استىق ءتۇسىمىنىڭ تومەندىگى نان باعاسىنا بولار-بولماس اسەر ەتۋى مۇمكىن دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساپ.

اۋىل شارۋاشىلىعى ءبىرىنشى ۆيسە-مينيسترى ايداربەك ساپاروۆ: "نان باعاسىنا توقتالساق، ازىرگە ول تۇراقتى. الەۋمەتتىك ناننىڭ ءبىر بولكەسى – 78 تەڭگەدەن 85 تەڭگەگە دەيىن. بيداي باعاسى وسكەن جاعدايدا، الەۋمەتتىك-كاسىپكەرلىك كورپوراسيالار، اكىمدىكتەردىڭ تۇراقتاندىرۋ قورلارى، "ازىق-تۇلىك كەلىسىم شارت كورپوراسياسى" ىسكە قوسىلادى"، - دەدى.

ۆيسە-مينيستردىڭ پىكىرىنشە، ناننىڭ قىمباتتاۋى جايلى ايتۋ ءالى ەرتە.

"ەگىن ورۋ ناۋقانى ءالى ءجۇرىپ جاتىر، استىق القابىنىڭ شامامەن 20 پروسەنتى ورىلعان جوق. باعا وسكەن كۇننىڭ وزىندە، بولار-بولماس قانا كوتەرىلەدى. ءبىراق الەۋمەتتىك ناننىڭ باعاسى سول كۇيىندە قالادى، ويتكەنى ءقازىر اكىمدىكتەر تۇراقتاندىرۋ قورلارىنا ۇن ساتىپ الىپ، قامدانىپ جاتىر. الەۋمەتتىك نانعا قاتىستى پروبلەما كورىپ تۇرعان جوقپىز"، - دەدى ول.

مينيسترلىكتىڭ مالىمەتىنشە، ءقازىر 2،5 ميلليون توننادان استام استىق ەليەۆاتورلارعا جەتكىزىلگەن.

"بيداي ىلعالدى كۇيىندە ءتۇستى. الايدا وبلىستاردىڭ وتىنىشىمەن ۇكىمەت استىقتى كەپتىرۋ ءۇشىن قىرماندارعا تاعى 50 مىڭ توننا جانار-جاعارماي ءبولىپ جاتىر"، - دەدى ساپاروۆ.