ءيا، بەيبىت ءومىردى، تۇراقتىلىقتى ءبارى قالايدى. ال بىزدە ول بار. ءبىراق سول تۇنىعىمىزعا تاس لاقتىرىپ، ونى لايلاعىسى كەلەتىندەر وزدەرىنىڭ تەرىس پيعىلدارىنا ءبىزدىڭ جاستارىمىزدى دا پايدالانعىسى كەلەدى. ال جاستار – قوعامنىڭ نەگىزگى قوزعاۋشى كۇشى. ەلدىڭ بۇگىنى دە، ەرتەڭى دە – جاستار. مەملەكەت اركەز باستى نازاردى جاستارعا ءبولىپ، بارىنشا جان-جاقتى جاعداي تۋعىزىپ كەلەدى. ولاردىڭ  قالاعان ءبىلىمىن الۋىنا، جۇمىس ىستەۋىنە، شىعارماشىلىقپەن شۇعىلدانۋىنا، جالپى وسىپ-ونۋىنە تولىق مۇمكىندىك بار. بۇگىندە قازاقستان جاستارى دۇنيەنىڭ ءتورت بۇرىشىندا ۇزدىك ءبىلىم وردالارىنان ءبىلىم الۋدا. كاسىپكەرلىكپەن اينالىسىپ، تابىسقا جەتۋدە. سپورتپەن شۇعىلدانىپ، جەڭىس تۇعىرىنان كورىنۋدە. ەلباسى بيىلعى جىلدى ارنايى «جاستار جىلى» دەپ جاريالادى. سونىڭ اياسىندا قانشاما يگىلىكتى ىستەر جۇزەگە اسىرىلىپ جاتىر.

ميتينگتە قوعام قايراتكەرلەرىمەن، زيالى قاۋىم وكىلدەرىمەن بىرگە ءسوز العان الماتى قالالىق ءماسليحاتىنىڭ دەپۋتاتى، داڭقتى سپورتشى يسلام بايرامۋكوۆ وي-پىكىرلەرىن جاستارعا باعىتتادى.

      –  مەن سپورتشى بولعاننان كەيىن جاستار اراسىندا كوپ بولامىن. جالپى، ەلىمىزگە، ونىڭ ىشىندە جاستارعا جاسالعان قامقورلىق پەن يگىلىكتى ءىس-شارالاردىڭ بارلىعىنا تاۋەلسىزدىكتىڭ ارقاسىندا، تۇراقتىلىق پەن تىنىشتىقتىڭ ناتيجەسىندە قول جەتكىزىپ وتىرمىز. سوندىقتان دا، جاستارعا ايتارىم، كەيبىر ىرىتكى سالۋشىلاردىڭ جەتەگىنە ەرمەي، قول جەتكىزگەن وسىناۋ يگىلىگىمىزدى كوزدىڭ قاراشىعىنداي ساقتاي بىلەيىك. ءقازىر كەيبىر جاستار اراسىندا «مەن وياندىم» دەگەن ءسوز سانگە اينالىپتى. تۇستەن كەيىن بۇل نە قىلعان ويانۋ؟ ونىڭ بايىبىنا بارماستان، الدە كوشتەن قالمايىق دەپ دۇرمەكككە ىلەسۋ مە؟    بەلسەندى بولعان جاقسى، ءبىراق ءاربىر ءىستىڭ مانىنە بويلاعان ودان دا جاقسى. اقيقاتىنا كەلەر بولساق، سەندەر ۇيىقتاپ جاتقاندا، ءبىز ەل قۇردىق. سەندەر ۇيقىدا بولعان كەزدە، ءبىز ەلدى جاڭعىرتاتىن ءىرى-ىرى رەفورمالاردى قولعا الدىق. نارىقتىق قاتىناستاردى باتىل ەنگىزىپ، جاڭا جۇيە قۇردىق. توقسانىنشى جىلدارداعى قيىندىقتاردى ەڭسەردىك. تاۋەلسىزدىكتى نىعايتىپ، قازاقستاندى الەم تانيتىن ەلگە اينالدىردىق. جەكە ءوز باسىما كەلسەم، قازاقتىڭ كوك بايراعىن وليمپيادادا جەلبىرەتتىم. ەل بىرلىگىن ويلاپ، قوعامدىق ىستەرگە بەلسەنە ارالاستىم. ويانۋ دەگەن – «بۇيرەكتەن سيراق شىعارۋ» ەمەس. ويانۋ دەگەن –ەل ىشىنە ىرىتكى سالۋ ەمەس. جاستىق جىگەردى دۇرىس ىسكە، دامۋعا، ەل يگىلىگىنە ارنايىق، – دەدى ي.بايرامۋكوۆ.

بەيبىت شەرۋدەگى ءسوز العان كورنەكتى اقىن، قازاقستان رەسپۋبليكاسىنىڭ ەڭبەك سىڭىرگەن قايراتكەرى ءجۇرسىن ەرمان، مەدەۋ اۋداندىق ارداگەرلەر كەڭەسىنىڭ ءتوراعاسى، قازاقستان اسكەري عىلىمدارى اكادەمياسىنىڭ مۇشەسى، بەلگىلى قوعام قايراتكەرى كيم سەرىكبايەۆ، «Nur Otan» پارتياسىنىڭ الماتى قالالىق فيليالى ءتوراعاسىنىڭ ءبىرىنشى ورىنباسارى ستانيسلاۆ كانكۋروۆ جانە تاعى باسقالار كوپشىلىكتى، ونىڭ ىشىندە جاستاردى تاۋەلسىزدىك دەگەن ءتاتتى ۇعىمنىڭ قادىر-قاسيەتىن باعالاي بىلۋگە شاقىردى.