2020 جىلى 200 مىڭ قازاقستاندىق ءۇشىن الەۋمەتتىك تولەم ارتادى. جاردەماقىسى 30% كوبەيەتىندەردىڭ قاتارىندا ەڭبەك ەتۋ قابىلەتىنەن ايىرىلعان، اسىراۋشىسىنان جانە جۇمىسىنان ايىرىلعان ازاماتتار بار دەپ جازادى Qamshy.kz اقپارات اگەنتتىگى sputniknews.kz دەرەگىنە سۇيەنىپ.

زاڭ جوباسىنىڭ نەگىزگى ماقساتى – مىندەتتى الەۋمەتتىك ساقتاندىرۋ جۇيەسىندەگى ەڭبەك ءوتىلى مەن تولەم مولشەرى اراسىنداعى بايلانىستى نىعايتۋ.

ەڭبەك مينيسترلىگى مۇگەدەكتەردى الەۋمەتتىك قورعاۋ دەڭگەيىن كوتەرۋ ءۇشىن ەڭبەككە جارامسىزدىق بويىنشا الەۋمەتتىك تولەمدەردىڭ مولشەرىن مەديسينالىق-الەۋمەتتىك ساراپتامادا ناقتى بەلگىلەنگەن ەڭبەككە جارامسىزدىق دارەجەسىنە سۇيەنە وتىرىپ انىقتاۋدى ۇسىنىپ وتىر.

اسىراۋشىسىز قالعان وتباسىلاردى الەۋمەتتىك قورعاۋدى ارتتىرۋ ءۇشىن اسىراۋىنداعى ادام سانى كوەففيسيەنتىن وزگەرتۋ ارقىلى الەۋمەتتىك تولەمدەر مولشەرىن ارتتىرۋ ۇسىنىلىپ وتىر. سونىمەن، اسىراۋىندا ءبىر ادام بولعاندا 40% -تەن 50% -كە دەيىن؛ ەكەۋ بولسا –50% -تەن 65% -كە دەيىن؛ ۇشەۋ بولسا – 60% -تەن 80% -كە دەيىن جانە ءتورت نەمەسە ودان دا كوپ بولسا – 80% -تەن 100%-كە ارتتىرۋ كوزدەلگەن.

تۇتاستاي العاندا، زاڭ جوباسىنا ۇسىنىلعان وزگەرتۋلەر الەۋمەتتىك تاۋەكەلدەردىڭ ءۇش ءتۇرى – ەڭبەككە جارامسىزدىق، اسىراۋشىسىنان ايرىلۋ جانە جۇمىسىنان ايىرىلۋ بويىنشا، ياعني 200 مىڭ الۋشى ءۇشىن الەۋمەتتىك تولەمدەردىڭ مولشەرىن ورتا ەسەپپەن 30% -عا ارتتىرادى.