ءامىرجان قوسانوۆ exclusive.kz سايتىنا سۇحبات بەردى. سۇحبات بارىسىندا قوسانوۆ ۇلتتىق كەڭەسكە قاتىستى پىكىر ءبىلدىردى. 

— نە سەبەپتى سايلاۋدان 2-ورىن العان كانديدات ۇلتتىق كەڭەستىڭ قۇرامىندا جوق؟ لوگيكا قايدا؟

— بۇل ۇلتتىق كەڭەستى قۇرۋشىلارعا قويىلۋى كەرەك. بيلىكتىڭ لوگيكاسىنا مەن جاۋاپ بەرە المايمىن.

— سىزگە 1،5 ملن قازاقستاندىق داۋىس بەردى. ولاردىڭ سىزگە ارتقان سەنىمى بيلىككە قاجەت ەمەس پە؟ الدە بۇل كەڭەس تە حالىقتى الدارقاتۋ ءۇشىن قۇرىلدى ما؟

— بيلىككە قارسى 1،5 ملن ادامنىڭ كوزقاراسى، ويى جوعارى دەڭگەيدە تالقىلانۋى كەرەك. سوعان بايلانىستى ساياسي شەشىمدەر دە قابىلدانۋى ءتيىس.  بيلىك بىردە-ەكىلى جارلىققا قول قويۋ ارقىلى ازاماتتتاردىڭ سەنىمىن بىردەن قايتارىپ الا المايدى. سەنىمدى قايتارۋ – ۇزاق پروسەس. ءيا، قوعامنىڭ بيلىككە قوياتىن سۇراقتارى كوپ.

ال ەكىنشى سۇراققا كەلەتىن بولسام... بۇل ەلدەگى جالعىز وپپوزيسيا وكىلى ەمەسپىن. مەن باسقا دا ميلليونداعان ادامداردىڭ ءبىرىمىن. سونداي-اق مەنىڭ كەڭەسكە كىرۋ، كىرمەۋىم كەڭەستى باعالاۋداعى جالعىز كريتەريي ەمەس. باسقا دا لايىقتى ادامدار بار.

سول سەبەپتى ۇلتتىق كەڭەستىڭ جاساندى نەمەسە جاساندى ەمەس ەكەنىن قۇرام مۇشەلەرىنىڭ ىس-ارەكەتى مەن ناتيجەسىنە قاراپ قانا باعا بەرە الامىن. سونداي-اق كەڭەس قۇرامىنداعى كەيبىر ادامداردى مەن قۇرمەتتەيمىن. جاس كەزىمىزدە «اشتىق ەرەۋىلىنەن باسقانىڭ بارىنە دايىنمىن» دەگەن ءسوز ايتىلاتىن ەدى. سول سەكىلدى مەن حالىق پەن بيلىك اراسىندا ديالوگ ورناتۋعا باعىتتالعان كەز كەلگەن باستامانى قولدايمىن. ءبىر ورىندا تۇرعاننان ءبىر قادام العا جىلجىعان دۇرىس. نەمەسە قۇداي ساقتاسىن ارتقا قايت. "بالاپاندى كۇزدە سانايدى" دەمەكشى، ءالىپتىڭ ارتىن باعايىق.

— ايتپاقشى، سىزگە ۇلتتىق كەڭەستىڭ قۇرامىندا نە سەبەپتى جوق ەكەنىڭىزدى ءتۇسىندىردى مە؟

–جوق. ءتىپتى، مەن ۇلتتىق كەڭەستىڭ مۇشەسى بولماعانىما قاتتى قۋانىشتىمىن. سەبەبى ەگەر مەن كەلىسىم بەرسەم (ۇلتتىق كەڭەسكە كىرۋگە — رەد)، مەنى ديالوگقا قاۋقارسىز دەپ ايىپتار ەدى. ەگەر كەلىسىم بەرسەم، جۇيەنىڭ ادامى دەر ەدى.