قازاقستاندىق ءارتىس قايرات كەمالوۆتىڭ قايتىس بولعانى بەلگىلى بولدى. ونىڭ قازاسى تۋرالى قاراعاندى وبلىسىنىڭ اكىمى حابارلادى.  ەرماعانبەت بولەكپايەۆ Instagram-پاراقشاسىندا مارقۇمدى ەسكە الىپ، جازبا جاريالادى.

"69 جاسقا قاراعان شاعىندا قازاقستاننىڭ ەڭبەك سىڭىرگەن قايراتكەرى، كورنەكتى اكتەر قايرات كەمالوۆ ومىردەن ءوتتى. ول بۇكىل سانالى عۇمىرىن تەاتر سالاسىنا ارنادى. قايرات كەمالوۆتىڭ ونەردەگى مانسابى قاراعاندىدا باستالعان ەدى. ونىڭ ونەردەگى جەتىستىكتەرى حالىقارالىق دارەجەدە جوعارى باعالانىپ، ءتۇرلى ماراپاتتارعا يە بولدى. ول ءتۇرلى تاريحي وبرازداردى سومداۋدا اكتەرلىك شەبەرلىگىمەن كورىنە ءبىلدى"، – دەپ جازدى اكىم.

قايرات كەمالوۆ – اكتەر، قازاقستاننىڭ ەڭبەك سىڭىرگەن قايراتكەرى. inkaraganda.kz سايتىنىڭ مالىمەتىنشە، ول 1957 جىلى 8 قاڭتاردا قاراعاندى وبلىسىنداعى اقتۇبەك اۋىلىندا دۇنيەگە كەلگەن. الماتى، قاراعاندى جانە استانا تەاترلارىندا جۇمىس ىستەگەن. 1995 جىلدان بەرى ساكەن سەيفۋللين اتىنداعى قاراعاندى وبلىستىق قازاق دراما تەاترىنىڭ اكتەرى بولدى. ونىڭ جارقىن جوبالارىنىڭ ءبىرى – "التىن تاق" (2019) ءفيلمى.