16 شىلدەدە اتىراۋ وبلىسىنىڭ اكىمى نۇرلان نوعايەۆ ايماق اكتيۆىندە مەملەكەتتىك ساتىپ الۋ باسقارماسىنىڭ جاڭا باسشىسىن تانىستىردى، دەپ حابارلايدى وڭىرلىك كوممۋنيكاسيالار قىزمەتى.
"بايماعامبەتوۆا الماگۇل تولەگەن قىزى وتىنىشىنە سايكەس وبلىستىق مەملەكەتتىك ساتىپ الۋ باسقارماسىنىڭ باسشىسى لاۋازىمىنان بوساتىلدى. لاۋازىمىن اتقارعان ۋاقىتتا باسقارما الدىنا قويىلعان مىندەتتەردى جاۋاپكەرشىلىكپەن اتقارىپ، ءوزىن كاسىبي بىلىكتى جەتەكشى رەتىندە كورسەتتى. ريزاشىلىعىمدى بىلدىرەمىن"،- دەيدى نۇرلان نوعايەۆ.
وبلىس اكىمىنىڭ بۇيرىعىمەن باسقارماعا جاڭا باسشى بولىپ جۇبانالييەۆا ايگەرىم ءشارىپ قىزى تاعايىندالدى.
ايگەرىم جۇبانالييەۆا 2010 جىلى جاڭگىر حان اتىنداعى باتىس قازاقستان اگرارلى-تەحنيكالىق ۋنيۆەرسيتەتىن بىتىرگەن. ماماندىعى-قۇرىلىس باكالاۆرى.
2010-2013 ج. – قۇرىلىس ءبولىمىنىڭ ستاتيست قىزمەتىندە، ساۋلەت ءبولىمىنىڭ مامان قىزمەتىندە،سونداي-اق، باتىس قازاقستان وبلىسى شىڭعىرلاۋ اۋداندىندا قالا قۇرىلىسى جانە قۇرىلىس ءبولىمى جەتەكشى مامان بولدى.
2013-2015 ج. - باس مامان، بقو قۇرىلىس باسقارماسى سمەتالىق-كەلىسىم شارت جانە مەملەكەتتىك ساتىپ الۋ بولىمىندە جۇمىس اتقاردى.
2015-2016 جج– بقو مەملەكەتتىك ساتىپ الۋ باسقارماسى باسشىسىنىڭ ورىنباسارى.
2016 جىلدان باستاپ اتىراۋ وبلىستىق مەملەكەتتىك ساتىپ الۋ باسقارماسىندا جۇمىس ىستەدى. مونيتورينگ جانە مەملەكەتتىك ساتىپ الۋ ءبولىمىنىڭ باسشىسىنان باستاپ باسقارما باسشىسىنىڭ ورىنباسارىنا دەيىن قىزمەت اتقاردى.
اكتيۆتە وبلىس اكىمى تاعى ءبىر كادرلىق وزگەرىستەر تۋرالى ايتتى.
"اتىراۋ وبلىسى اكىمى اپپاراتىنىڭ باسشىسى باسپايەۆ ەرنار جەڭىس ۇلى باسقا جۇمىسقا اۋىسۋىنا بايلانىستى لاۋازىمىنان بوساتىلدى. ول ق ر پرەزيدەنت اكىمشىلىگىنە مەملەكەتتىك ينسپەكتور بولىپ تاعايىندالدى"،- دەدى نۇرلان نوعايەۆ.
ايماق باسشىسى 2013 جىلدان باستاپ وبلىس اكىمى اپپاراتىنىڭ باسشىسى قىزمەتىن اتقارعان ەرنار باسپايەۆتىڭ كاسىبي بىلىكتىلىگىن اتاپ ءوتتى.
"ول مەملەكەتتىك قىزمەتتەگى ماڭىزدى ۋچاسكەلەردە جۇمىستى ۇيىمداستىرا بىلگەن، تاجىريبەلى باسشى رەتىندە ءوزىن كورسەتتى. مەملەكەت باسشىسى قويعان مىندەتتەردى ورىنداۋدا اكىمدىك اپپاراتىنىڭ جۇمىسىن ۇيلەستىرە ءبىلدى"،-دەدى نۇرلان نوعايەۆ.
