بەلگىلى جۋرناليست، دوكۋمەنتاليست ءاليا ءاشىم ءوزىنىڭ facebook جەلىسىندەگى پاراقشاسىنا كەشىرىم سۇراپ جازبا جاريالادى. بۇعان دەيىن ونىڭ اباي قۇنانباي ۇلىنىڭ ءۇيىن تانىستىرىپ جۇرگەندەگى ۆيدەوسى كوپشىلىكتىڭ نارازىلىعىن تۋدىرعان ەدى. ول ءوز ارەكەتىنىڭ ابەستىك بولعانىن مويىندايتىنىن جەتكىزدى.
"سىزدەر — اكەم، اعا-اپكەلەرىممەن قاتار قاۋىم ءۇشىن “ابايدى قورلاعان قىز” دەگەن “اتاقپەن” قالامىن دەپ ەش ويلاماپپىن. فەيسبۋكتە سيرەك وتىرامىن، ءبىراق كەشەلى-بەرى ءوزىم سىيلايتىن، بوي تۇزەيتىن كەي ازاماتتاردىڭ پوستىن وقىپ جۇرەگىم اۋىرىپ وتىرعانى...
وسىندا تاراعان قارقارالىداعى ۆيدەونىڭ ابەس بولعانىن مويىندايمىن. ونى اۋىلداعى اكەم دە رەنجىپ، ەسكەرتتى. سوندىقتان تابالاۋ ەمەس، جاناشىرلىقپەن، ورىندى سىن ايتقان اعا-اپكەلەرىمنەن كەشىرىم سۇرايمىن"، دەپ جازدى جۋرناليست.
سونداي-اق وزىنە قاتىستى ايتىلعان "ابايدى قورلاۋ ماقساتىندا”، “قارالىم ءۇشىن”، “توپتار قارجىلاندىرادى” دەگەن پىكىرلەرگە دە جاۋاپ بەردى.
"شىن مانىندە، ءبىز — قازاقتىڭ مادەنيەتىن، تاريحىن بارىنشا ناسيحاتتاۋعا تىرىسىپ جۇرگەن كوماندامىز (ءوزىم سولاي دەپ ۇمىتتەنەمىن، ارىپتەستەر ايتسىن). اقش-قا وقۋعا كەتپەس بۇرىن قازاقشا كونتەنت، تاريحي دەرەكتى فيلمدەر ءۇشىن ءبىراز بيزنەس وكىلدەرىنىڭ ەسىگىن قاعىپ، سەرىكتەستىك ۇسىناتىن ەدىك. قانشاما پرەزەنتاسيا، پيچيڭ وتتىك. قولداعاندار ءبىرلى-جارىم بولدى. كەيىن ەلگە ورالعان سوڭ، ۇكىمەتتەن، ەشبىر توپتان اقشا الماي، تازا قازاق كونتەنتىن كوممەرسياليزاسيالاۋعا بارىمىزدى سالدىق. قازىرگى تاڭدا Freedom Holding Corp.، Bi Group، Aviasales، Sandyq Group، Halyq Bank ىسپەتتى ءىرىلى-ۇساق ءبىراز كومپانيالاردىڭ جارنامالىق ماتەريالدارىن جاساپ، ودان تۇسكەن قارجىنى تۇتاس اعارتۋشىلىق جوبالارعا سالىپ ءجۇرمىز. (اعارتۋشىلىق جوبالارعا ەش ۇيىمنىڭ ىقپالى جوق) وسى كۇنگە دەيىن (تازا ءوز قارجىمىزعا) “قونايەۆ ءداۋىرى”، “ءبىز نەگە ورىسشا سويلەيمىز؟”، “جەلتوقسان” دەرەكتى فيلمدەرىن تۇسىردىك. كەيىن ءدال وسى تاقىرىپتاردى الەۋمەتتىك جەلىدە (TikTok، Instagram) بارىنشا جاستار قىزىعاتىنداي فورمادا بەرىپ كەلدىك."، دەلىنگەن ءاليا ءاشىمنىڭ جازباسىندا.
