جاڭاوزەن قالاسىنىڭ اكىمى بولىپ ماقسات يباعاروۆ تاعايىندالدى. بۇل تۋرالى ماڭعىستاۋ وبلىسى اكىمىنىڭ باسپا ءسوز حاتشىسى سامات سۇلەي ءمالىم ەتتى.

ال بۇل تاعايىنداۋدىڭ استارىندا نە جاتىر؟ جاڭاوزەننەن كەشە باستالعان قارسىلىق بۇگىننەن باستاپ، بۇكىل رەسپۋبليكانى شارلاپ جاتىر. ءقازىر الماتى مەن استانادا جانە اقتوبەدە، سونىمەن قاتار رەسپۋبليكانىڭ ءبىرقاتار قالالارىندا نارازىلىق اكسياسى جالعاسىپ جاتىر. ال ماقسات يباعاروۆتىڭ جاڭاوزەن قالاسىنا اكىم بولىپ تاعايىندالۋى حالىقتىڭ نارازىلىعىنان كەيىن ورىن الدى ما، جوق الدە باسقالاي سىرى بار ما؟  ول جاعى ەندى بەلگىسىز. ءبىراق «جۇڭگو ەكسپانسياسىنا» قارسىلىق بۇگىن قازاقستاننىڭ بىرنەشە قالالارىندا ءوتىپ جاتقانى، ول ەندى اقيقات.
ال اكىمدىككە جاڭادان كەلگەن يباعاروۆ كىم؟

ماقسات وڭعارباي ۇلى يباعاروۆ 1970 جىلى 7 ساۋىردە تۇرىكمەنستان رەسپۋبليكاسى تاشاۋز وبلىسىندا دۇنيەگە كەلدى. جاڭاوزەن قالاسىنداعى مۇناي جانە گاز تەحنيكۋمىنا ءتۇسىپ، 1992 جىلى مۇناي جانە گاز ۇڭعىلارىن پايدالانۋ ماماندىعى بويىنشا اتالمىش وقۋ ورنىن ۇزدىك ديپلوممەن ءبىتىردى. 1999 جىلى ش.ەسەنوۆ اتىنداعى اقتاۋ مەملەكەتتىك ۋنيۆەرسيتەتىن ءبىتىرىپ، تاۋ-كەن ينجەنەرى ماماندىعىن الدى.  
ەڭبەك جولىن 1992 جىلى «وزەنمۇنايگاز» وندىرىستىك بىرلەستىگىندە سكۆاجينالاردى جەراستى جوندەۋ وپەراتورى قىزمەتىنەن باستادى. 1994 جىلدان – سكۆاجينالاردى جەراستى جوندەۋ شەبەرى، مۇناي جانە گاز ءوندىرۋ شەبەرى، جەتەكشى ينجەنەر-تەحنولوگ قىزمەتتەرىن اتقارىپ كەلدى. 1996 جىلى №1 مگوب №8 مۇناي جانە گاز ءوندىرۋ سەحى باستىعىنىڭ ورىنباسارى، №2 مۇناي جانە گاز ءوندىرۋ سەحىنىڭ باستىعى بولىپ ەڭبەك ەتتى.  2000 جىلدان باستاپ «وزەنمۇنايگاز» اق قاراستى تاجىريبەلى-ەكسپەريمەنتالدىق وندىرىستىك باسقارمانىڭ باس ينجەنەرى. 2001 جىلدان – №2 مۇناي-گاز ءوندىرۋ باسقارماسى باستىعىنىڭ ورىنباسارى، بۇرعىلاۋ، سكۆاجينالاردى جوندەۋ ءبولىمىنىڭ جەتەكشى ينجەنەرى. 2002-2008 جىلدارى - №1، №3 مۇناي-گاز ءوندىرۋ باسقارماسىنىڭ باس ينجەنەرى، №2، №4 مۇناي-گاز ءوندىرۋ باسقارمالارىنىڭ باستىعى قىزمەتتەرىن اتقارىپ كەلدى. 2008 جىلى «وزەنمۇنايگاز» ءوف پەرسونالدى باسقارۋ جانە دامىتۋ ءبولىمىنىڭ باستىعى. 2009-2010 جىلدارى «وزەنمۇنايگاز» ءوف جۇمىسشىلارىنىڭ كاسىپوداعى» قب ءتوراعاسى بولىپ سايلانىپ، قوعامدىق جۇمىستارمەن بەلسەندى اينالىستى. 2010-2013 جىلدارى №2 مۇناي-گاز ءوندىرۋ باسقارماسىنىڭ باستىعى.  2013 جىلدان «وزەنمۇنايگاز» اق باس ديرەكتورى بولىپ قىزمەت ەتىپ كەلەدى.
2012 جىلدان ماڭعىستاۋ وبلىستىق ءماسليحات دەپۋتاتى (5 شاقىرىلىم).
وتان الدىنداعى ەرەن ەڭبەكتەرى ءۇشىن ءار ءتۇرلى مەدالدارمەن ماراپپاتالعان.
«نۇروتان» پارتياسىنىڭ بەلگىسىمەن، «ماڭعىستاۋ مۇنايىنا 50 جىل»، «وزەن كەنورنىنا 40 جىل»، «جاڭاوزەن قالاسىنا 40 جىل»، «ق ر مۇناي-گاز كەشەنى قىزمەتكەرلەرى كاسىپوداعىنىڭ ۇزدىگى» مەدالدارىمەن، ەنەرگەتيكا جانە مينەرالدى رەسۋرستار مينيسترلىگىنىڭ قۇرمەت گراموتاسىمەن ماراپاتتالعان.