وبلىس تۇرعىندارىنىڭ كومەك-قولداۋىنىڭ ارقاسىندا ءقازىر ارىستا 482 ءۇيدى قالپىنا كەلتىرۋ جۇمىستارى ءجۇرىپ جاتىر دەپ حابارلايدى Qamshy.kz اقپارات اگەنتتىگى اتىراۋ وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.

قازىرگى مەزەتتە اتىراۋ وبلىسىنا بولىنگەن سەكتوردا 13 قۇرىلىس مەكەمەسى قىزمەت ەتۋدە، 500-دەن استام ادام جانە 20-عا جۋىق بىرلىك تەحنيكا تارتىلعان. قۇرامىندا وبلىس اكىمىنىڭ ورىنباسارى مەن كەڭەسشىلەرى بار ۆەدومستۆوارالىق توپ وسى جۇمىستاردى ۇيلەستىرىپ وتىر. ءقازىر جۇمىستار تولىققاندى رەجيمدە جۇرگىزىلۋدە، بىرنەشە ءۇي تولىقتاي قالپىنا كەلتىرىلدى.

بۇل جونىندە اتىراۋ وبلىسىنىڭ اكىمى نۇرلان نوعايەۆ ارىسقا جۇمىس ساپارىمەن كەلگەن پرەمەر-مينيستر اسقار مامينگە باياندادى. سودان سوڭ، وبلىس اكىمى مەردىگەر ۇيىمداردىڭ باسشىلارىمەن كەڭەس وتكىزدى.

"وسىندا ورىن العان وقيعا بۇكىل ەلىمىزگە اۋىر سوققى بولدى. قازاقستاننىڭ تۇكپىر-تۇكپىرىنەن ادامدار ارىستىڭ تۇرعىندارىنا كوڭىل ءبىلدىرىپ، ءتۇرلى كومەك كورسەتىپ جاتىر. ۇيلەردى قالپىنا كەلتىرۋ جۇمىستارى ساپالى جۇرگىزىلىپ، ۋاقتىلى اياقتالۋى ءتيىس. سىزدەرگە ۇلكەن جاۋاپكەرشىلىك جۇكتەلىپ وتىر. ۇيلەردى سالعاندا كىرگەن ادامدار ريزا بولىپ، سىزدەردى جىلى سەزىممەن ەسكە الاتىنداي قىلىپ ىستەڭىزدەر"،- دەدى نۇرلان نوعايەۆ.

ءوڭىر باسشىسى كەڭەستەن سوڭ ارىستىڭ تۇرعىندارىمەن كەزدەسىپ، تىلەكتەرىن تىڭدادى.

"وبلىستىڭ تۇرعىندارى مەملەكەت باسشىسىنىڭ ۇندەۋىن قولداپ، ارىستى قالپىنا كەلتىرۋگە بەلسەندى اتسالىسۋدا. گۋمانيتارلىق كومەك، قاراجات جىبەرىلدى، ەرىكتىلەر باردى. بۇل بالا كەزىمىزدەن قانىمىزعا سىڭگەن قاسيەت، قيىن-قىستاۋ ساتتە ەلىمىزدىڭ تۇرعىندارى وتانداستارىن قولداۋسىز قالدىرمايدى"،- دەپ اتاپ ءوتتى وبلىس اكىمى.

ءوز كەزەگىندە، ارىستىڭ تۇرعىندارى قولداۋ كورسەتكەنى ءۇشىن اتىراۋلىقتارعا ريزاشىلىعىن ءبىلدىردى.

"ءبىز بارلىعىنا دا، ەلباسىنا، پرەزيدەنتكە، اتىراۋ وبلىسىنىڭ تۇرعىندارىنا زور راحمەت ايتامىز. ساپالى، جاقسى ۇيلەردىڭ قارقىندى سالىنىپ جاتقانىن كورىپ وتىرمىز. سىن ساتتە شەتكەرى قالماي، قولداۋ كورسەتكەندەرىڭىزگە راحمەت. ۇيلەرىمىز بىتكەسىن اتىراۋ وبلىسىنىڭ تۇرعىندارىن قۋانا-قۋانا شاقىرامىز. سىزدەر ۇمىتىلماستاي بولىپ ەسىمىزدە قالاسىزدار"،- دەدى ارىستىڭ تۇرعىنى ءبيبىحاديشا مومىن.