الماتىدا قازاقستاندا تىيىم سالىنعان دايش لاڭكەستىك ۇيىمىنىڭ جاقتاۋشىسى قاماۋعا الىندى دەپ جازادى Qamshy.kz اقپارات اگەنتتىگى ۇقك-نىڭ باسپا ءسوز قىزمەتىنىڭ دەرەگىن نەگىزگە الىپ.
"الماتى قالاسى المالى اۋداندىق قىلمىستىق سوتىنىڭ قازاقستان رەسپۋبليكاسىنىڭ ازاماتى ا.ج.بيتىمبايەۆتى تەرروريزم اكتىسىنە دايىندىق، تەرروريزمدى ناسيحاتتاۋ، ءدىني ارازدىقتى قوزدىرۋ جانە اتىس قارۋىن زاڭسىز ساقتاۋ فاكتىلەرى بويىنشا 10 جىلعا باس بوستاندىعىنان ايىرۋ تۋرالى ۇكىمى زاڭدى كۇشىنە ەندى" دەلىنگەن ۇقك-نىڭ حابارلاماسىندا.
كوميتەتتىڭ مالىمەتىنشە، ول ۇقك-نىڭ نازارىنا دەسترۋكتيۆتى ءدىني يدەولوگيانىڭ جاقتاۋشىسى جانە قازاقستان رەسپۋبليكاسىندا تىيىم سالىنعان دايش حالىقارالىق تەرروريستىك ۇيىمىنىڭ قولداۋشىسى رەتىندە كۇدىككە ىلىنگەن.
«تەرگەۋ بارىسىندا ينتەرنەتتەگى دايش ۇگىت-ناسيحاتىنىڭ اسەرىنەن جاپپاي تۇرعىندار ورىندارىندا جارىلعىش زاتتاردى قولدانا وتىرىپ، تەرروريستىك شابۋىل جاساۋعا دايىندالعانى انىقتالدى. شابۋىلدان كەيىن ول سيرياعا شەتەلدىك سودىرلاردىڭ قاتارىنا قوسىلۋدى جانە تەرروريستىك ارەكەتتەردى جالعاستىرعىسى كەلگەن. ءتىنتۋ كەزىندە ودان اتىس قارۋى مەن جاراقاتتاناتىن قارۋ، جارىلعىش قۇرىلعى جاساۋعا ارنالعان كومپونەنتتەر، ءۇش ساۋدا جانە ويىن-ساۋىق ورتالىعىنىڭ سحەمالارى، ماسكا مەن قولعاپ تابىلدى"، - دەپ جازدى ۇقك.
پىكىر قالدىرۋ