ميتينگتىڭ ماقساتى – قازاقستاندىقتاردى ەل ىشىندەگى بەيبىتشىلىك پەن تۇراقتىلىقتى ساقتاۋعا جۇمىلدىرۋ بولاتىن. وعان قاتىسقان قوعام قايراتكەرلەرىنىڭ، زيالى قاۋىم وكىلدەرىنىڭ، ونەر تارلاندارىنىڭ، كوپبالالى انالاردىڭ جانە جاستاردىڭ وي-پىكىرلەرى ءبىر باعىتتا توعىسىپ جاتتى.

مىنبەرگە شىعىپ ءسوز العان رەسپۋبليكالىق «Nur Otan» پارتياسى الماتى قالالىق فيليالى ءتوراعاسىنىڭ ءبىرىنشى ورىنباسارى ستانيسلاۆ كونكۋروۆ تا وتانداستارىمىزدى جات ەلدە وتىرىپ ءبىزدىڭ تىنىشتىعىمىزدى بۇزۋعا ارەكەت ەتىپ جۇرگەن ارام پيعىلدى ادامداردىڭ ارانداتۋىنا ەرمەۋگە شاقىردى.

      –  سۇيىكتى قازاقستانىمدا ءوسىپ-ونىپ، ءبىلىم الىپ، بيزنەسپەن اينالىسىپ، تابىستارعا جەتتىم. قوعامدىق ىستەرمەن اينالىستىم. قاي ىسپەن شۇعىلدانبايىن، ءارقاشان پارتيانىڭ  قولداۋىن كوردىم. ال ارانداتۋشىلار دەگەن كىمدەر؟ وزدەرىڭىز جاقسى بىلەسىزدەر، ولاردىڭ ءبىرى – ءابليازوۆ. مەملەكەت قارجىسىن ۇرلاپ، شەتەلگە قاشقان الاياق. شەتەلدە وتىرىپ ەلدى بۇلدىرگىسى كەلەدى. ونىڭ سوزىنە كىم سەنەدى؟ ەلگە جانى اشيتىن ادام ەلمەن بىرگە بولماي ما؟! كەشەگى ارىس وقيعاسىندا باۋىرلارىمىزعا نەگە كومەكتەسپەدى؟ بوس سوزدەن باسقا ەشتەڭە ءبىتىرىپ وتىرعان جوق.

ءبىزدىڭ الماتى قالالىق «Nur Otan» پارتياسى ارىسقا ءبىرىنشى كۇنى-اق 150 توننا قۇرىلىس ماتەريالدارىن، 30 توننا گۋمانيتارلىق كومەك جونەلتتى. حالىقتى بۇلىككە شاقىرۋشىلار سول كەزدە قايدا بولدى؟ حالىق اقىماق ەمەس، كىمنىڭ كىم ەكەنىن جاقسى بىلەدى. وزدەرىڭىز بىلەسىزدەر، ەلىمىزدە پارتيا كوپ. ءبىراق كوپشىلىگى قينالعاندا بىزگە كەلەدى. ويتكەنى، ءبىز اشىقپىز، حالىققا جاقىنبىز. ءبىز بارىمەن بىرگەمىز! سوندىقتان دا ءبىز المايتىن قامال بولمايدى، – دەدى س.كانكۋروۆ.

وسى ورايدا ايتا كەتەيىك، «Nur Otan»پارتياسىنا جىلىنا 100 مىڭنان استام ادام وتىنىشپەن جۇگىنەدى. تەك ءبىر الماتىنىڭ وزىندە جىل سايىن 10 مىڭداي ادامدى جەكە قابىلداپ، ولاردىڭ مۇڭ-مۇقتاجى تىڭدالىپ، 70 پايىزىنىڭ ماسەلەسى وڭ شەشىمىن تاۋىپ وتىرادى.