جەتىسۋ وبلىسى اقسۋ اۋدانى بالاساز اۋىلىندا 32 جاستاعى ايزات جۇمانوۆانىڭ كىشكەنتاي قىزىنىڭ كوز الدىندا ولتىرىلگەنى حابارلاندى. بۇل قايعىلى وقيعامەن جۋرناليست ساندۋعاش دۇيسەنوۆا ءوزىنىڭ ينستاگرام پاراقشاسىندا ءبولىستى. قىلمىسقا كۇدىكتى رەتىندە ونىڭ كۇيەۋى – ايبار جانبولات تانىلىپ وتىر،

تۋىستارىنىڭ ايتۋىنشا العاشىندا ەرلى-زايىپتىلار اراسىندا جانجال بولعان كەيىن بۇل كيكىلجىڭ بىرنەشە ساعاتقا سوزىلعان جانتۇرشىگەرلىك قورلىققا ۇلاسقان. كۇيەۋى ايەلىن اياۋسىز سوققىعا جىققان. 

سونداي-اق جاقىندارى ايزاتتىڭ قولىن ارقانمەن اتتىڭ ەرىنە بايلاپ، دالادا سۇيرەپ جۇرگەنىن ايتقان. 

"ەسكى ءولىم سالتتارى سەكىلدى ونى بايلاپ سۇيرەپ جۇرگەن. دەنەسىنىڭ ساۋ-تامتىعى قالمادى"، دەگەن كوز جاسىن تىيا الماعان اناسى سالتانات جۇمانوۆا. 

ايزاتتىڭ كۇيەۋى – شارۋا قوجالىعىن جۇرگىزەدى. ونىڭ ءىرى جىلقى شارۋاشىلىعى بار. ايزات بىرنەشە دەنە جاراقىن العان: تىزە تەرىسىنىڭ جىرتىلۋى، ساۋساقتاردىڭ شىعىپ كەتۋى مەن سىنۋى، ءسىڭىردىڭ ءۇزىلۋى، تەرىنىڭ سىپىرىلىپ، قانعا بويالۋى. بۇل ايزاتتىڭ ساعاتتار بويى ازاپتالعانىن كورسەتەدى. 

مارقۇمنىڭ ءسىڭىلىسى ءمايىتتى جۋىندىرۋ كەزىندەگى كورگەن سۇمدىق جايتپەن ءبولىستى:

"كيىمىن شەشكەن كەزدە جىلاماي تۇرا المادىق. انام سول جەردە ەسىنەن تانىپ قالدى. دەنەسىندە ساۋ جەر جوق ەدى. ءبىر دە ءبىر…"، دەيدى ايزاتتىڭ ءسىڭىلىسى. 

ال تاتەسى راۋشان داۋرەنبەكوۆا ايزاتتىڭ ساعاتتار بويى ازاپتالعانىنا سەنىمدى. 

"ءوزىم 30 جىل فەلدشەر بولىپ ىستەدىم. مۇنداي جاراقاتتار قۇلاۋ نە توبەلەستەن بولمايدى. بۇل جەرگە سۇيرەلگەننەن قالعان"، دەگەن ول. 

ايزاتتىڭ جاقىنداعى قورقىنىشتى وقيعانىڭ كۋاسى بولعان 2 جاسار قىزدىڭ ءالى پسيحولوگيالىق شوكتا ەكەنىن ايتتى.

– ەشتەڭە ايتپايدى، تەك باسىن ۇستاپ الىپ، «ماما، ماما» دەپ كۇبىرلەي بەرەدى. كولەڭكەدەن قورقادى، تۇندە ۇيىقتامايدى. ءبارىن كوردى، ءبىراق سويلەي المايدى، – دەيدى تۋىستارى.