتكەن بولاتىن. وعان ەسىركى قولدانعان كۇيدە، پوليسيا قىزمەتكەرىنە قارسىلىق تانىتقان، ۇرىپ جانە تىستەپ العان دەگەن ايىپ تاعىلعان. 28 جاستاعى نۇرسۇلتان نازاربايەۆتىڭ جيەن نەمەرەسىنە قاتىستى سوت وتىرىسى اشىق تۇردە وتۋدە دەپ جازادى Qamshy.kz اقپارات اگەنتتىگى bbc.com سايتىنىڭ دەرەگىن نەگىزگە الىپ.
سوت وتىرىسى كەزىندە ايسۇلتان نازاربايەۆ وزىنە قويىلعان سۇراقتارعا جاۋاپ بەرمەي، ءۇنسىز وتىردى. ايىپتاۋشى گرەگور ماككينلي 3 ماۋسىمدا ايسۇلتان نازاربايەۆ لوندون ورتالىعىندا ورنالاسقان قوناق ۇيلەردىڭ بىرىندە جانجال شىعارعانىن ايتتى. ول بالكونعا شىعىپ، وز-وزىنە قول جۇمسايتىنىن ايتىپ، ايعايلاعان.
سونداي-اق وسىنداي جاعداي 5 ماۋسىمدا تاعى دا قايتالانعان. بۇل جولى كورشىلەرى پوليسيا شاقىرىپتى. ماككينليدىڭ ايتۋى بويىنشا، ايسۇلتان نازاربايەۆ ءوزىن وتە دورەكى ۇستاعان جانە جانىنداعى ادامداردى قورقىتىپ، وزىنە قول جۇمسايتىنىن ايتقان. سونداي-اق كەزەكشى پوليسيا قىزمەتكەرى روسسا سامبرۋكتىڭ كەۋدەسىنەن ۇرىپ، سول قولىن تىستەپ الىپتى.
كەيىن ايسۇلتان نازاربايەۆتى تۇتقىنداپ، قاماۋعا العان. ءبىراز ۋاقىتتان سوڭ پوليسياعا نازاربايەۆتار اۋلەتىن ماسقارالاماۋ ءۇشىن بۇل ءىستى جىلى جاۋىپ قويۋدى ۇسىنعان ءاتى-جونى بەلگىسىز ادامنان قوڭىراۋ كەلىپ تۇسكەن. ماككينلي حابارلاسقان ادامدى قازاقستان بيلىگىنىڭ وكىلى دەپ بولجام جاساعانىن، الايدا ونىمەن كەلىسىمگە كەلمەگەنىن ايتتى.
مەملەكەتتىك پروكۋرور ايسۇلتان نازاربايەۆتىڭ كوكاين قولدانعانىن ايتتى.
ايسۇلتان نازاربايەۆتىڭ ادۆوكاتى اليسدەير ۋيليامسون الدىن الا تىڭداۋعا قاتىسپادى. ادۆوكات ايسۇلتان نازاربايەۆتى 90 مىڭ فۋنت مولشەرىندە كەپىلدىگىمەن بوساتىپ، بەلگىلى ءبىر شەكتەۋلەر قويۋدى ۇسىندى. سونداي-اق ادۆوكات ايسۇلتان نازاربايەۆتىڭ ەسىرتكىگە تاۋەلدى ەكەنىن جاسىرمادى جانە وعان لايىقتى كلينيكا ىزدەپ جاتقانىن ايتتى.
ەسكە سالا كەتسەك، 2017 جىلى ايسۇلتان نازاربايەۆ ءوزىنىڭ فەيسبۋك پاراقشاسىندا جۇرتتى ەلەڭ ەتكىزگەن جازبا قالدىرعان بولاتىن. ول اكەسىنىڭ ولىمىنەن كەيىن ەسىرتكىگە تاۋەلدى بولعانىن مويىندادى. كەيىن بۇل تاۋەلدىلىكتەن ارىلۋىنا اتاسى (نۇرسۇلتان نازاربايەۆ — رەد.) جانە قۇداي كومەكتەسكەنىن ايتتى.
سوت فيليپپ باربەل ايسۇلتان نازاربايەۆ كەپىلدىكپەن بوساتاۋعا دايىن ەكەنىن مالىمدەدى. ءبىراق ايسۇلتان نازاربايەۆ ەسىركىگە تاۋەلدىلىكتەن وڭالتۋ كلينيكاسىندا ەمدەلۋى كەرەك. ايتپەسە ول قاماۋدا قالاتىن بولادى.
پىكىر قالدىرۋ