بۇگىن پەريزات قايراتتىڭ سوت وتىرىسىندا كوكتەمگى سۋ تاسقىنى كەزىندە كورسەتىلگەن قايىرىمدىلىق كومەكە بايلانىستى ەپيزود قارالدى. قورعا قايرىمدىلىق جاسايمىز دەپ اقشا اۋدارعان 20-عا جۋىق جابىرلەنۋشىدەن جاۋاپ الىندى. 

جابىرلەنۋشىلەردىڭ اراسىندا نازاربايەۆ زياتكەرلىك مەكتەبىنىڭ اتا-انالارى دا بار. ولار سوتتتا جابىرلەنۋشى دەپ تانىلدى. اتالعان مەكتەپتىڭ اتا-انالار كوميتەتىنىڭ وكىلى ساۋلە قۋاندىقوۆا سوتتا 2024 جىلدىڭ ساۋىرىندە جينالعان 901 855 تەڭگە قورعا اۋدارعانىن مالىمدەدى.

"2024 جىلى مەن فيزيكا-ماتەماتيكا باعىتىنداعى نزم اتا-انالار كوميتەتىنىڭ ءتورايىمى بولدىم. ءبىز BizBirgemiz Qazaqstan 2030 قورىنىڭ جارنامالىق ناۋقانىنا سەنىپ، تاسقىننان زارداپ شەككەندەرگە اقشا جيناۋدى باستادىق. نزم اتا-انالارى ماعان سەنىم ارتتى، ال اقشانىڭ ماقساتىنا ساي جۇمسالماعانىن ەسكەرە وتىرىپ، مەن بۇل قارجى ءۇشىن تولىق جاۋاپكەرشىلىك ارقالاعاندىقتان، ونى وتەۋ كەرەك دەپ سانايمىن. بۇل قور Instagram ارقىلى ءجيى جارنامالاندى. ءبىز قاراپ، ونىڭ باسقا دا قايىرىمدىلىق ىستەرمەن اينالىسقانىن بىلدىك"، – دەدى ول. 

باسقا دا جابىرلەنۋشىلەردىڭ كەيبىرى اتالعان قورعا 8 ملن تەڭگە اۋدارعان. ولار زارداپ شەككەن وتانداستارىنا شىن نيەتىمەن كومەكتەسكىسى كەلگەنىن ايتتى. كۋاگەرلەردىڭ ەشقايسىسى پەريزاتپەن نەمەسە ونىڭ اناسىمەن جەكە تانىس بولماعان.

– اتىراۋ وبلىسىنداعى سۋ تاسقىنىنان زارداپ شەككەندەرگە بۇكىل حالىق بولىپ كومەكتەستىك. ءبىز تۋىستارىمىزبەن بىرگە 1 ميلليون تەڭگە جيناپ، قورعا اۋداردىق، – دەدى اقتاۋ تۇرعىنى.

ءقازىر جابىرلەنۋشىلەر ءوز اقشالارىن كەرى قايتارۋدى تالاپ ەتىپ وتىر.