بۇگىن، 19 جەلتوقساندا نۇر-سۇلتاندا جۋرناليستەر سۇراعىنا جاۋاپ بەرگەن اتىراۋ وبلىسىنىڭ بۇرىنعى اكىمى نۇرلان نوعايەۆ 2016 جىلى جەردى شەتەلدىكتەرگە جالعا بەرۋگە قارسى اتىراۋدا وتكەن ميتينگىدە جەرگىلىكتى بەلسەندى ماكس بوقايەۆ پەن تالعات ايانعا بەرگەن ۋادەسىن ورىنداعانىن ايتقان ەدى. نوعايەۆ جۋرناليستەرگە "مەن تالعات ايان مەن ماكس بوقايەۆقا بەرگەن ۋادەمدى ورىندادىم. مەن ولارعا ميتينگ ماتەريالدارى بويىنشا قىلمىستىق قۋدالاۋعا ۇشىرامايتىنىن ايتتىم جانە سوزىمدە تۇردىم. ولار قىلمىستىق كودەكستىڭ باسقا بابى بويىنشا جاۋاپقا تارتىلدى" دەپ مالىمدەگەن.
اتىراۋدا جەردى شەتەلدىكتەرگە جالعا بەرۋگە قارسى ميتينگىنى ۇيىمداستىرىپ، كەيىن سول ءۇشىن سوتتالىپ شىققان قوعام بەلسەندىسى تالعات ايان نوعايەۆتىڭ مالىمدەمەسىنە قاتىستى الەۋمەتتىك جەلى ارقىلى جاۋاپ بەردى. ايان Youtube-تاعى ارناسىنا جۇكتەگەن ۆيدەودا نوعايەۆتىڭ سوزدەرى شىندىققا جاناسپايتىنىن، ماكس بوقايەۆ پەن ءوزىنىڭ ۇستىنەن قوزعالعان ىستە "ميتينگ وتكىزۋ زاڭدارىن بۇزدى" دەگەن ايىپتاۋ بولعانىن ايتتى.
"بۇگىن نۇرلان نوعايەۆ 2016 جىلى الاڭدا بەرگەن ۋادەمدە تۇردىم دەپ ايتىپتى. ەستەرىڭىزگە سالا كەتەيىن، 2016 جىلى 24 ساۋىردە اتىراۋداعى "ماحامبەت" الاڭىندا "جەرىمىز شەتەلدىكتەر ساتىلماسىن، جالعا بەرىلمەسىن" دەگەن تالاپپەن ميتينگ بولعان. سول جەرگە بيلىك اتىنان كەلگەن نۇرلان نوعايەۆ حالىققا، بىزگە "ەشكىم قۋدالانبايدى، ەشكىم سوتتالمايدى" دەپ ۋادە بەرگەن. ەندى ءقازىر سول ۋادەمدە تۇردىم دەپ سۇحبات بەرىپ جاتىر ەكەن. مەن مۇنى جالعان دەپ ەسەپتەيمىن. ول كىسى ۋادەسىندە تۇرعان جوق. سەبەبى ماكس بوقايەۆ ءالى تۇرمەدە وتىر. ءوزىم ەكى جىل وتىرىپ شىقتىم. نۇرلان نوعايەۆ جۋرناليستەرگە بەرگەن سۇحباتىندا "ولار باسقا باپپەن سوتتالدى" دەپ ايتىپتى. ەگەر مەنىڭ سوت ۇكىمىمە نازار اۋداراتىن بولساڭىزدار، ءبىزدى 174، 274 جانە 400-باپ بويىنشا سوتتادى. ونىڭ ىشىندە 400-باپ – "ميتينگىنى زاڭسىز ۇيىمداستىرۋ" دەگەن باپ. ياعني، ءبىزدىڭ سوت ۇكىمىمىزدە 24 ءساۋىر كۇنى "يساتاي مەن ماحامبەت" الاڭىندا جاساعان ميتينگىمىز ءۇشىن، سول ميتينگىدە سويلەگەن ءسوزىمىز ءۇشىن، سول ميتينگىگە شاقىرعان ءۇشىن سوتتالدى دەپ ايقىن جازىلعان" – دەيدى تالعات ايان.
قوعام بەلسەندىسى "نوعايەۆتىڭ بەرگەن ۋادەسىندە تۇرا الماعى ءۇشىن كىناسى جوق بولعانىمەن، "ۋادەمدە تۇردىم" دەپ جالعان اقپارات تاراتۋدىڭ قاجەتى جوق" دەپ ەسەپتەيتىن ايتتى.
"ارينە، ءبىزدى سوتتاعان نوعايەۆتىڭ جەكە ءوزى ەمەس. ءبىزدى سوتتاعان – سوت بيلىگى. بۇل – ناعىز ساياسي شەشىم بولدى. ءبىزدى سوتتاعان، ءتىپتى، سوت ەمەس، ءبىزدى سوتتاعان – اقوردا. ءبىراق نوعايەۆتىڭ بۇل جەردە كىناسى بولماسا دا، "مەن ۋادەمدە تۇردىم" دەپ جالعان اقپارات تاراتۋدىڭ قاجەتى جوق" – دەدى ايان.
كەشە، 18 جەلتوقساندا پرەزيدەنت قاسىم-جومارت توقايەۆتىڭ جارلىعىمەن نۇرلان نوعايەۆ اتىراۋ وبلىسى اكىمى قىزمەتىنەن بوساتىلىپ، ەنەرگەتيكا ءمينيترى بولىپ تاعايىندالدى. نوعايەۆ 2016 جىلدىڭ ناۋرىزىنان بەرى اتىراۋ وبلىسى اكىمى قىزمەتىن اتقاردى. ول اكىم بولىپ تاعايىندالعان سوڭ بىرنەشە ايدان كەيىن اتىراۋدا حالىق جەرگە قاتىستى ميتينگىگە شىعىپ، بيلىكتەن جەردى شەتەلدىكتەرگە جالعا بەرۋگە قارسى بولعان. نوعايەۆ سول كەزدە نارازىلارمەن كەزدەسىپ، "ميتينگىگە قاتىسقاندار قۋدالانبايدى" دەپ سەندىرگەن. ءبىراق كەيىن اتىراۋداعى جەر ميتينگىسىنە قاتىسقان ماكس بوقايەۆ پەن تالعات ايان "الەۋمەتتىك ارازدىق تۋدىردى"، "جالعان اقپارات تاراتتى" جانە "ميتينگ وتكىزۋ زاڭدارىن بۇزدى" دەگەن ايىپپەن بەس جىلعا سوتتالعان. 2018 جىلى سوت تالعات اياننىڭ تۇرمەدەن ۋاقىتىنان بۇرىن بوساتۋ تۋرالى ءوتىنىشىن قاناعاتتاندىرىپ، ونىڭ جازاسىن شارتتى تۇرگە الماستىرعان. ماكس بوقايەۆ "قاماۋدان ۋاقىتىنان بۇرىن شىعۋعا سۇرانبايتىنىن" ايتقان. ال 2019 جىلى شىلدەدە اتىراۋداعى №2 قالالىق سوتى تالعات اياندى جازادان تولىق بوساتتى.
پىكىر قالدىرۋ