ءبىلىم جانە عىلىم مينيسترلىگى ەلىمىزدىڭ جوعارى وقۋ ورىندارىن تەكسەرۋدى جالعاستىرۋدا، – دەپ Qamshy.kz اقپارات اگەنتتىگى حابارلايدى

"بۇگىنگى تاڭدا باعالاۋ جۇيەسىنىڭ تىزبەسىنە ەنگەن 13 ۋنيۆەرسيتەت تەكسەرىلدى. ولاردىڭ بەسەۋىندە بۇعان دەيىنگى ەسكەرتۋلەر جويىلماعاندىقتان، بەس ۋنيۆەرسيتەتتىڭ ليسەنزياسى ءبىر ايعا توقتاتىلدى"، – دەپ اسحات ايماعامبەتوۆ facebook پاراقشاسىندا جازدى.

سونداي-اق مينيستر 12 جوعارى وقۋ ورنىنا ايىپپۇل سالىنىپ، ءبىر ۋنيۆەرسيتەت بويىنشا ءىس سوتقا جىبەرىلگەنىن ايتتى.

"جىل سوڭىنا دەيىن تاعى 12 جوعارعى وقۋ ورنى بويىنشا بۇرىن بەرىلگەن نۇسقامالاردىڭ ورىندالۋىن تەكسەرۋدى جوسپارلاپ وتىرمىز. بۇزۋشىلىقتار قايتا انىقتالعان جاعدايدا، ليسەنزيادان ايىرۋ جانە جوعارى وقۋ ورنىن جابۋ ءۇشىن قۇجاتتار سوتقا جىبەرىلەدى"، – دەپ تولىقتىردى ايماعامبەتوۆ.

ءمينيستردىڭ مالىمدەۋىنشە، پرەمەر-مينيستردىڭ وكىمىنە سايكەس ۇكىمەت جانىنان جوعارى وقۋ ورىندارىن وڭتايلاندىرۋ كوميسسياسى قۇرىلعان.

"بۇگىندە كوپ بەيىندى ۋنيۆەرسيتەتتىڭ بارلىعى مۇعالىمدەردى دايارلايدى. الايدا ولاردىڭ ساپاسى سىن كوتەرمەيتىندىكتەن، قويىلاتىن تالاپتاردى كۇشەيتۋ ارقىلى مۇعالىمدەردى دايارلايتىن جوعارعى وقۋ ورنى سانىن 85-تەن 20-25-كە دەيىن قىسقارتۋ جوسپارلانىپ وتىر"، – دەدى ءبىلىم ءمينيسترى.

"سوندىقتان مينيسترلىك وسىنداي جاعدايلار مەن جاۋاپكەرشىلىگى تومەن جوعارعى وقۋ ورنى قاتىستى قاتاڭ ساياسات جۇرگىزۋدە. البەتتە، بۇل شارالار بارلىعىنا بىردەي ۇناماي بەرمەيتىنى انىق. دەگەنمەن ەلباسى مەن مەملەكەت باسشىسىنىڭ تاپسىرمالارىنا سايكەس، مينيسترلىك جوعارى ءبىلىم بەرۋ سالاسىندا ساپانى قامتاماسىز ەتۋ ساياساتىن ودان ءارى جالعاستىرادى"، – دەپ ءبىلىم جانە عىلىم ءمينيسترى ءسوزىن تۇيىندەدى.