مەملەكەتتەن ساتىپ الۋ قۇقىعىنسىز، جالدامالى پاتەردى 5 جىل مەرزىمگە العان جاستار باسپانا بويىنشا باسقا باعدارلامالارعا قاتىسا المايدى، – دەپ Qamshy.kz اقپارات اگەنتتىگى حابارلايدى.

"وسى باعدارلاما ارقىلى جاستار جالدامالى ءۇيدى الىپ جاتسا، ول ۇمىتكەر باسپانا بويىنشا ەكى تىزىمدە بولا المايدى. ياعني  باسپانا بويىنشا باسقا باعدارلامالارداعى كەزەكتەن شىعارىلادى. جالدامالى ۇيگە يە بولعان ازامات "7-20-25" سەكىلدى نەمەسە باسقا دا اكىمدىكتىڭ باعدارلاماسىندا تۇرسا، ولاردان اۆتوماتتى تۇردە الىنىپ قالادى. تەك ءبىر تىزىمدە بولادى"، – دەدى اقپارات جانە قوعامدىق دامۋ مينيسترلىگىنىڭ جاستار جانە وتباسى ىستەرى بويىنشا كوميتەت ءتوراعاسىنىڭ ورىنباسارى شاحماردان بايمانوۆ ەلوردا اكىمدىگىنىڭ باسپا ءسوز ورتالىعىنداعى بريفينگتە.

ەسكە سالساق، 5-10 قاراشا ارالىعىندا ەلوردادا جۇمىس ىستەيتىن جاستاردان ساتىپ الۋ قۇقىعىنسىز جالدامالى پاتەر بويىنشا ءوتىنىش قابىلدانادى. ءوتىنىش تەك ەلەكتروندى تۇردە Smart Astana پورتالى ارقىلى قابىلدانادى.