ەڭبەك جانە حالىقتى الەۋمەتتىك قورعاۋ مينيسترلىگى زەينەتاقى جيناقتارىن مەرزىمىنەن بۇرىن پايدالانۋعا قاتىستى بىرنەشە ۇسىنىس جاسالعانىن مالىمدەدى. بۇل تۋرالى Qamshy.kz اقپارات اگەنتتىگى  حابارلايدى.

ۇكىمەت وتىرىسىنان كەيىن جۋرناليستەرگە سۇحبات بەرگەن ۆيسە-مينيستر ءاقمادي سارباسوۆ وسى ماسەلەنى تالقىلاۋ بارىسىندا بىرنەشە ۇسىنىس قارالعانىن، ءبىراق، ۆيسە-مينيستر ناقتى قانداي ۇسىنىستار ەكەنىن ايتپادى. سەبەبى، ونىڭ ايتۋىنشا  جۇمىس توبى ءالى ءبىر شەشىمگە كەلمەگەن.

"زەينەتاقى جيناقتارى باسپانا مەن بىلىمگە جۇمسالۋى قاجەت. تاپسىرما سولاي بولدى. وسىعان بايلانىستى جيناقتاردى پايدالانۋدىڭ سان الۋان جولدارى قارالىپ جاتىر. ءبىراق ازىرشە ناقتى نۇسقالار جوق. بارلىق ۇسىنىستى جان-جاقتى زەردەلەۋ كەرەك. سەبەبى ءاربىر ادامنىڭ جيناعان زەينەتاقى جارناسى ءارتۇرلى"، – دەيدى سارباسوۆ.

ونىڭ ايتۋىنشا، ناقتى ۇسىنىستار جىلدىڭ اياعىنا دەيىن ازىرلەنەدى.

"بىزدە تاپسىرما بار. جىلدىڭ سوڭىنا دەيىن ناقتى ۇسىنىستار دايىن بولادى. جۇمىس توبىنىڭ جۇمىسى جالعاسىپ جاتىر. ءبىر ايدىڭ ىشىندە كەيبىر ماسەلەلەر پىسىقتالادى دەپ ويلايمىن. ەندى، ءدال ءقازىر ءوزارا كەلىسىلگەن ۇسىنىستار جوق. سول سەبەپتى ازىرشە ەشتەڭە ايتا المايمىن"، – دەپ ءسوزىن قورتىندىلادى سارباسوۆ.

ەسكە سالساق، قىركۇيەك ايىندا  پرەزيدەنت قاسىم-جومارت توقايەۆ زەينەتاقى جيناقتارىن پايدالانۋعا قاتىستى تاپسىرما بەرگەن بولاتىن.

"ۇكىمەتكە جىلدىڭ اياعىنا دەيىن جۇمىس ىستەيتىن ازاماتتار ءۇشىن زەينەتاقى جيناقتارىنىڭ ءبىر بولىگىن ماقساتتى پايدالانۋ ماسەلەسىن پىسىقتاۋدى تاپسىرامىن. ماسەلەن، ول اقشانى باسپانانى ساتىپ الۋعا جانە ءبىلىم الۋعا جۇمساۋعا بولادى"، – دەدى مەملەكەت باسشىسى.