قازاقستان پارلامەنتى سەناتىنىڭ ءتوراعاسى داريعا نازاربايەۆا رەسەيگە ساپارى بارىسىندا ەكى ەل ازاماتتارىنىڭ ءوزارا ساپارلارى ماسەلەسىندە بىردەيلىكتىڭ (پاريتەت) جوقتىعىن ايتتى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.

ونىڭ پىكىرىنشە، قازاقستان مەن رەسەيگە كەلەتىندەرگە بىردەي مۇمكىندىكتەر جاساۋ قاجەتتىلىگى تۋرالى ماسەلە شەشۋدى تالاپ ەتەدى.

"2014 جىلدان بەرى بىزدە قازاقستان ازاماتتارىنىڭ رەسەيدە جانە رەسەي ازاماتتارىنىڭ قازاقستاندا بولۋىنا قاتىستى بىردەيلىك جوق. ياعني قازاقستان ازاماتتارى ۆيزا رەجيمىندە رەسەي فەدەراسياسىندا 90 كۇن تۇرعاننان كەيىن ەلدەن كەتىپ، قايتا كەلۋ ءۇشىن 90 كۇن كۇتۋى كەرەك. ال رەسەي ازاماتتارى قازاقستان اۋماعىندا 90 كۇن بولعاننان كەيىن ەلدەن كەتىپ، سول كۇنى قايتا ورالىپ، تاعى 90 كۇن سوندا تۇرا الادى"، - دەدى داريعا نازاربايەۆا فەدەراسيا كەڭەسىنىڭ ءتوراعاسى ۆالەنتينا ماتۆيەنكومەن كەزدەسۋدە.

ونىڭ ايتۋىنشا، قازىرگى ۋاقىتتا بۇل ماسەلەنى رەسەيلىك تاراپ قاراستىرىپ جاتىر.

"رەسەيگە ءار ءتۇرلى سەبەپتەرمەن كەلەتىن ازاماتتاردىڭ اعىنى وتە قارقىندى ءجۇرىپ جاتىر، مۇندا بيزنەستەن باستاپ ءبىلىم بەرۋگە دەيىن ءتۇرلى قىزمەتپەن اينالىسقىسى كەلەتىندەر كوپ. ءبىز سىزدەن وسى ماسەلەنى شەشۋگە كومەك سۇرايمىز"، - دەپ اتاپ ءوتتى داريعا نازاربايەۆا.

قازاقستان پارلامەنتى سەناتىنىڭ سپيكەرى رەسەيگە رەسمي ساپارمەن باردى. ساپار باعدارلاماسىندا رەسەي فەدەراسياسىنىڭ پرەمەر-مينيسترى دميتريي مەدۆەديەۆ كەزدەسۋ جوسپارلانعان.