پرەزيدەنت ۇلتتىق قوردان بولىنەتىن ترانسفەرتتەردى بىرتىندەپ ازايتۋ قاجەتتىگىن ەسكەرتتى.
مەملەكەت باسشىسىنىڭ ايتۋىنشا، قورداعى قاراجاتقا اسا قاجەتتىلىك تۋىنداعان جاعدايدا عانا جۇگىنۋ كەرەك.
"ۇكىمەت ءبىرىنشى كەزەكتە رەسپۋبليكالىق بيۋدجەتتىڭ كىرىس بولىگىنە نازار اۋدارۋى قاجەت. ۇلتتىق بانك ۇلتتىق قورداعى ينۆەستيسيالىق تابىستىڭ ءتۇسىمىن ارتتىرۋ ماقساتىندا قاراجاتتى باسقارۋ جولدارىن قايتا قاراستىرۋعا مىندەتتى. اكتيۆتەردى دۇرىس باسقارۋ ۇلتتىق قوردىڭ كولەمىن ايتارلىقتاي ارتتىرا الادى"، – دەدى مەملەكەت باسشىسى.
سونداي-اق پرەزيدەنت بانكتەردىڭ جۇمىسىن دا سىنعا الدى. ولار الدەقايدا كوپ تابىس تابۋ ءۇشىن رەسۋرسىن تۇتىنۋشىلىق كرەديتكە باعىتتايدى. دەمەك، بيزنەستى نەسيەلەندىرۋ كولەمى ازايادى. توقايەۆ ۇلتتىق بانكتەگى اتالمىش ساياساتقا وزگەرىس ەنگىزۋى كەرەك ەكەنىن ايتتى.
"ۇلتتىق بانك وسى ساياساتقا شۇعىل وزگەرىس ەنگىزۋى ءتيىس. قارجى رەتتەۋشىسىنىڭ مالىمەتى بويىنشا، ەكونوميكانىڭ ءار سەكتورىنىڭ 50 پايىزدان استامى – بانكتەردىڭ مۇددەسىن كوزدەيتىن ورنىقتى ءارى قارجىلاي تاۋەلسىز كاسىپورىندار. الايدا، ولار بانك نەسيەلەرىن تارتۋعا قۇلىقسىز. نەگە؟ مۇمكىن كوممەرسيالىق بانكتەر بەلگىلەيتىن شارتتاردى ول كاسىپورىندار ءتيىمسىز دەپ سانايتىن شىعار. ۇلتتىق بانك الدىندا قارجى سەكتورىنىڭ تۇراقتىلىعىن قامتاماسىز ەتۋ نەمەسە ناقتى سەكتوردى نەسيەلەۋدى دامىتۋ تاڭداۋى تۇر. سوندىقتان ءتيىمدى شەشىم قابىلداۋى كەرەك، – دەدى پرەزيدەنت.
اقشا-كرەديت ساياساتىنىڭ ستراتەگياسى
پرەزيدەنت 2030 جىلعا دەيىنگى اقشا-كرەديت ساياساتىنىڭ ستراتەگياسىن جاساۋدى تاپسىردى. قاسىم-جومارت توقايەۆ ۇلتتىق بانكتى كوممۋنيكاسيا مەن ءاقپاراتتىق-تۇسىندىرۋ جۇمىستارىن جاقسارتۋعا شاقىردى. بۇل ءوز كەزەگىندە نارىققا قاتىسۋشىلار مەن تۇرعىنداردىڭ سەنىمىن ارتتىرىپ، ديەۆالۆاسياعا قاتىستى ءتۇرلى "بولجامنىڭ"الدىن الادى.
اقوردادا وتكەن وتىرىستا ەلدىڭ الەۋمەتتىك-ەكونوميكالىق دامۋىنىڭ قورىتىندىسى، اقشا-كرەديت ساياساتىن جۇزەگە اسىرۋ، اتاۋلى الەۋمەتتىك كومەك رەفورماسى مەن الەۋمەتتىك ماسەلەلەر تالقىلاندى.
پىكىر قالدىرۋ