پرەزيدەنتتىڭ باسپا ءسوز حاتشىسى پىكىرتالاس تۋدىرعان ادىلەت ءمينيسترى مارات بەكەتايەۆتىڭ سوزىنە قاتىستى تۇسىنىكتەمە بەردى.
ەسكە سالساق، مينيستر كادرلىق تاعايىنداۋلارعا قاتىستى "سوڭعى شەشىم – قاۋىپسىزدىك كەڭەسىنىڭ قۇزىرەتىندە" دەگەن پىكىر ايتقان بولاتىن.
"ادىلەت ءمينيسترىنىڭ تۇسىندىرمەسىن قيسىنسىز دەپ سانايمىن. مۇمكىن بەكەتايەۆ مىرزا تىلشىلەردىڭ قىسىمىنان ابدىراپ قالىپ، قاتە تۇجىرىم جاساعان بولار. دەگەنمەن، مۇنداي جوعارى دەڭگەيدەگى لاۋازىمدى تۇلعا كەز كەلگەن ماسەلەنى ءوزىنىڭ فۋنكسيونالدىق مىندەتى اياسىندا ءارقاشان بىلىكتىلىكپەن ءتۇسىندىرۋى ءتيىس"، – دەدى بەرىك ءۋالي.
سونداي-اق باسپا ءسوز حاتشىسى بۇل ماسەلەگە تۇبەگەيلى نۇكتە قويعىسى كەلەتىنىن اتاپ ءوتتى.
"كونستيتۋسيا – نەگىزگى زاڭ. قۇجاتتا مەملەكەت باسشىسىنىڭ فۋنكسياسى مەن وكىلەتتىلىگى انىق جازىلعان. ءارتۇرلى كوزقاراس تۋعىزعان 2019 جىلدىڭ 9 قازانداعى جارلىقتىڭ ەرەجەسى بار. سوعان سايكەس، پرەزيدەنت "قازاقستان رەسپۋبليكاسىنىڭ مەملەكەتتىك ساياسي قىزمەتشىلەرى مەن وزگە دە لاۋازىمدى ادامدارىن قىزمەتكە كەلىسۋ، قىزمەتكە تاعايىنداۋ جانە قىزمەتتەن بوساتۋ ءتارتىبى تۋرالى ەرەجەدە" كورسەتىلگەن پروسەدۋرالاردان تىس شەشىمدەردى قابىلداۋعا قۇقىلى"، – دەدى ب. ءۋالي.
"ول تەك پرەزيدەنت مەملەكەتتىڭ باستى لاۋازىمدى تۇلعاسى، كونستيتۋسيانىڭ كەپىلى، جوعارعى باس قولباسشىسى ەكەنىن اتاپ ءوتتى. ياعني تەك پرەزيدەنت كونستيتۋسياعا سايكەس، ۇكىمەت مۇشەلەرىن، كۇشتىك قۇرىلىم باسشىلارى مەن وزگە دە ۆەدومستۆولاردىڭ جەتەكشىلەرىن، سونداي-اق، وڭىرلەردىڭ باسشىلارىن تاعايىنداۋعا قاتىستى شەشىمدەردى قابىلدايدى" – دەپ تۇيىندەدى ءوز ءسوزىن پرەزيدەنتتىڭ باسپا ءسوز حاتشىسى.
پىكىر قالدىرۋ