سارسەنبى كۇنى ارنايى جاساق ۇيىنە شابۋىل جاساعان قىرعىزستاننىڭ ەكس-پرەزيدەنتى المازبەك اتامبايەۆ بيلىكتەن وزىنە كۇش جۇمساماۋعا شاقىردى دەپ جازادى Qamshy.kz اقپارات اگەنتتىگى interfax.ru سايتىنا سىلتەمە جاساپ. 

«بۇگىن مەنى ۇستاپ اكەتپەك بولدى. وكىنىشكە وراي، بەيبىت تۇرعىندار جاپا شەكتى. سەبەبى، تۇتقىنعا الۋعا «الفا» ارنايى  جاساعى جىبەرىلدى. اتامبايەۆتىڭ اۋزىن جاۋىپ، قاماۋعا الىپ نەمەسە ءولتىرۋى ءۇشىن بيلىك بەيبىت تۇرعىنداردى اتۋعا دەيىن باردى. بۇل شەكتەن شىققاندىق» - دەدى اتامبايەۆ وزىنە تيەلىسى «اپرەل» تەلەارناسىنىڭ ەفيرىندە.

بۇرىنعى پرەزيدەنت ءوزىنىڭ دە، قوي-تاش اۋىلىنداعى ۇيىندە جينالعانداردىڭ دا تەرروريست ەمەس ەكەنىن مالىمدەدى. ءبىراق اسكەري كۇش جۇمسالعان. «وكىنىشكە وراي، بيلىك مەنىڭ زاڭ شەڭبەرىنە شىعايىق دەگەن ۇسىنىسىمدى قابىلدامادى.  مەن بىرنەشە رەت قاعاز جۇزىندە جاۋاپ جازىپ، ب ا ق ارقىلى سۇراقتارىنا جاۋاپ بەرۋدى دە ۇسىندىم. ءبىراق ودان باس تارتتى. ءقازىردىڭ وزىندە بارلىق سۇراققا جاۋاپ بەرۋگە دايىنمىن. مىسالى، باتۋكايەۆتىڭ (كريمينالدى مانسابى ءۇشىن 2013 جىلدىڭ ءساۋىر ايىندا زاڭسىز بوستاندىققا شىققان) ىسىنە قاتىستى. وعان مەنىڭ تۇك تە قاتىسىم جوق» - دەدى اتامبايەۆ.

ول بيلىكتى «ويلانىپ»، «زاڭ شەڭبەرىنە» كىرىپ، «ءوز حالقىنا وق اتپاۋعا»  شاقىردى.

ەسكە سالايىق، كەشە، 7 تامىزدا قىرعىزستاندا اتامبايەۆتى ۇستاۋ وپەراسياسى ءجۇرىپ جاتقانى حابارلانعان ەدى.  پرەزيدەنتتىڭ رەزيدەنسياسى اينالاسىندا تىكۇشاق ۇشىپ جۇرگەنى ايتىلعان بولاتىن. جۋرناليستەردىڭ مالىمەتىنشە، اتامبايەۆتىڭ جاقتاستارى كىرگەن كيىز ۇيگە جارىق-دىبىس گراناتاسى لاقتىرىلعان.