جاڭادان تاعايىندالعان ەنەرگەتيكا ءمينيسترى نۇرلان نوعايەۆ ەلوردادا جۋرناليستەردىڭ سۇراعىنا جاۋاپ بەردى دەپ جازادى Qamshy.kz اقپارات اگەنتتىگى.
اتىراۋ وبلىسىنىڭ بۇرىنعى اكىمى مينيسترلىكتەگى ارىپتەستەرىمەن ءالى تانىسپاعانىن جانە جەكە كابينەتىنە ءالى كىرمەگەنىن ايتتى. جۋرناليستەر 2016 جىلعى اتىراۋدا بولعان ميتينگىدەگى نۇرلان نوعايەۆتىڭ ماكس بوقايەۆ پەن تالعات ايانعا بەرگەن ۋادەسىن ەسكە ءتۇسىرىپ، سۇراق قويدى.
"مەن تالعات ايان مەن ماكس بوقايەۆقا بەرگەن ۋادەمدى ورىندادىم. مەن ميتينگ ماتەريالدارى بويىنشا ولار قىلمىستىق قۋدالاۋعا ۇشىرامايتىنىن ايتتىم جانە سوزىمدە تۇردىم. ولار قىلمىستىق كودەكستىڭ باسقا بابى بويىنشا جاۋاپقا تارتىلدى"، - دەدى نوعايەۆ.
كەشە، 18 جەلتوقساندا پرەزيدەنت قاسىم-جومارت توقايەۆتىڭ جارلىعىمەن نۇرلان نوعايەۆ اتىراۋ وبلىسى اكىمى قىزمەتىنەن بوساتىلىپ، ەنەرگيتيكا ءمينيترى بولىپ تاعايىندالدى.
نوعايەۆ 2016 جىلدىڭ ناۋرىزىنان بەرى اتىراۋ وبلىسى اكىمى قىزمەتىن اتقاردى. ول اكىم بولىپ تاعايىندالعان سوڭ بىرنەشە ايدان كەيىن اتىراۋدا حالىق جەرگە قاتىستى ميتينگىگە شىعىپ، بيلىكتەن جەردى شەتەلدىكتەرگە جالعا بەرۋگە قارسى بولعان. نوعايەۆ سول كەزدە نارازىلارمەن كەزدەسىپ، "ميتينگىگە قاتىسقاندار قۋدالانبايدى" دەپ سەندىرگەن. ءبىراق كەيىن اتىراۋداعى جەر ميتينگىسىنە قاتىسقان ماكس بوقايەۆ پەن تالعات ايان "جالعان اقپارات تاراتتى"، "ارازدىق قوزدىردى" دەگەن ايىپپەن سوتتالعان. ايان شارتتى جازامەن بوساپ شىقسا، بوقايەۆ ءالى قاماۋدا وتىر.
پىكىر قالدىرۋ