ماڭعىستاۋدا تۇرعىنداردى تەگىن دارى-دارمەكپەن قامتاماسىز ەتۋ  جالعاسىپ جاتىر. بۇگىنگى تاڭدا وبلىستا تەگىن ءدارى بەرۋ پروسەسى SMS-حابارلاما ارقىلى باقىلانىپ وتىر. «الەۋمەتتىك مەديسينالىق ساقتاندىرۋ قورى»  («ءامسق») كەلتىرگەن دەرەك بويىنشا، بيىل ءساۋىر-ماۋسىم ايلارىندا رەسپۋبليكا بويىنشاتەگىن دارى-دارمەك العاندار تىزىمىنە ەنگەن پاسيەنتتەردىڭ تەلەفوندارىنا شامامەن ميلليوننان استام SMS-حابارلاما جىبەرىلگەن بولاتىن.

SMS-حابارلاما قورىتىندىسى بويىنشا، قورعا 27 798 پاسيەنتتەن جاۋاپ كەلدى. ونىڭ ىشىندە 4 137 پاسيەنتتىڭ دارى-دارمەكتى الماعانى انىقتالدى. دارى-دارمەكتىڭ قولعا تيمەگەنى تۋرالى حابارلامانىڭ باسىم بولىگىن قىزىلوردا، ماڭعىستاۋ، شىعىس قازاقستان، تۇركىستان جانە الماتى وبلىستارىنىڭ تۇرعىندارى جولداعان.

«ءامسق»ماڭعىستاۋ فيليالى كەلتىرگەن مالىمەت بويىنشا، دارى-دارمەك ۇيلەستىرۋ بويىنشا العاشقى جارتىجىلدىقتا 61 زاڭسىز جاعداي (دەفەكت) انىقتالىپ وتىر. سول سەبەپتى ەمحانالار ەسەبىنەن 1 258 478 تەڭگە كولەمىندە قارجى قىسقارتىلعان.

            وبلىستىق دەنساۋلىق ساقتاۋ باسقارماسىنىڭ دارى-دارمەك پەن ماتەريالدىق-تەحنيكالىق قامتاماسىز ەتۋ ءبولىمى باسشىسى تيمۋر مالىك ۇلى تەگىن ءدارى الاتىن تۇرعىندار ەمحاناعا بارىپ، تەلەفون ءنومىرىن قالدىرۋ قاجەتتىگىن ايتادى. ويتكەنى، كوپشىلىك تۇرعىنداردىڭ تەلەفون نومىرلەرى دۇرىس ەمەس نەمەسە قالدىرماعان.

ەسكەرتە كەتۋ كەرەك، تەگىن دارى-دارمەك تيەسىلى تۇرعىنداردىڭ تەلەفونىنا حابارلاما كەلەدى. حابارلامادا رەسەپتىنىڭ ءنومىرى مەن ءدارىنىڭ بەرىلگەن كۇنى كورسەتىلەدى. پرەپاراتتار شىن مانىندە قولىنا تيمەگەن پاسيەنتتەر SMS-حابارلاماعا جاۋاپ رەتىندە «0» سيفرىن جولداي الادى نەمەسە «سق-فارماسيا» ءجشس-نىڭ 1439 بايلانىس نومىرىنە قوڭىراۋ شالسا بولادى.

-ەگەر دارى-دارمەككە قاتىستى تۇرعىنداردان سۇراق تۋىنداسا، ءوزى تىركەلگەن دارىگەردەن سۇراۋى قاجەت. ماسەلەن، مەدبيكە نە ۋچاسكەلىك دارىگەر پاسيەنتكە تيەسىلى ءدارى بەرمەدى دەلىك. سول ەمحانانىڭ باس دارىگەرىنە نەمەسە ونىڭ ورىنباسارىنا كىرىپ، ارىز جازۋى ءتيىس. ەگەر ەمحانا دەڭگەيىندە بۇل ماسەلە شەشىلمەگەن جاعدايدا، 24 ساعات قىزمەت ەتەتىن دەنساۋلىق ساقتاۋ باسقارماسىنىڭ كولل-سەنتر ورتالىعىنا قوڭىراۋ شالا الادى. (تەل. 303060، 87758776259) مۇنى ايتىپ جاتقان سەبەبىم، كوپشىلىك جاعدايدا تۇرعىندار ءبىزدىڭ باسقارماعا كەلىپ جاتادى، ال ەمحانا دارىگەرلەرى بۇل ماسەلەدەن بەيحابار. ارينە، بۇل تۇرعىننىڭ جەكە قۇقىعى، دەگەنمەن ماسەلەنى وسىلاي جەدەل شەشۋگە بولادى، - دەيدى تيمۋر مالىك ۇلى.