2017 جىلدىڭ 1 شىلدەسى جانە 2019 جىلدىڭ 21 قاراشاسى ارالىعىندا مەديسينالىق ساقتاندىرۋ قورىنا 230 ملرد تەڭگە قارجى جيناقتالدى. بۇل تۋرالى «الەۋمەتتىك مەديسينالىق ساقتاندىرۋ قورى» كەاق الماتى قالالىق فيليالىنىڭ ديرەكتورى تىلەۋحان ابىلدايەۆ حابارلادى.

«الماتى قالاسى جارنالار مەن اۋدارىمداردىڭ كولەمى جاعىنان رەسپۋبليكا بويىنشا كوش باستاپ تۇر – جيناقتالعان سومانىڭ بەستەن ءبىر بولىگى وڭتۇستىك استانالىقتارعا تيەسىلى. جالپى، ساقتاندىرۋ جۇيەسى ىسكە قوسىلعان 2017 جىلدىڭ 1 شىلدەسىنەن 2019 جىلدىڭ 21 قاراشاسىنا دەيىنگى ارالىقتا الماتى قالاسىنان قورعا 47،3 ملرد تەڭگە جارنا اۋدارىلدى. ونىڭ 44،8 ملرد تەڭگەسى – جۇمىس بەرۋشىلەردىڭ قاراماعىنداعى جۇمىسكەرلەر ءۇشىن جاساعان اۋدارىمدارى»، – دەدى ت.ابىلدايەۆ.

سونداي-اق، جىل باسىنان بەرى ءوزىن-وزى جۇمىسپەن قامتىعان 4900 ادام 16،7 ملن تەڭگەنى قۇرايتىن ءبىرىڭعاي جيىنتىق تولەم تولەگەن.

ەستەرىڭىزگە سالا كەتسەك، ءبىرىڭعاي جيىنتىق تولەم ەلىمىزدە 2019 جىلدىڭ 1 قاڭتارىنان باستاپ ەنگىزىلگەن بولاتىن. جيىنتىق تولەمنىڭ ىشىندە وزگە الەۋمەتتىك تولەمدەرگە قوسا ساقتاندىرۋ جارناسى دا بار. ول جالپى سومانىڭ 40 پايىزىن قۇرايدى.

بجت – رەسپۋبليكالىق ماڭىزى بار قالالار ءۇشىن 1 ايلىق ەسەپتىك كورسەتكىش (اەك) نەمەسە 2525 تەڭگە، اۋىلدىق جەرلەر ءۇشىن – 0،5 اەك نەمەسە 1263 تەڭگە كولەمىندە بەلگىلەنگەن. تولەمنىڭ بۇل ءتۇرىن فريلانسەرلەر، سانتەحنيكتەر، قۇرىلىسشىلار، تاكسي جۇرگىزۋشىلەرى ت.ب. تولەي الادى.