قورعانىس مينيسترلىگى "بەكەت-اتا" پوليگونىندا بولعان جاعدايعا قاتىستى تۇسىنىكتەمە بەردى. قازاقستان قارۋلى كۇشتەرى باس شتابىنىڭ ورىنباسارى، گەنەرال-مايور ادىلبەك الدابەرگەنوۆ وقيعانىڭ سەبەبى مەن بارىسىن باياندادى.
قازاقستان قارۋلى كۇشتەرى باس شتابىنىڭ ورىنباسارىنىڭ ايتۋىنشا، كوشەليەۆ گراناتانىڭ جارىلعىش مۇرىندىعىن تارتىپ، تەتىگىن ىسكە قوسقان. ال دىبىسىن ەستىگەننەن كەيىن راديوستانسيانىڭ استىنا سالعان.
"قولداعى بار مالىمەتىمىز بويىنشا 2019 جىلدىڭ 17 شىلدەسىندە وتكىزەتىن ساباق كەستەسىنە سايكەس، "بەكەت-اتا" وقۋ-جاتتىعۋ پوليگونىندا جەكە قۇراممەن ارنايى وقۋ-جاتتىعۋ وتكىزىلدى. بايلانىسشى، مەرزىمدى قىزمەتتەگى قاتارداعى جاۋىنگەر كوشەليەۆ بايلانىسشىلارعا جابدىقتى كورسەتۋ ءۇشىن وقۋ-جاتتىعۋعا تارتىلعان بولاتىن. ەشقانداي جاۋىنگەرلىك تاپسىرمانى ورىنداۋى ءتيىس ەمەس ەدى. ساباققا دايارلىق جۇرگىزۋ كەزىندە كوشەليەۆ بۇيرىقسىز وق-دارىگە جاقىنداپ، ف-1 گراناتاسىن قولىنا الدى"، - دەيدى الدابەرگەنوۆ.
الايدا بەينەلەۋ پوليگونىندا جارىمجان بولىپ قالعان سارباز سەرگەي كوشەليەۆ بۇل ايتىلعاندارمەن كەلىسپەيدى. ونىڭ سوزىنشە، وقۋ-جاتتىعۋ جاسايتىن جەردە گراناتا اشىقتان-اشىق قاراۋسىز جاتقاندىقتان، ول ونى وقۋ قۇرالىمەن شاتاستىرعان.
"كوشەليەۆپەن بىرگە بورىشىن وتەپ جۇرگەندەردىڭ ايتۋىنشا، جاۋىنگەرلىك گراناتا ەكەنى ەسكەرتىلگەن. جارىلىس سالدارىنان راديوستانسيا ماڭىنداعى قاتارداعى جاۋىنگەرلەر كوشەليەۆ پەن جامانبايەۆ جاراقات الدى. جاقىن ماڭداعى باسقا اسكەري قىزمەتشىلەر زارداپ شەكپەگەنمەن، ولارعا دا ءقاۋىپ تونگەن. زارداپ شەككەن كوشەليەۆ پەن جامانبايەۆقا بارلىق قاجەتتى مەديسينالىق جانە پسيحولوگيالىق كومەك كورسەتىلدى"، - دەدى گەنەرال-مايور.
قورعانىس ءمينيسترى نۇرلان ەرمەكبايەۆ تا ماسەلەگە بايلانىستى پىكىرىن ءبىلدىردى. ءمينيستردىڭ سوزىنشە، قارالىپ جاتقان بولجامداردىڭ ءبىرى – اسكەري قىزمەتشىنىڭ قاۋىپسىزدىك تالاپتارىن بۇزۋى.
مينيستر ەگەر بۇل بولجام دالەلدەنسە، اسكەري ءبولىمنىڭ ساربازدان كەلتىرىلگەن شىعىندى قايتارۋدى تالاپ ەتۋگە قۇقىعى بار. ەرمەكبايەۆ بۇل ماسەلە تەرگەۋ اياقتالعاننان كەيىن ناقتى قارالاتىنىن ايتتى.
ەسكە سالا كەتسەك، وقيعا وسى جىلدىڭ 17 شىلدەسىندە بولعان ەدى. ماڭعىستاۋ وبلىسىنداعى پوليگوندا وتكەن وقۋ-جاتتىعۋ كەزىندە گراناتا جارىلىپ، № 99116 اسكەري ءبولىمنىڭ ەكى ساربازى زارداپ شەكتى. كوشەليەۆ قولى مەن كوزىنەن ايىرىلدى. ەكىنشى سارباز بەيبارىس جامانبايەۆتىڭ اناسى پرەزيدەنتكە حات جازىپ، وسى وقيعانى جەكە باقىلاۋعا الۋدى سۇراعان بولاتىن.
پىكىر قالدىرۋ