اقتوبە – اتىراۋ – استراحان تاس جولىندا ەكى كولىك بىر-بىرىنە سوعىلىپ قالدى. وقيعا سالدارىنان 12 ادام زارداپ شەكتى، – دەپ حابارلايدى Qamshy.kz اقپارات اگەنتتىگى. . 

وقيعا  28 قاراشا كۇنى  تۇنگى ساعات 23:30 شاماسىندا اقتوبە - اتىراۋ – استراحان تاس جولىنىڭ 743ء-شى كيلومەترىندە بولدى.

"يساتاي اۋدانى ماناش اۋىلى ماڭىندا Toyota Ipsum ماركالى ەكى كولىك بىر-بىرىمەن بەتپە-بەت سوعىلدى. اپاتتان كەيىن اققىستاۋ اۋداندىق اۋرۋحاناسىنا 12 ادام كەلىپ، كومەك سۇرادى. مەديسينالىق تەكسەرۋدەن كەيىن ون ادام ۇيىنە جىبەرىلدى"، –  دەپ "قازاۆتوجول" اق باسپا ءسوز قىزمەتىنىڭ باسشىسى مارجان ورداباي مالىمدەدى.

اۋرۋحانادا ەكى ادام قالدى. دارىگەرلەردىڭ ايتۋىنشا، ولاردىڭ ءبىرى اۋىر حالدە جاتىر.

پوليسەيلەر اپاتتىڭ سەبەبىن تەرگەۋ بارىسىندا انىقتايدى. جول اپاتى جۇرگىزۋشىلەردىڭ جوندەلىپ جاتقان جول ۋچاسكەسىن كورمەي قالۋىنان بولۋى مۇمكىن.

مامانداردىڭ ايتۋىنشا، قازاۆتوجول" جولدىڭ جوندەۋدەن ءوتىپ جاتقانى تۋرالى ەسكەرتەتىن بارلىق قاجەتتى بەلگىلەر ورناتىلعان.