بۇگىن، 19 جەلتوقساندا شىمكەنت قالاسىنىڭ اكىمى ەرلان ايتاحانوۆ قىتايدىڭ قازاقستانداعى ەلشىسى چجان سياومەن كەزدەستى. بۇل تۋرالى قازاقپارات حابارلادى.

قازاقپاراتتىڭ جازۋىنشا، كەزدەسۋدە تاراپتار قازاقستان مەن جۇڭگو اراسىنداعى تاتۋ كورشىلىك قارىم-قاتىناستاردى ودان ءارى نىعايتۋدىڭ جانە ءوزارا ءتيىمدى ىنتىماقتاستىقتى دامىتۋدىڭ ماڭىزدىلىعىن اتاپ وتكەن. ايتاحانوۆ جۇڭگو ەلشىسىن شىمكەنتكە ينۆەستور تارتۋعا شىقارعان. 

– وزىڭىزگە ءمالىم، مەملەكەت باسشىسى قاسىم-جومارت توقايەۆ بەيجىڭدە وتكەن قازاقستان-قىتاي ىسكەرلىك كەڭەسىنىڭ التىنشى وتىرىسىنىڭ اشىلۋىندا جۇڭگو قازاقستاننىڭ ەڭ ءىرى سىرتقى ساۋدا جانە ەكونوميكالىق ارىپتەستەرىنىڭ ءبىرى ەكەندىگىن ايتقان بولاتىن. وسى باعىتتاعى جۇمىستاردى جانداندىرۋ ءۇشىن ءوندىرىسى مەن ينفراقۇرىلىمى دامىپ كەلە جاتقان مەگاپوليسكە ينۆەستورلاردى شاقىرامىز. سەبەبى ۇلى جىبەك جولىنىڭ بويىندا ورنالاسقان ءىرى ترانزيتتىك دالىزدەرى بار شىمكەنتتە ينۆەستورلار ءۇشىن قولايلى جاعداي جاسالعان. سوندىقتان ءبىز ءتۇرلى باعىتتا ارىپتەستىك ورناتۋعا نيەتتىمىز، – دەدى ايتاحانوۆ.                                                                                                                                                                                                                                              

ءوز كەزەگىندە ەلشى چجان سياو قازاقستاننىڭ ەكس-پرەزيدەنتى نۇرسۇلتان نازاربايەۆتىڭ "ەكى مەملەكەتتىڭ دوستىق قارىم-قاتىناسىن نىعايتۋعا قوسقان زور ۇلەسى مەن ۇلگىلى سارا جولىن ءارى قاراي جالعاستىرۋ قاجەت" ەكەنىن جەتكىزگەن. سونداي-اق ايتاحانوۆتىڭ ينۆەستورلارعا قاتىستى ايتقان پىكىرمەن كەلىسىپ، سول باعىتتا جۇمىستار اتقارىلاتىندىعىن ايتقان.

جۇڭگو – قازاقستانعا ەڭ كوپ ينۆەستيسيا سالعان - ءتورتىنشى، ەڭ كوپ قارىز بەرۋشى ءۇشىنشى ەل. قازاقستانعا ينۆەستيسيا سالۋ بويىنشا العاشقى ۇشتىكتە نيدەرلاند، اقش جانە شۆەيساريا تۇر. ۇلتتىق بانكتىڭ 2018 جىلعى ەسەبىنشە، قازاقستاننىڭ جۇڭگو الدىنداعى قارىزى 12 ميلليارد دوللاردى قۇرايدى. قازاقستانننىڭ گوللاندياعا – 49 ملرد دوللار، ۇلىبريتانياعا – 21،4 ملن دوللار، اقش-قا 12،3 ملرد دوللار قارىز.