ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ زەينەتاقى جيناعىن پايدالانۋ بويىنشا ءبىر شەشىمگە كەلە الماۋدىڭ سەبەبىن اتادى، دەپ جازادى Qamshy.kz اقپارات اگەنتتىگى. 

"بۇگىندە مينيسترلىك پەن ۇكىمەتتىڭ جانىنان ارنايى جۇمىس توبى قۇرىلعان. سول جەردە كوپتەگەن ۇسىنىس قاراپ جاتىرمىز. ءبىزدىڭ جوسپارىمىز بويىنشا الداعى جەلتوقسان ايىندا ءبىر ۇستانىمعا كەلىپ، جۇمىس توبىنىڭ اتىنان پرەزيدەنتكە ۇسىنىس جاساۋىمىز كەرەك. ازىرگە، ءبىر شەشىمگە كەلگەن جوقپىز"، – دەپ مينيستر باسپا ءسوز ءماسليحاتىندا ءمالىم ەتتى..

نۇرىمبەتوۆتىڭ ايتۋىنشا، قازىرگى كەزدە زەينەتاقى قورىندا 10 ميلليونعا جۋىق ەسەپشوت بار. ال سالىمشىلاردىڭ جالپى جيناقتارى 10 تريلليون تەڭگەنى قۇراپ وتىر.

"راسىندا، ەسەپتەپ كەلگەندە سالىمشىلاردىڭ 70 پروسەنتى 1 ميلليون تەڭگەگە دەيىن عانا اقشا جيناعان بولىپ شىعادى. سوندىقتان بۇل ماسەلەنىڭ قيىندىعى بار. ال زەينەتاقى قورىنداعى جينالعان جارنالاردىڭ نەگىزگى ماقساتى – ءبىزدىڭ زەينەتاقىمىزدى قامتاماسىز ەتۋ. نەگىزى، مەملەكەت تاراپىنان تولەنەتىن زەينەتاقىنىڭ ىنتىماقتاستىق جۇيەسى جىلدان-جىلعا جابىلىپ كەلەدى. 2040 جىلدان كەيىن ءتىپتى مەملەكەتتىڭ تاراپىنان تاعايىندالاتىن زەينەتاقىعا شىعاتىن ادامدار بولمايدى"، – دەپ ءبىرجان نۇرىمبەتوۆ ايتتى.

ەسكە سالساق، قىركۇيەكتىڭ باسىندا مەملەكەت باسشىسى زەينەتاقى جيناقتارىن پايدالانۋعا قاتىستى تاپسىرما بەرگەن بولاتىن.

"ۇكىمەتكە جىلدىڭ اياعىنا دەيىن جۇمىس ىستەيتىن ازاماتتار ءۇشىن زەينەتاقى جيناقتارىنىڭ ءبىر بولىگىن ماقساتتى پايدالانۋ ماسەلەسىن پىسىقتاۋدى تاپسىرامىن. ماسەلەن، ول اقشانى باسپانانى ساتىپ الۋعا جانە ءبىلىم الۋعا جۇمساۋعا بولادى"، – دەدى توقايەۆ.