- اسسالاۋماعالۇيكۇم، حال-جاعدايىڭىز قالاي،  ساكەن اعا؟

-ۋاعالايكۇم ۋاسسالام! ءايبات، باۋىرىم! قازاقتىڭ كەمەل شايىرى، ءسوز تىزگىنىن ۇستار جوقشىسى ساكەن يماناسوۆ اعاممەن اندا-سانداعى ديالوگىمىز وسىنداي قاراپايىم، ادەتي امان-ساۋلىقتان ءوربيتىن. ول كىسىنىڭ «ءايبات» دەگەن لەبىزى كوپكە ورتاق راي بولعانىمەن، ماعان تاپ سول كىسىنىڭ ءتول تۋىندىسى سىقىلدى كورىنەتىن. قۇلاعىما مايداي جاعاتىن. ودان شىرايلى، بۇدان ءنارلى  قانداي ەپيتەت كەرەك؟ ءومىر بويى سول ماقامىنان اعامىز جاڭىلمايتىنداي كورەتىنمىن. سول بابىنان اينىماي بۇل كۇندەرى 75ء-تىڭ ورىنە دە شىعار ما ەدى. قايتەيىك!  امال نەشىك؟ دەگەنمەن ءبارىن باسىنان باستايىن. قۇدايشىلىعىمدى ايتايىن. شىنىم وسى. التىنشى كلاستامىن. قىس ورتاسى. كوك كاشوۆكامەن ۇشىرتىپ كەلىپ، ءوزىمىزدىڭ ءۇيدىڭ باسپالداعىن  قاناتىمەن  سىزا توقتاي قالعانمىن. ناعاشىمنىڭ  دەگبىرسىزدەنە كۇتىپ وتىرعانىن بىلەمىن. ەكەۋمىز كۇن سايىن، تۇستەن كەيىن «پراۆدا» گازەتىندە جاريالانتاتىن قوس ءميحايلدىڭ –  بوتۆيننيك پەن ءتالدىڭ الەم چەمپيوندىعىندا وينالىپ جاتقان  پارتيالارىن تالدايمىز. حالىقارالىق گروسسمەيستەر داۆيد برونشتەيننىڭ جان-جاقتى ءاناليزى دالادا قالادى، ءوز بەتىمىزشە كەتەمىز، اركىمنىڭ ءوز اقىلى وزىنە دەگەندەي. كەيىن ءبىلدىم، شاحمات مايتالمانى م. ءتالدىڭ: «شاتىراش –  ەڭ الدىمەن ونەر»، - دەگەن انىقتاماسى بار ەكەن. ءيا، سول  ايرىقشا ونەرگە وتكەن عاسىردىڭ الپىسىنشى جىلدارى ءبىزدىڭ دە دەن قويعان جاي بار ەدى. توبەسى جىلتىراعان سامساعان فيگۋرالاردى اق پەن قاراعا تىگىپ قويىپ، پوشتاشى اكەپ بەرگەن ءبىر قۇشاق گازەت-جۋرنالدى جايىپ تاستاپ وتىرعانىمدا، نەگە ەكەنىن قايدام،  كوپ باسىلىمنىڭ ىشىنەن سۋسىپ شىققان (بۇرىن پالەندەي جابىسا قالمايتىن) اۋداندىق «جاڭا ءومىر» گازەتىنە كوزىم تۇسە كەتتى. جازىپ كەپ جىبەردىم، جىپىرلاعان ولەڭ جولدارى، ايقارا بەتتى تۇگەل الىپ جاتىر. ساتى-ساتى، ماياكوۆسكيي ۇلگىسىمەن تۇزىلگەن. پوەما – «ءومىر». اۆتورى – ساكەن يماناسوۆ. اۋداندىق گازەتتە تۇتاس پوەما جاريالانعانىن ءوز باسىم ءبىرىنشى رەت كورۋىم. ول كەزدە پۋبليسيستيكا مەن كوركەم ادەبيەت جانرلارىن جىعا تانىماساق تا، ءسوز ونەرىنىڭ ءدامىن سەزىنۋگە ازدى-كەمدى قاۋقارىمىز بار ەدى. مەنىڭ شىعارماشىلىق جاراتىلىسى دارا ساكەن اعامەن سىرتتاي تانىستىعىم وسىلاي باستالدى. كەيىنىرەكتە، ەتەنە ارالاسىپ كەتكەنىمدە، سول داستانىڭىز قايدا دەگەنىمدە، ونداي شىعارما جازعامىن جوق دەپ جالتارما جاۋاپ بەردى. مەن ءۇشىن بۇل – ءالى كۇنگە دەيىن شەشىمى تابىلماعان جۇمباق. تاعى دا ىلگەرى كەتسەم، قازاقتىڭ كورنەكتى قالامگەرى قاستەك بايانباي كوكەمىزدىڭ ايتۋىنشا، بولاشاققا  ادىرناداي اڭىراتا جول تارتقان جاس جىرشى ساكەن يماناسوۆتىڭ ءۇرىم-بۇتاعى شىبىندى تاۋىنىڭ ارعى جاعىن، الاكول ماڭىن قونىس ەتسە، ءوزى سول جوتالاردىڭ بەرگى بەتىندە، تالدىبۇلاق  ەلدى مەكەنىندە، ياعني قاسكەڭنىڭ اۋىلىندا دۇنيەگە كەلىپتى. مۇنى مەن «ارى تارت، بەرى تارتقا» سالىپ، وسپەس ەلدىڭ ونبەس داۋىن قۋالاۋ ءۇشىن ەمەس، شىندىققا، تاريحقا زارەدەي قيانات بولماسىن دەپ ايتىپ جاتىرمىن، باسقالاي، بوگدە ويىم جوق. جال-قۇيرىعىمنىڭ قىسقالىعىنان با، الدە شىعارماشىلىق دەگەن سىرلى الەمگە دەگەن تازا قۇمارلىعىم با، ايتەۋىر، ءانۋار ءالىمجانوۆ، توقتار بەيىسقۇلوۆ، قاستەك بايانباي، سايىن مۇراتبەكوۆ، مالگاجدار اۋباكىروۆ، ساكەن يماناسوۆ، قۇتتىبەك باياندين سىندى قايراتكەر، سىرباز ازاماتتارعا شاما-شارقىمشا رۋحاني ءىنى بولۋعا تىرىستىم. ولار دا سىرتقا تەپكەن جوق. باۋىرىنا باسىپ، باسىمنان سيپاماسا دا، جاقىن تارتارىن سەزەتىنمىن. انا ءبىر توقسانىنشى  جىلدار شىعابەرىسىندە باسىنان ءسوز اسىرمايتىن  تارپاڭ ساكەڭ   قينالا-قينالا كىشىرەيىپ، مەنىڭ بۇيىمتايىمدى ارقالاي ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى مەن پرورەكتورىنا كىرىپ شىققانىن قالاي ۇمىتايىن. ءوز باسىم جاسى ۇلكەن جۇراعاتتىڭ ول قادامىن باۋىرعا جاناشىرلىق، وسىدان بىردەڭە شىعار دەگەن اۆانس، اعا ءۇمىتى رەتىندە قابىلدادىم.  ساكەن اعامنىڭ بەس تومدىق تاڭدامالى شىعارمالارىنىڭ ءبىرىنشى كىتابىندا ماعان ارنالعان اۆتوگرافى بار، ونىڭ ءلامى مىناداي: «دەربەس تالانت يەسى، كىسىلىك، كىشىلگى بىردەي ءىنىم كاكەنگە اعالىق قۇرمەتپەن. اۆتور، س. يماناسوۆ (قولى). 1 جەلتوقسان 2007». مەن ءۇشىن مۇنداي اجارلى كوڭىل –  ارينە، ءزىل باتپان سالماق،  ەرەسەن ماقتانىش. ءبىراق ماعان ءاماندا اعامىزدىڭ «ىنىلەرگە رەنىش ءسوزى» جانىما جاقىن سياقتانادى دا تۇرادى، سول ولەڭدەگى مۇقىم قازاق باۋىرلارىنا باعىشتالعان وكپە-نازدى ءداپ وزىمە ارنالعان وسيەتتەي قابىل الامىن: جەل وتىندە تۇرا قالعان توپسىڭدار، ءالى سەندەر كورەتىن دە كوپ سىن بار. دارا قۇرمەت دامەتەردەي ازىرگە جەكە شاۋىپ جاۋ تۇسىرگەن جوقسىڭدار. تۋعان جەردىڭ تەكتىسى تەك سەندەر مە، ەپتىسى تەك، بەتتىسى تەك سەندەر مە؟ – اتا بارىن، اعا بارىن اڭعارماي، ورىن تىلەپ تۇرعاندارىڭ توردەن دە. كوزدى قاداپ تۋىلدىرىق، تۇڭلىككە، كوككە قاراپ جاتىپ الىپ كۇندىككە، سەندەردەي ءبىر ءىنى تۋار ءتۇبى دەپ، بوسقا لاعىپ، تۇك بىتىرمەي جۇردىك پە؟ جوعارىدا اتى اتالعان ۇلكەندەرمەن، ونىڭ ىشىندە ساكەڭمەن توننىڭ ىشكى باۋىنداي جاھاتتاستىم، سىرلاس-جاقىن بولدىم، الدى-ارتىما قاراماي ەركەلەدىم دەپ ەش ايتا المايمىن. ءارقاشان اراقاشىقتىقتان اسىپ كورگەمىن جوق. سۇعىنا جۇرۋدەن گورى ۇعىنا ءجۇرۋ، سونداي ءبىر  اقسۇيەكتەي سىزىلعان جۇعىستىقتىڭ ءجون دە  ءبىر باسقا. ول دا جاسى ۇلكەن زامانداستارى قاسىم قايسەنوۆ، سەيتجان وماروۆ، حاميت ەرعالييەۆ، توقاش بەردياروۆ،  عافۋ قايىربەكوۆ، ءانۋار ءالىمجانوۆ، زەينوللا قابدولوۆ، تولەۋجان ىسمايىلوۆ، مۇقاعالي ماقاتايەۆ، شەرحان مۇرتازا، قادىر مىرزالييەۆ، تۇمانباي موداعالييەۆ، ادىلبەك ءابايدىلدانوۆ، قاستەك بايانباي، سەيداحمەت بەردىقۇلوۆ سىندى اعالارىنا تىم تەتە جۇرسە دە، ءوزىنىڭ قۇداي بەرگەن مىنەز-وبرازىنان اينىمايتىن، «انانى الىپ كەل، مىناعان بارىپ كەلگە» يلىگە قويمايتىن. الدىڭعى تولقىننىڭ ىقپالى مەن شاراپاتىنان گورى ءوزىنىڭ تۋعان اعاسى ءنۇسىپتىڭ ادامگەرشىلىك، زياتتىلىق ونەگەسىن  ايتا بەرۋدەن جالىقپايتىن بىزدەرگە. اتاعى الاش مادەني-شىعارماشىلىق كەڭىستىگىندە دۇرىلدەپ تۇرعان ساكەن يماناسوۆ اقىن وتكەن كۇندەرگە كوز توقتاتار «اعا» دەگەن ەسسەسىندە: «مەنەن تۇپ-تۋرا ون جاس ۇلكەن ءنۇسىپ اعام ولەڭ شىعاراتىن. بوزبالا كەزىندە اۋىلداعى قۇربىلاس قىزدارىنىڭ بىرىنە ولەڭمەن حات جازىپ، ونىسىن تورتكوز داپتەردىڭ ورتاسىنان «سىدىرىپ» العان تەمىرمەن «تۇيمەلەپ»، «وقىما!» - دەپ ماعان شەگەلەي تاپسىراتىن دا، اپارىپ بەر!» - دەپ ءجيى-جيى جۇمسايتىن. «يت قورىعان جەرگە اۋەس» دەگەندەي، تىيىم سالىنعان نارسەنىڭ ءبارى جۇمباق، ءبارى ءدامدى بولىپ كورىنەتىن ادەتى ەمەس پە، ەگەر اعام: «پالەن قىزعا اپارىپ بەرە سال!» دەسە، كىم بىلەدى، «بۇل نە؟» دەپ سۇراماستان جالاڭاياق قالپىمدا جەلدەي ەسىپ بارىپ جەتكىزىپ بەرە مە ەدىم. ءبىراق الگىندەگى: «وقىما!» - دەپ قاتاڭ ەسكەرتكەن سوڭ قۇمارتا قىزىقپاي قالاي تۇرماقپىن، وقىماي، قالاي شىداماقپىن... ولەڭگە دەگەن قۇشتارلىعىم دا سول اعاما شابارمان بولىپ جۇرگەن كەزدەن باستالسا كەرەك-تى»، - دەپ ءبىر قايىرىپ تاستايدى. ادام بالاسىنا ءتان وسالدىق، وزىمشىلدىك، وكتەمدىك سىقىلدى بەيداۋالىقتىڭ يناباتتىلىق، يماندىلىق، يگىلىك سياقتى قۇبىلىستارمەن ىشەك-قارنى ارالاس. كەيدە قايسىسىنىڭ قاي جەردە تۇيىسەتىنىن ايىرا الماي قالاسىڭ. داناگويدىڭ شىعارماسى، ۇلىنىڭ قىلىعى قاعابەرىسىندە دە مەنمەندىك، كۇنشىلدىك، جەل سوزگە قۇلاق اسۋ، ماقتاۋعا ءيىپ قالۋ، اڭعالدىق پەن اڭقىلداقتىق بوي تاسالاپ تۇرادى. ايتپەسە وسى كۇنگە دەيىن دانىشپاندار ساناتىنان تۇسپەي كەلە جاتقان كارل ماركس: «نيچتو چەلوۆەچەسكوە منە نە چۋجدو»، - دەپ كەسەك سويلەمەس ەدى عوي. ياعني ادامعا ءتان نارسە ۇلكەن اقىنعا دا ءتان. بىردە مەن ساكەن اعاما قاراپ: -وسى      دانىشپانداردىڭ    ايەلدەرىنىڭ    اتتارى   نەگە   ءماريام؟   مىسالى،   ءسابيت مۇقانوۆتىڭ، سايىن مۇراتبەكوۆتىڭ، ساكەن يماناسوۆتىڭ؟ – دەپ تىكە تارتتىم. ول كىسى وسىنىڭ  شىنى ما، ويىنى ما دەگەندەي بەتىمە بادىرايا قارادى. ءمىز باقپادىم. سونان سوڭ قارقىلداي كۇلىپ الدى دا:

-تاۋىپ ايتتىڭ، - دەپ ريزا بولدى. بىر-ەكى كۇننەن كەيىن تەلەفون سوعىپ:

-وسى ۇيدەگى كەلىننىڭ اتى، ۇمىتپاسام، ءماريام ەمەس پە؟ – دەپ قاراپ تۇر.

       مەنىڭ مىنا ايتارىم تاعى دا كەرەمەت ءبىر تاڭدايعا تاتىر نارسە، سونشالىق اڭگىمە ەتۋگە تۇرارلىق دۇنيە بولىپ كورىنبەۋى  مۇمكىن. دەي تۇرعانمەن كەيدە كىپ-كىشكەنە دەتالدىڭ ءوزى ويناپ شىعا كەلەتىنى بار ەمەس پە؟ ال وسى اڭگىمەنى اقىننىڭ ءوز اۋزىنان دا تالاي ەستىگەنمىن. شىندىققا ءبىر تابان جاقىن بولۋ ءۇشىن ونىڭ ەستەلىگىنەن قىسقا ءۇزىندى كەلتىرەيىن: «...جۇباعاڭ قازاقستان جازۋشىلار وداعىنا حاتشى بولىپ سايلاندى. كەزەكتى سەزد وتەردە ماسكەۋلىك ۆيكتور شيروكوۆ دەگەن اقىن ماعان تەلەفون سوعىپ، ءبىر توپ ولەڭىمدى «ليتەراتۋرنايا گازەتا» جاريالاعالى جاتقانىن، «سوعان  اتاقتى ءبىر ادامعا شاعىن ءالعىسوز جازدىرساڭ جاقسى بولار ەدى، جۇبان موداعالييەۆ بولسا، ءتىپتى قاتىپ كەتەدى، ول كىسىمەن ءوزىڭ سويلەسسەڭ قايتەدى»، - دەگەندى ايتتى. مەن «جارايدى» دەپ ۋادە بەرسەم دە، ءالى ۋاقىت بار شىعار دەپ جۇرگەندە، ەستەن شىعارىپ الىپپىن. ءدال سول سەزد بولاتىن كۇنى ولەڭدەرىم جۇباقاڭ العىسوزىمەن ورتالىق گازەتتە باسىلىپ شىقتى. جوعارعى كەڭەستىڭ ءماجىلىس زالىندا وتەتىن سەزگە قاتىسۋ ءۇشىن بيىك باسپالداقتاردى بويلاي كوتەرىلىپ كەلە جاتىر ەدىم، الدىمنان الدەكىمدەرمەن اڭگىمەلەسىپ تۇرعان جۇباقاڭ ۇشىراسا كەتتى. «ساكەن، «ليتگازەتاعا» شىعۋىڭ قۇتتى بولسىن. مەنىڭ ءسوزىمدى سەن جازىپ بەردىڭ بە؟» - دەپ سۇرادى. ءىشىم قىلپ ەتە قالدى دا، نە دە بولسا دەپ: «نە، جۇبان اعا، ماعان قيمايتىن سوزدەر مە ەكەن، سونشاما؟» - دەپ قيتىعا قىڭىر سويلەدىم.

-جوعا، - دەدى جۇباقاڭ. –  تەك      وزىمە     ايتقاندا،    بۇدان  دا    جىلىلاۋ،    بۇدان  دا

سالماقتىلاۋ جازار ما ەدىم دەگەنىم عوي، انشەيىن.

     ريزا بولىپ قالدىم: «ۇيالعان تەك تۇرماسقا»  باعىپ، ارسالاڭداي كۇلە بەرىپپىن». ساكەن اعام –  كولدەنەڭ كوك اتتىعا  سىر شاشا بەرمەيتىن جان. بالكي، قۇرداستارىنا، جاقىن جۇرگەن جولداستارىنا شەشىلسە، شەشىلەتىن شىعار. ال ءبىز سياقتى ىنىلەرىنە، شيپاگەرلەر تىلىمەن سويلەسەك، ىشىندەگىسىن شاعىن دوزامەن عانا تاتىراتىن. سوندىقتان ماعان ساكەن اعادا، ساكەن اقىندا ىلعي دا  ايتىلماي جۇرگەن، وزگەشە  ءبىر بۇعىپ جاتقان   قۇپيا بار سەكىلدى كورىنەتىن دە تۇراتىن. سونى توگىپ-توگىپ تاستاعىسى، ىشتەگى  اششى زاپىراننان ارىلعىسى كەلەتىنىن دە سەزگەندەيمىن. ءبىراق ول نەندەي تىلسىم، نەندەي سىر، نەندەي ءتۇيىن –  مەن ءۇشىن ماڭگىلىككە تارس جابىلعان سىر ساندىق. بالكىم، ونىڭ كىلتى اقىن اعانىڭ  ليريكاسى مەن ءپالساپاسى ارالاسقان ولەڭدەرىندە،  تاسقا باسىلعان قارا سوزدەرىندە شىعار. دالاڭدا مال دا قالماي ار دا قالماي، قارقىلداپ قالا بەردىك قارعالارداي، توقتايتىن ءتۇرى دە جوق تاجالىڭنىڭ تۇپ-تۇگەل تۇقىرتا ءبىر جالماپ الماي.   قانشاما قاراساڭ دا تۇسىنىكپەن، كوڭىلىم كولگە اينالدى قۇسى بىتكەن قورقاسىڭ كەلە-كەلە ءبىزدىڭ ەلدە تۇك قالماي جۇرە مە دەپ كىسىلىكتەن. ءپاني جالعاننىڭ كۇنگەيى مەن كولەڭكەسى، جارىعى مەن تۇنەگى، جىلۋى مەن ىزعارى ۇزەڭگى قاعىسا جۇرەدى. وعان ەتىمىز ابدەن ۇيرەنىپ كەتكەن. قولدان كەلسە، كۆاركتار مەن كۆانتتارعا ءامىر ەتۋگە دە  ءازىرمىز. «ءيا»، - دەيمىن-اۋ. جوعارى كەرنەۋلى جەلى ىستەن شىقسا، ەلەكتر سىمى ۇزىلسە، ولاردىڭ ءبىر بۋىنىنا اقاۋ تۇسسە، ەلەكترومونتاجشى شىركىنىڭ ۇزاققا سوزباي، تاپ-تۇيناقتاي ەتىپ، لەكەرلەپ تاستايدى. الەۋمەتتىك قۇبىلىس، قوعامدىق جۇيە ونداي زاڭدىلىققا باعىنبايدى. ونىڭ ءبىر تىزبەگىن، ءبىر بۋىنىن عانا جۇتىندىرىپ، گۇلگە وراپ قويا المايسىڭ. ونى تۇتاستاي ۇستىرىكتەۋ، كۇردەلى جوندەۋ قاجەت. وسى جايتتى س.م. كيروۆ اتىنداعى قازاق مەملەكەتتىك ۋنيۆەرسيتەتىن، ودان سوڭ  ماسكەۋ جوعارعى پارتيا مەكتەبىن تاۋسىپ، قوعامدىق عىلىمداردى ءبىر كىسىدەي ۇعىپ كەلسە دە، كۇندەردىڭ كۇنى قازاقستان رەسپۋبليكاسىنىڭ ازاماتى ساكەن قۇسايىن ۇلى يماناسوۆ پارلامەنت دەپۋتاتتىعىنىڭ دوداسىنا ءتۇستى دە كەتتى. قيقۋ مەن دۇبىرگە قۇلاعى ەلەڭدەپ تۇراتىن ارعىماق تۇياق اقىننىڭ مىناداي الاشۇبار دۇرمەككە ىلەسۋى جاراسىمدى بولا قويار ما ەكەن دەسەم دە، ونىڭ ءوزى  باسشىلىق ەتكەن «قازاق مەملەكەتى» گازەتىنىڭ جەتى-سەگىز قىزمەتكەرى تۇگەلدەي تاقىمىمىزدى قىسىپ وتىرعانىمىز ايان. جۇرتى، ەلەكتوراتى ءاز ۇلىنىڭ مەسەلىن بۇل جولى دا قايتارمادى،  قوسقان اتى وزىپ كەلدى. ءسويتىپ عۇمىرى قىسقا پارلامەنتتىڭ دەپۋتاتىعىنا دا سايلاندى. وسى توتەن قادامنىڭ جۇمباعى نەدە؟ بالكىم، مۇنداي عاجابي قۇبىلىستى اقىننىڭ تومەندەگى جولدارىنان ىزدەگەن ءجون بولار: تۇرا تۇر سەن، تۇستاسىم، كىجىنبە دە، باسەڭ بولماق وزگەدەن ءجۇزىم نەگە؟ كىرمەگەن دە شىعارمىن، قولدان-قولعا كوشىپ جۇرگەن تۇراقتى تىزىمگە دە، ماسەلە – تىزىمدە مە؟ جاراتۋشى يەمنىڭ جاۋابىنان گورى سۇراعى مول ءوز سەنارييى بار. شاحمات تەورياسىنىڭ قالىبىنا سالساق، ومىرلىك پارتيا دەبيۋتتەن، ميتتەلشپيلدەن، ەندشپيلدەن قۇرالادى. جازمىش دەگەنمىز – سول ۇلى سانادان شىققان ۆيرتۋالدى سەناريي. ادامزات بالاسىنىڭ ونى رەداكسيالاۋعا كۇش-قايراتى قايدان جەتسىن. قاي فيگۋرانى تاقتادان قاي ۋاقىتتا الىپ تاستاۋدى دا اللا تاعالانىڭ ءوزى عانا بىلەدى. قايسىمىز فەرزىمىز، قايسىمىز پەشكادان فەرزىگە اياق باسامىز – ول جاعى دا بىزگە ءبيمالىم. مىنا جالپاق دۇنيەدەگى  ادامي ىرىزدىقتى  ۇلەستىرۋشىنىڭ ۇيعارىمى دا شاقشا باس پەندەنىڭ تانىمىنا ەش ساي كەلمەيدى. قانشاما جانىققانىمەن، قانشاما جەلىككەنىمەن، ءبىز – سول الپىس ءتورت شارشىنىڭ عانا ويىنشىسىمىز. سول اقيقاتتى، سول حاتتامانى اقىل-تۇيسىكپەن ءۇزىپ-ۇزىپ اجىراتساق تا، ءبىز بەيباق كۇرەس پەن تىرەستەن ەش جالىققان ەمەسپىز. كۇرت ازايىپ كەشەگى ب ا ق تا، ناز دا، اقتارىپ ەم بارلىعىن اق قاعازعا. – تالايىن دەپ اراداي اعايىننىڭ، الايىن دەپ القىمنان جاتقانى از با؟ تۇتقىن عۇرلى كورمەستەن تۇرمەدەگى، كوك جەلكەدەن كوپ ويلار بۇرگەن ەدى، اتىپ كەلە جاتتى ءبىر ادەمى تاڭ تالاتپايىن دەگەندەي تۇنگە مەنى.   تاپ-تاپ بەرىپ تۇنىمەن نەبىر قۋى، تۇرىنەن دە، تىلىنەن توگىلدى ۋى... ...ادام دەگەن وسى عوي، اتقان تاڭنىڭ جەلىكتىرە باستاپتى جەڭىل بۋى، - دەگەن ەكەن كەشە عانا تۇرعىلاستارىنىڭ اراسىندا اق الماستاي جارقىلداپ جۇرگەن قازاقتىڭ ءپىشىنى بولەك، سىمبات-سىرى ەرەك تاعى ءبىر ساكەنى، ساكەن يماناسوۆى! نە دەسەك تە، نە ويلاساق تا، مىنا جۇمىر جەر بەتىندەگى ادامدىقتىڭ، اقىندىقتىڭ عالامات ميسسياسى گرەك ميفتەرىندەگى تيتاندارداي وليمپ شىڭىندا شالقاقتاعاندارمەن ارپالىس، عاسىردان-عاسىرعا جالعاسا بەرەر  سۋسىنى تاۋسىلماس ءومىر جىرى ەمەس پە؟

 كاكەن قامزين،

فيلولوگيا عىلىمدارىنىڭ دوكتورى، پروفەسسور.