لوندون سوتى "پوليسەيگە شابۋىل جاسادى" دەپ ايىپتالعان قازاقستاننىڭ بۇرىنعى پرەزيدەنتىنىڭ جيەنى ايسۇلتان نازاربايەۆتى ءبىر جىل شارتتى جازاعا كەستى دەپ حابارلادى 18 قازاندا BBC ارناسى.

ايسۇلتان نازاربايەۆ – داريعا نازاربايەۆا مەن اۆستريا تۇرمەلەرىنىڭ بىرىندە كوز جۇمعان راحات الييەۆتىڭ ۇلى. ول - ۇلىبريتانيا كورولدىگىنىڭ «ساندحەرست» اسكەري اكادەمياسىن تۇلەگى. ايسۇلتان نازاربايەۆ وقۋىن ءبىتىرىپ، قازاقستانعا ورالعان سوڭ ەلدىڭ قورعانىس مينيسترلىگىنىڭ بارلاۋ باسقارماسىندا قىزمەت ەتكەن. 2017 جىلى جەتى ايداي قازاقستان فۋتبول فەدەراسياسى ۆيسە-پرەزيدەنتى قىزمەتىن اتقارعان. سوڭعى ءبىر جارىم جىلداي ول جۇرت نازارىنا شىقپاي كەتكەن.

ماۋسىم ايىندا قازاقستاننىڭ ءبىرىنشى پرەزيدەنتى نۇرسۇلتان نازاربايەۆتىڭ جيەنى، داريعا نازاربايەۆانىڭ ۇلى ايسۇلتان نازاربايەۆ لوندوندا ەسىرتكىنىڭ كۇشىمەن پوليسيا قىزمەتكەرلەرىنە قارسىلىق كورسەتىپ، ولاردىڭ ءبىرىن تىستەپ الدى دەپ ايىپتالعان ەدى. تەرگەۋ ورىندارىنىڭ دەرەگىنشە، پوليسەيدىڭ قولىندا كادىمگىدەي ءىز قالىپ، قان اققان.

 نازاربايەۆ ەسىرتكىدەن ەمدەلگەن Priory ەمحاناسىنىڭ دەرەگىنە سايكەس، ناۋقاس دارىگەرلەردىڭ نۇسقاۋلىعىن مۇقيات ورىنداپ، ەمدەۋ كەزىندە ودان ىلگەرىلەۋشىلىك بايقالعان. سۋديا سونى ەسكەرىپ، ونىڭ تۇرمەدەن گورى بوستاندىقتا ءجۇرىپ ەمدەلگەنى دۇرىس بولادى دەپ ۇكىم شىعارعان. نازاربايەۆتىڭ ادۆوكاتىنىڭ ايتۋىنشا، ەكس-پرەزيدەنتتىڭ جيەنى "سوت ۇكىمىن ەستىگەن سوڭ اۋىر جۇك موينىنان تۇسكەندەي سەزىنگەن". نازاربايەۆتىڭ ءوزى BBC-گە تۇسىنىكتەمە بەرۋدەن باس تارتقان. 

سوت وعان 18 اي سىناق مەرزىمىن بەرگەن: ەگەر بۇل ۋاقىت ارالىعىندا زاڭ بۇزسا، شارتتى جازا تۇرمە جازاسىنا اينالماق. سوت ۇكىمىنە سايكەس، ول 140 ساعات قوعامدىق جۇمىس ىستەۋى ءتيىس، ەسىرتكىگە تاۋەلدىلىكتەن ارىلۋ بويىنشا 20 سەسسياعا قاتىسۋعا مىندەتتى. بۇعان قوسا، سوت ونى مىڭ فۋنت كولەمىندە (شامامەن 1100 دوللار) ايىپپۇل تولەپ، 5000 فۋنت كولەمىندە شىعىندى وتەۋگە مىندەتتەدى.