قوعام تاريحىندا ادام مەن ءسان ەگىز ۇعىم. جالپى ءسان دەگەنىمىز –  ءومىردىڭ ءار ءتۇرلى سفەراسىندا جەكە تالعامنىڭ ۋاقىتشا ۇستەمدىك ەتۋى. ياعني ادامدار اراسىنداعى الەۋمەتتىك ءھام ەكونوميكالىق قۇبىلىس.

ادام قوعامىنىڭ دامۋىنا، جاڭا تاريحي قوعامداستىقتار پايدا بولۋىنا بايلانىستى ادام كيىمى دە تۇبىرىمەن وزگەرىپ وتىرادى. قازىرگى ءساندى دەموكراتياشىل دەۋگە دە بولادى، سەبەبى قازىرگى تاڭداۋ يدەياسى مەن ەركىندىكتىڭ كوپتىگىمەن، ءارتۇرلى ستيلدەرىمەن، پىشىندەرىمەن، ۇلگىلەرىمەن، كولەمدەرىمەن، كيىم ۇزىندىعىمەن، الۋان ءتۇستى گاممالىعىمەن ەرەكشەلەنەدى.

قازىرگى ۋاقىتتا ءسان ەكى باعىت بويىنشا ايرىقشا كوزگە تۇسەدى. اتاپ ايتساق، رەتروسپەكتيۆالى (وتكەنگە باعىتتالعان) جانە پەرسپەكتيۆالى (بولاشاققا باعىتتالعان).

ساندە بەلگىلى مەرزىم ۋاقىتىنا قاراي ترەندتەر وزگەرىسكە ۇشىرايدى.  ەندەشە، 2019-2020 كۇز-قىس ماۋسىمىنداعى ءسان ماۋسىمىنىڭ ترەندى قانداي بولماق؟ ءساندى كورىنۋ ءۇشىن قانداي كيىم كيگەن دۇرىس؟ اتالمىش سۇراقتارعا Qamshy.kz اقپارات اگەنتتىگىنىڭ ءتىلشىسى مامان پىكىرى ارقىلى جاۋاپ ىزدەدى.

ديزاينەر داميليا جۇمابەك:

"2019-2020 ءسان الەمىندەگى كيىمدەر كەڭدىگىمەن ەرەكشەلەنەدى. ناقتىراق ايتاندا كەڭ شالبارلار  مەن دجينسى ماتادان تىگىلگەن ءارتۇرلى كيىمدەر، كەڭ قىرى بار كلاسيكالىق شالبارلار، كەڭ ۇلگىدەگى كويلەكتەر مەن ءتۇرلى بەلدەمشەلەر، تور ۇلگىدەگى جەيدە ءتارىزدى كوفتالار، يىقتارى كەڭ  ۇلگىدەگى كويلەكتەر، كەڭ  پىشىندە توقىلعان كۇرتەلەر ساندە.  

ال كيىمنىڭ ءتۇسى اق پەن قارا. سونداي-اق تور ماتالاردان تىگىلگەن كيىمدەردە بيىلعى ءساننىڭ وزىق ۇلگىسىندەگى قاتاردان ورىن الدى.

سىرت كيىمدەرگە كەلسەك،  بىر-ەكى ولشەمدە كەڭ كيسەڭىز، ەرەكشەلەنەسىز. ودان وزگە پارچا ماتادان تىگىلگەن  كۇرتەشەلەر،  ەرلەر كيىمى سەكىلدى پىشىلگەن كەڭ ۇلگىدەگى كاستيۋمدەر ساندە.

اياق كيىمدەردەن ءتۇرلى سپورتتىق ۇلگىگە كەلەتىن ەتىكتەر، فورماسى جاعىنان باس جاعى جالپاقتاۋ اياق كيىم كيسەڭىز، ترەند قاتارىنان قالمادىڭىز دەگەن ءسوز.  ال اشەكەيلەردەن ۇلكەن سىرعالار مەن ءتۇرلى ورامالدار قايتا سانگە كەلدى".

ەسكە سالساق، ءداستۇرلى تۇردە وتەتىن KFW ءسان اپتالىعى 29-31 قازان كۇندەرى الماتى قالاسىندا وتەدى. شارادا وتاندىق جانە شەتەل ديزاينەرلەرىنىڭ ءسان توپتاماسى كورسەتىلەدى.