امەريكا ساۋدا مينيسترلىگىنىڭ مالىمدەۋىنشە، جۇڭگو ۆيسە-پرەمەرى ليۋ حە بەيسەنبى كۇنى ۆاشينگتونعا ساۋدا كەلىسسوزدەرىن جۇرگىزۋگە بارادى. ول باستايتىن دەلەگاسيا قۇرامىنا ساۋدا ءمينيسترى، ورتالىق بانك جەتەكشىسى، يندۋستريا، تەحنولوگيا، اۋىلشارۋاشىلىعى مينيسترلىكتەرىنىڭ وكىلدەرى كىرەدى دەپ حابارلايدى Qamshy.kz اقپارات اگەنتتىگى inbusiness.kz دەرەگىنە سۇيەنىپ. 

كەلىسسوزدەر قارساڭىندا ەكى دەرجاۆا بىر-بىرىمەن تاتۋلاسۋعا دا ۇمتىلىسىن بايقاتىپ، جازالاۋشى تاريفتەردى الىپ تاستاۋعا نەمەسە كەيىنگە قالدىرۋعا نيەت تانىتىپ وتىر. الايدا تاراپتاردىڭ قىتايدىڭ ساۋدالىق جانە تەحنولوگيالىق امبيسيالارىنا قاتىستى وزەكتى ماسەلەلەر بويىنشا ءبىر شەشىمگە كەلۋى ەكىتالاي.

جۇڭگو مەملەكەتتىڭ كومەگى ارقاسىندا روبوتتىق جانە باسقا دا تەحنولوگيالار جاساۋدان عالامدىق باسەكەدە كوش باستاپ بارادى. سول ءۇشىن اقش وعان قارسى قىسىمدى كۇشەيتتى دەگەن بولجام بار. بەيجىڭ بولسا، بۇعان قارسىلىق كورسەتىپ وتىر. اقش، ەۋروپا، جاپونيا سياقتى ەلدەر وسى جاعداي ءۇشىن قىتايدى اشىق نارىق مىندەتتەمەلەرىن ورىنداماي وتىر دەپ كىنالاپ كەلەدى.

ال، كەيبىر امەريكالىق رەسمي وكىلدەردىڭ پىكىرىنشە، ادىلەتسىز باسەكە قۇراما شتاتتاردىڭ يندۋستريالدىق ليدەرلىگىن توقتاتۋى مۇمكىن. ەكى مەملەكەت ءبىر-بىرىنىڭ ميللياردتاعان دوللارلىق تاۋارلارىنا سالىقتى كوتەردى.  سونىمەن قاتار اقش-قىتاي ساۋدا سوعىسى الەم ەكونوميكاسىن رەسەسسياعا ۇرىندىرادى دەگەن ءقاۋىپ كۇشەيىپ كەلەدى.

ارىس ادىلبەك ۇلى